YEHEZKIEL 20 - Tanou Moonsoi Timugon

Kasagaan ri Aki Kapuuno' am kalaatan ru ulun

¹ Paat ra orou koopor, sila' kalimo, ralalom bilor katulu' bulintok akai ralalom pamatiran, kukula' ngaulun tingganai ru mamagun Israil minatong pangkuot raki' intor ra kasagaan ri Aki Kapuuno'. Nanturung ilo ra saang kuno.

² Indagu boo Tuhan raki',

³ “Okou ulun mapandai matoi, ragui' tingganai-tingganai ragitio. Balai' ilo ra Aku, Tuhan Raja' minindagu koson ragitio: Minatong kau koson mangkuot ra kasagaan Kuno, ka kia? Sabap ra Aku, i Aki Kapuuno' ondo' maayag, kalo mompoloso Aku ramuyun mangkuot ra atan ayuk. Aku, Tuhan Raja' nakaindagu noyo.

⁴ “Okou ulun mapandai matoi, nakatampos kono kia mangukum risilo? Amon ru nakatampos kono mambaal raginio, pakaraa' noyo ilo intor ra ngaangai' binaal makauyuyu' ondo' binaal ru kinamatuaan nilo.

⁵ Posoboyo' ragu Kuno risilo. Paat ra Aku nampili' ra Israil, nambaal Aku ra nabantuan risilo. Pinabala' Ku inan Kuno risilo giu' ra Misir am nambala' risilo, ‘Aku noyo Tuhan, i Aki Kapuuno' min.’

⁶ Paat raginio noyo binantu' Ku magibit risilo mingkual intor ra Misir, am maningganai risilo mongoi ra tana' ondo' pinili' Ku noyo ra tayar nilo, tana' ondo' langkaya' am malabung am moonsoi kaga'.

⁷ Nanusub Aku risilo mamatir ra sinungkalalaing ondo' makauyuyu', ondo' kasagain nilo, am nanginggalar risilo mampajamol ra inan am sumamba ra sinungkalalaing ru ulun ru Misir, sabap ra Aku noyo Tuhan, i Aki Kapuuno' min.

⁸ Kaa' inanggal nilo Aku am marara' rumongog ra ragu Kuno. Kalo namatir ilo ra sinungkalalaing ondo' makauyuyu' no, kapoam lumonggo' sumamba ra sinungkalalaing ru ulun ru Misir. Paat ra ilo lakat poyo soroi ra Misir, nakatampos Aku noyo mompoloso risilo makaliman ra ngaangai' kinoporos ru sangit Kuno.

⁹ Kaa' kalo baalon Ku ginio, sabap ginio mangkinibit ra inggalan Kuno asabin. Giu' ra saang ru mamagun ru Misir, nampatanou Aku noyo ra ulun ru Israil ra maningganai Aku risilo mingkual intor ra Misir.

¹⁰ “Ibito' Ku boo ilo miningkual intor ra Misir minongoi ra tana' kaagisan.

¹¹ Aniin Ku ilo ra susuban Kuno am mangila' risilo ra ukum Kuno, ondo' mangani' ra kaayagan ra osoi ayuk gumagaya' raginio.

¹² Susubon Ku ilo mangurumat ra orou Sabat koson tatandu' ru nabantuan Kuno risilo, koson mampakara' risilo ra Aku, Tuhan nampatulai risilo ra tayar Kuno.

¹³ Kaa' giu' ra tana' kaagisan no pana minanggal ilo Raki'. Minanggal ilo ra ukum Kuno am nangimpai ra susuban Kuno, ondo' mangani' ra kaayagan ra osoi ayuk gumagaya' raginio. Totopot nilo jinamol orou Sabat. Nakatampos Aku no koson mompoloso risilo makaliman ra ngaangai' kinoporos ru sangit Kuno giu' ra tana' kaagisan no am masaga' Aku mamuso risilo.

¹⁴ Kaa' kalo nambaal Aku raginio sabap ra baal raginio mangkinibit ra inggalan Kuno asabin ru gino ngai' bansa' ondo' nakakito Raki' naningganai ra ulun ru Israil miningkual intor ra Misir.

¹⁵ Ginio ra giu' ra tana' kaagisan no binantu' Ku kalo mangiou risilo mongoi ra tana' ondo' tinaakan Ku noyo risilo, tana' ondo' langkaya' am malabung am moonsoi kaga'.

