YEHEZKIEL 11 - Tanou Moonsoi Timugon

Ukumin Jirusalim

¹ Ambiluo ri Aki Kapuuno' nangkayang raki' am nagibit raki' ra kulobon garabang sirangon ra Baloi ru Tuhan. Giu' no nakakito aku ra ruo ngoopor am limo ngaulun ungkuyon nakaaya' i Jaajanya anak ri Ajur am i Pilatia anak ri Binaya, ruo ngaulun tingganai ru bansa'.

² Indagu i Aki Kapuuno' raki', “Okou ulun mapandai matoi, gitio noyo ulun ondo' nangatang ra kalaatan am nangani' ra bilin ondo' mampalayau, giti ra bandar ti.

³ Indagu ilo, ‘Kalo boo mabuoi mambaal takau saguli' ra baloi. Topot bandar ti koson ra pagangan am itakau koson ra kual giu' ra ralalom nano, kaa' kabalu' pana raginio masindungan takau intor ra apui.’

⁴ Ginio ra, okou ulun mapandai matoi, posoboyo' tanou Kutu intor ra ukuman ra tayar nilo!”

⁵ Ambiluo ru Tuhan nanguasa' raki' am nanusub raki' nampasaboi ra tanou ti ra ulun, “Akau ngai' ulun ru Israil, nakapandai Aku ra atan ondo' raguon min am baal ra inatang min.

⁶ Namatoi kau ra masuang kaga' ulun giti ra bandar ti saboi ralan-ralan nososok ra baangkai.

⁷ “Ginio ra Aku, Tuhan Raja' mindagu ramuyun. Topot ra bandar ti noyo pagangan, kaa' kual giu' ra ralalom no sala' ka akau, kaa' baangkai ru ulun ondo' pinatoi min! Kaa' akau patirin Ku intor ra bandar ti!

⁸ Malaa' kau ra ilang; porotongon Ku ulun ondo' magibit ra ilang koson mamulunsar ramuyun.

⁹ Patirin Takamin intor ra bandar ti am pataakon kau ra bansa' ra bokon. Ukumin Takamin ra matoi;

¹⁰ matoi kau ra potoyon ralalom ru pangayawan giu' ra pagun min galama'. Bagu no moonong ulun makapandai ra Aku noyo Tuhan.

¹¹ Bandar ti kalo manindung ramuyun, koson ra pagangan manindung ra kual giu' ra ralalom no. Ukumin Takamin giu' ra ati ayuk kasarayan min ra pagun ru Israil.

¹² Makapandai kau boo ra Aku noyo Tuhan, am gumagaya' ra ukum ru pagun-pagun ra paginggaar, inanggal min ukum Kuno am nangimpai ra susuban Kuno.”

¹³ Tatanga' aku mindagu ra ragu manala', pulali' ri Pilatia naratu' am patoi. Igulatur aku liliwa' nampiau, “Pai', Tuhan Raja'! Masaga' kou kia mampaluus ra ulun ondo' lakat poyo soroi giu' ra Israil?”

Bantu' ri Aki Kapuuno' ra ulun pinatiran

¹⁴ Indagu Tuhan raki',

¹⁵ “Okou ulun mapandai matoi, mamagun ru Jirusalim tatanga' mindagu intor rirun am ulun ra gino po ngai' ru bansa' muno, ulun ru Israil ondo' ralalom ru pamatiran. Konilo, ‘Ulun pinatiran maalur kaga' koson sumambayang ra Tuhan. Nangani' noyo Tuhan ritakau ra tana' ti koson ra longgom takau.’

¹⁶ “Balai' gino ngai' ru bansa' muno ralalom pamatiran ra Aku noyo ondo' nangator risilo ra maalur mongoi ra bansa'-bansa', am niayuk nampatutuliar risilo giu' ra pagun-pagun ra bokon. Kaa' koson liliwa' raginio, maya' Aku risilo giu' ra intok raginio.

¹⁷ “Ginio ra balai' ilo atan ondo' paraguon Kuno, Tuhan Raja'. Timungon Ku ilo intor ra pagun-pagun intok nampatuliaran Kuno risilo, am pasagulion Ku risilo pagun ru Israil.

¹⁸ Paat ra ilo muli', musiti' ilo mamatir ra ngaangai' sinungkalalaing ondo' malaat am makauyuyu' no.

¹⁹ Aniin Ku ilo ra guang am pangkaraan ondo' bagu. Aligin Ku guang nilo ondo' mokotog koson ra batu, ra guang ondo' gumagaya'.

²⁰ Bagu no gumagaya' ilo boo ra ukum Kuno am sumugut ra ngaangai' susuban Kuno ra matanda'. Masauk ilo ra ulun Kuno, am Aku masauk ri Aki Kapuuno' nilo.

²¹ Kaa' mangukum Aku ra ulun ondo' masaga' sumamba ra sinungkalalaing ondo' malaat am makauyuyu'. Mangukum Aku risilo sabap ra binaal nilono.” Koon raginio noyo ragu ru Tuhan Raja'.

Nangiruan i Aki Kapuuno' ra Jirusalim

²² Kirub-kirub no tumalimpuun mansiab, am luda'-luda' no pana maya'. Sinda manguliat ondo' tatandu' ru ratangan ri Aki Kapuuno' ru Israil soroi giu' ra rasawat ru kirub-kirub no.

²³ Kopongo raginio sinda ondo' manguliat no nangiruan ra bandar am minanding ra gunung giu' ra tampilon sirangon ru bandar.

²⁴ Ralalom ru pinaintalang no, nangkayang Ambiluo ri Aki Kapuuno' raki' am nagibit raki' saguli' ra intok ru ulun pinatiran giu' ra Babilonia. Pinaintalang no pana liminiot boo,

²⁵ am aku pana nambala' ra ulun pinatiran intor ra ngaangai' ondo' nanuluan ru Tuhan raki'.