YEHEZKIEL 19 - Tanou Moonsoi Timugon

Rimbai ra manulaboi

¹ Manusub Tuhan raki' marimbai ra rimbai ra manulaboi ti posoboyon ra ruo ngaulun anak ungkuyon:

² Ina' min koson ra singa' ruandu' ondo' totopot baani. Nampasukor io ra anak-anak nano ra gino ngai' ru singa'-singa' ungkuyon ondo' masangit.

³ Nampasukor io ra rondo' anak am nangila' riso mansaam; am anak no pana nasauk ra mangakan ra ulun.

⁴ Bansa'-bansa' nokorongog intor ra anak no, am ilo pana nampalandak riso giu' ralalom ru luang. Ralaato' nilo io ra kakait am nagibit riso ra pagun ru Misir.

⁵ Kulimanon ru ina' no ulian ru anak nano, kaa' kalansanan nano kolondo' onong. Kopongo raginio nangila' io ra rondo' anak poyo, am nasauk anak no ra singa' ondo' masangit.

⁶ Nasukor anak no am liminatok ra singa'-singa' ungkuyon ra bokon. Migila' io niayuk mansaam am masauk ra mangakan ra ulun.

⁷ Linunsai no kubu am nampalunsai ra bandar. Mamagun ru pagun mangalaa' moonong ra io mansangal.

⁸ Bansa'-bansa' kiminakat tumula' riso; matong ilo intor ra ngaangai' intok. Pinaatang nilo pamalandak koson mamparakop riso, am io pana malandak ru pamalandak nilo.

⁹ Inaput nilo io ra ralalom ru kandang, am inibit io ra raja' ru Babilonia. Inalungan nilo io maa' raginio kalo boo morongog bolos nano giu' ra tampak ru bulur-bulur ru Israil.

¹⁰ Ina' min koson ra puun ru anggur ondo' tinanom giu' ra kiing ru sungoi boborok. Sabap ra masuang timug ra giu' no, puun no nangkawa' am makaraun ra maawas.

¹¹ Bulisang-bulisang nano masauk ra maikang saboi masauk ra jujuga' ru pamarintaan. Puun no sumawat makasuku' ra gaun, am kaansayin ru ngaangai' ulun sabap masawat am maawas raun nano.

¹² Kaa' ulun ondo' sumangit namubul riso, pinapatir io ra tana'. Angin sirangon sumiob am makapua' ra kawa' nano. Bulisang nano napandak, nasauk ra mapua' am solobon.

¹³ Raino puun no tinanom giu' ra tana' kaagisan, giu' ra tana' ondo' mapua' am kolondo' timug.

¹⁴ Tataun ru puun anggur no inakan ru apui, bulisang am kawa' nano nosolob. Bulisang nano kalo boo masauk ra maikang, kalo boo masauk ra jujuga' ru pamarintaan. Gitio noyo rimbai ra manulaboi ondo' rurulion rimbayon ru ulun.