¹⁶ Binaal Ku ginio sabap nangimpai ilo ra susuban Kuno, minanggal ra ukum Kuno am nampajamol ra orou Sabat. Masaga' ilo poyo sumamba ra sinungkalalaing nilo.

¹⁷ “Kaa' makaasi' Aku piboo risilo. Kalo pinatoi Ku ilo giu' ra tana' kaagisan no.

¹⁸ Kaa' pinakara' Ku ilo ondo' mangamulok: Pai' gagaya' ra ukum ru kinamatuaan min; pai' pagibaya' ra kaulayan nilo galama', am pai' jamali' inan ra sumamba ra sinungkalalaing nilo.

¹⁹ Aku, Tuhan i Aki Kapuuno' min. Gagaya' kano ra ukum am susuban Kuno.

²⁰ Iantako' min orou Sabat koson tatandu' nabantuan Kuno ramuyun, koson mampakara' ramuyun ra Aku noyo Tuhan, i Aki Kapuuno' min.

²¹ “Kaa' ilo ondo' mangamulok pana minanggal Raki'. Inanggal nilo susuban Kuno am nangimpai ra susuban Kuno ondo' nangani' ra kaayagan ra osoi ayuk ondo' gumagaya' raginio. Jinamalan nilo orou Sabat. Nakatampos Aku noyo koson mompoloso risilo makaliman ra ngaangai' kinoporos ru sangit Kuno giu' ra tana' kaagisan no am masaga' Aku mamatoi risilo ngaangai'.

²² Kaa' kalo binaal Ku ginio, sabap baal raginio mangkinibit ra inggalan Kuno asabin ru gino ngai' bansa' ondo' nakakito Raki' nagibit ra ulun ru Israil miningkual intor ra Misir.

²³ Ginio ra binantu' Ku poyo giu' ra tana' kaagisan no. Nagibot Aku ra mampatutuliar Aku risilo ra titikop ru tana' ti.

²⁴ Binaal Ku ginio sabap ra nangimpai ilo ra susuban Kuno, minanggal ra ukum Kuno, nampajamol ra orou Sabat am siminamba ra sinungkalalaing ondo' sambaan ru kinamatuaan nilo.

²⁵ “Kopongo raginio inanian Ku ilo ra ukum ondo' kalo moonsoi am susuban ondo' kalo mangani' ra kaayagan.

²⁶ Nompoloso Aku risilo nampajamol ra inan am taak nilo galama'. Nompoloso Aku risilo nampataak ra anak katuaan ungkuyon nilo koson ra taak simbalui. Baal raginio nasauk koson mangukum risilo maa' raginio makapandai ilo ra Aku noyo Tuhan.

²⁷ “Raino, okou ulun mapandai matoi, posoboyo' noyo atan ondo' paraguon Kuno, Tuhan Raja' risilo. Kinamatuaan nilo nagasab poyo Raki' ra kalo giminagaya' ilo.

²⁸ Inibit Ku ilo ra tana' ondo' binantu' Kuno, kaa' pakakito ilo ra bulur ondo' mangasawat am puun tataun masansam, nampataak ilo ra taak simbalui giu' ra intok-intok raginio. Napasingkual ilo ra sangit Kuno ra taak simbalui ondo' sinolob am wain ondo' pinataak nilo.

²⁹ Nangkuot Aku: Atan kia intok-intok ra masawat ondo' inangayan mino? Intor ragili intok no ininggalanan ra ‘Intok-intok ra masawat’.

³⁰ Ginio ra posoboyo' noyo atan ondo' paraguon Kuno, Tuhan Raja' ra ulun ru Israil: Kua kia musiti' kau makatula koson ra kinamatuaan min, am nangilou ra sinungkalalaing nilo?

³¹ Nakasaboi pinaibo ra orou raiti' nangani' kau ra taak ra mogondo', am nampajamol ra inan ra nonolob ra anak-anak min koson ra taak simbalui ra sinungkalalaing no. Akau piboo, alii ra ulun kau ngai' ru Israil, minatong piboo koson mangkuot ra kasagaan Kuno! Sabap ra Aku, i Aki Kapuuno' ondo' naayag, Tuhan Raja', kalo mangiou Aku ramuyun mangkuot ra atan ayuk.

³² Gumogot kau masauk koson ra bansa'-bansa' ra bokon, koson ra ulun ondo' minayan giu' ra pagun-pagun ra bokon am ondo' sumamba ra puun tataun am batu. Baal raginio maaru' kalo masauk.”

