YEHEZKIEL 2 - Tanou Moonsoi Timugon

Nampiau i Aki Kapuuno' ri Yehezkiel nasauk ra nabi

¹ mindagu, “Okou ulun mapandai matoi, bigor no. Masaga' Aku mindagu rirun.”

² Bulintok ra aku mokorongog ra bolos no, Ambiluo ri Aki Kapuuno' nanguasa' raki' am napabigor raki'. Mokorongog aku ra bolos no mindagu poyo,

³ “Okou ulun mapandai matoi, susubon Tokou mongoi ra ulun ru Israil. Giminuor ilo Raki' koson ra kinamatuaan nilo ragili. Saboi raino lakat ilo poyo gumuor.

⁴ Bambalingatan ilo am kalo mangurumat Raki'. Ginio ra susubon Tokou koson mampasaboi ra atan ondo' paraguon Ku, Tuhan Raja' risilo.

⁵ Ulun giminuor no rumongog rirun kapoam kalo, makapandai ilo ra mokoondo' nabi ra ilo po ngai'.

⁶ Kaa' okou, ulun ondo' mapandai matoi, pai' kalaa' risilo kapoam atan ayuk ondo' raguon nilo. Anggalon am asabin nilo okou. Malimanan mu koson maayag ra tatanga' ru lingait. Kabalu' pana raginio, pai' kalaa' ra ulun-ulun gumuor no, kapoam atan ayuk ondo' raguon nilo.

⁷ Posoboyo' ragu Kuno risilo, rumongog ilo kapoam kalo. Karaa' noyo, ilo ngaangai' no gumuor.

⁸ Okou ulun ondo' mapandai matoi, rongogo' ragu Kutu. Pai' no guor koson risilo. Gaalo' kabang muno am akano' atan ondo' pataakon kutu.”

⁹ Kopongo raginio nakito ku kalindu' ondo' pinatutui raki'. Kalindu' no nampaguut rondo' naskhah rinulun.

¹⁰ Inukab boo naskhah rinulun no am nakito ku tulisan ra karuruo sapapa' no – tulisan mokoondo' ra sulaboi, panguliran am kangilukan.