YEHEZKIEL 17 - Tanou Moonsoi Timugon

Abig intor ru susuit kanui am puun ru anggur

¹ Indagu Tuhan raki',

² “Okou ulun mapandai matoi, posoboyo' abig ti ra ulun ru Israil,

³ maa' raginio makapandai ilo ra atan ondo' paraguon Kuno, Tuhan Raja' risilo: Mokoondo' sanginan susuit kanui maayo kaga' ondo' moonsoi bulu am mapila' kawo ondo' nabilar. Kanui no nansiab ra Kagunungan Libanon, am namandak ra untu ru sampuun tataun sidar,

⁴ kalupus raginio inibit pandak ru tataun no ra pagun pantalanan am pinabanta' giu' ra bandar ru ulun-ulun mantalan no.

⁵ Kopongo raginio nangalap kanui no rondo' tatanom mamulok intor ra pagun Israil am potonomo' ginio giu' ra tana' ondo' malabung am makatimug.

⁶ Tatanom no nasauk ra puun ru anggur ondo' magana' am giminawar toojo. Bulisang nano timinuu' ra riminasawat sumuku' ra susuit kanui no am bakat nano timinuu' riminalalom ra tana'. Puun ru anggur no maawas kaga' raun am bulisang.

⁷ “Mokoondo' poyo sanginan kanui maayo kaga'. Kawo nano mapila' am bulu nano makapal. Puun ru anggur no pana nopoongoi ra bakat am raun nano ra susuit kanui ondo' karuo no am malansan ra susuit no mangani' ra masuang poyo timug intor ra ondo' soroi giu' ra umo no.

⁸ Alika puun ru anggur no tinanom noyo giu' ra intok ondo' malabung am makatimug, saboi raun am kawa' nano maawas, am masauk ra puun ru anggur ondo' moonsoi kaga'.

⁹ “Aku, Tuhan Raja' pana mangkuot: Puun ru anggur ti biag kia am tumuu'? Kalo kia bubulon bakat no ru susuit kanui ondo' kasaa', mangupu' ra kawa'-kawa' nano, mamandak ra bulisang nano, am polosoon ginio lumonot? Kolondo' pakuan masuang ikang kapoam bansa' ondo' maikang koson mambaal ra baal raginio.

¹⁰ Topot ra puun tataun no tinanom noyo, kaa' tumuu' kia puun tataun no am gumayo? kalo kia lumonot boo puun tataun no paat masiob ru angin sirangon? Kalo kia lumonot boo puun tataun no ra intok tinuwan nano?”

Arati' ru abig raginio

¹¹ Indagu Tuhan raki',

¹² “Kuati' ulun-ulun gumuor no ru makarati' ilo ra arati' ru abig no. Balai' ilo ra raja' ru pagun Babilonia matong ra Jirusalim am magibit ra raja' am niayuk pagawai-pagawai ru Jirusalim mababaya' riso sumaguli' ra Babilonia.

¹³ Magibit io sangulun ra sasambaloi ru raja' am makimabantu' riso, am manusub riso magibot ra gumagaya' riso. Rokopon ru raja' ru Babilonia tingganai-tingganai ru Jirusalim

¹⁴ maa' raginio pagun no kalo gumuor, am koson manutun ra nabantuan no suguton.

¹⁵ Kaa' raja' Jiuda gumuor am nangator ra ulun minongoi ra Misir koson mokoowot ra kuda am niayuk pulalai ru saujor ondo' maayo. Nakasugut kia raja' ru Jiuda? Palabuson io kia intor ra kinibit ru binaal raginio? Kalo lair lumungkang io ra nabantuan am palabuson intor ra ukuman!”

¹⁶ Indagu Tuhan Raja', “Sabap ra Aku, i Aki Kapuuno' ondo' maayag, raja' ru Jiuda matoi giu' ra Babilonia, sabap ra liminungkang ra ibot am nabantuan nano ra raja' ru Babilonia ondo' nampasauk riso ra raja'.

¹⁷ Saujor ru raja' ru Misir ra maikang pana kalo makapangindangan riso ralalom ru pangayawan paat ra ulun ru Babilonia nambaal ra pumpun ru tana' am nangkali ra parit koson mamatoi ra masuang ulun.

¹⁸ Liminungkang raja' ru Jiuda ra ibot am nabantuan nano. Ginio ra kalo makalabus io.”

¹⁹ Indagu Tuhan Raja', “Sabap ra Aku, i Aki Kapuuno' ondo' maayag, mangukum Aku ra raja' ru Jiuda sabap ra liminungkang ra nabantuan nano ra raja' ru Babilonia. Kinara' no kalo maatang ibot ondo' binaal nano ralalom ru inggalan Kuno.

²⁰ Paatangon ku pamalandak ondo' pinakai ru ulun mampalula' am mamparakop riso. Ibiton Ku raja' ru Jiuda mongoi ra Babilonia am ukumin io ra giu', sabap ra kalo giminagaya' io Raki'.

²¹ Saujor-saujor nano ondo' mapanggol kaga' potoyon ralalom pangayawan, am ilo ondo' maayag pantutuliaron ra ati ayuk intok. Makapandai kau boo ra Aku, Tuhan nakaindagu noyo.”

Nambantu' i Aki Kapuuno' ra kalansanan

²² Gitio noyo ragu ru Tuhan Raja', “Mangkatu' Aku ra umbus mamulok intor ra untu ru puun tataun sidar ondo' masawat; tonomon Ku ginio giu' ra gunung ondo' masawat,

²³ gunung ondo' masawat kaga' ra Israil. Umbus no manampango am mangkawa', masauk boo ra puun tataun sidar ondo' moonsoi kaga'. Mansalinut susuit manabunsut ra giu' no, am sumindung ra saau nano.

²⁴ Ngaangai' puun tataun giu' ralalom ru pagun makapandai ra Aku noyo Tuhan. Tagaron Ku puun tataun ondo' masawat, am mambaal ra puun tataun ondo' magana' sumawat. Polonoton Ku puun tataun ondo' masansam, am mambaal ra puun tataun ondo' mapua' sumansam. Aku, Tuhan nakaindagu noyo. Suguton Ku ngaangai' ondo' rinagu Kuno.”