Mangukum am mangampun i Aki Kapuuno'

^33-34 “Sabap ra Aku, Tuhan Raja', i Aki Kapuuno' ondo' maayag, mampakara' Aku ramuyun ra sabap ru sangit Kuno, mamarinta Aku ramuyun ra mokotog am malasang. Makaliman kau ra kuasa' am sangit Kuno paat ra Aku manimung am magibit ramuyun sumaguli' intor ra pagun-pagun intok akau pinantutuliar.

³⁵ Magibit Aku ramuyun mongoi ra ‘Tana' kaagisan ru Bansa'-Bansa'’. Giu' no mangakim Aku ramuyun ra mangkito ra bulos.

³⁶ Mangakim Aku ramuyun koson ra Aku nangakim ra kinamatuaan min giu' ra tana' kaagisan Sinai ragili.” Ginio noyo ragu ru Tuhan Raja'.

³⁷ “Moporos pamakuan Kuno ramuyun maa' raginio gumagaya' kau ra nabantuan Kuno.

³⁸ Inggion Ku ulun ondo' gumuor am makatula ra gino ngai' min. Ibiton Ku ilo mingkual intor ra pagun-pagun intok inayanan min raino, am kalo mangiou Aku risilo sumaguli' ra pagun ru Israil. Bagu no makapandai kau ra Aku noyo Tuhan.”

³⁹ Indagu Tuhan Raja', “Raino alii ra ulun kau ngai' ru Israil, pambaal kano maya' ra kasagaan min! Samba kano ra sinungkalalaing min! Kaa' aniin Takamin ra pampakaraan ra kalupus raginio musiti' kau gumagaya' Raki', am kalo boo mampajamol ra inggalan Kuno ondo' matulai ra magibit ra taak ra sinungkalalaing min.

⁴⁰ Giu' ra tana' ru Israil, giu' ra tampak ru bulur Kuno ondo' matulai, akau ngaangai', ulun ru Israil sumamba Raki'. Maansayan Aku ramuyun, am mangapu ra taak simbalui, taak ondo' moonsoi kaga', am taak ondo' mapasau intor ramuyun.

⁴¹ Mopongo Takamin ibiton mingkual intor ra pagun-pagun intok nampatuliaran ramuyun, timungon Takamin am mangapu ra taak simbalui ondo' solobon min. Makito boo ru ngaangai' bansa' ra Aku ti matulai.

⁴² Paat ra akau ibiton Ku muli' ra pagun ru Israil, tana' ondo' binantu' Kuno ra kinamatuaan min, bagu no makapandai kau ra Aku noyo Tuhan.

⁴³ Makara' min boo ngaangai' binaal ra makauyuyu' am ondo' nampajamol ra inan min. Mampalua' kau ra inan min galama' sabap ra ngaangai' kalaatan ondo' binaal mino.

⁴⁴ Paat ra Aku mimbuor koson magalung ra kinoonsoi ru inggalan Kuno, akau ulun ru Israil makapandai ra Aku noyo Tuhan, sabap ra pamakuan Kuno ramuyun nogondo' koson ra binaal mino ondo' mapuka' am malaat.” Tuhan Raja' nakaindagu noyo.

Apui giu' ra rabugus

⁴⁵ Indagu Tuhan raki',

⁴⁶ “Okou ulun mapandai matoi, ilai' tampilon ra rabugus. Sawayo' noyo tana' rabugus am indagu ra ragu manala' manggal ra kataunan ra giu' no.

⁴⁷ Susubo' kataunan giu' ra rabugus rumongog ra atan ondo' raguon Kuno, Tuhan Raja': Mansikit Aku ra apui ondo' monolob ra moonong puun tataun giu' ra kataunan no, iou pana masansam am niayuk ondo' mapua'. Apui ondo' bibilak no kalo maalap ra lasa' kaa' rumalat intor ra rabugus mongoi ra ralayo, am moonong ulun makaliman ra lasu' ru apui no.

⁴⁸ Ngaangai' ru ulun makapandai ra Aku, Tuhan nansikit ra apui no, am apui no kalo maalap ra lasa'.”

⁴⁹ Kaa' aku, i Yehezkiel mindagu, “Tuhan Raja', pai' aku jajali' mindagu raginio. Moonong ulun nambutok noyo sabap ra masalok aku mindagu am magabig ondo' mapagon aration.”