YEHEZKIEL 10 - Tanou Moonsoi Timugon

Nangiruan Tuhan ra Baloi Nano

¹ Magilong aku ra bakuran ondo' soroi giu' ra tampak ru ulu ru kirub-kirub no am nakito rondo' koson ra kurisi' turungan ondo' binaal intor ra batu nilam.

² Indagu i Aki Kapuuno' ra ulun ondo' nambayang ra linon no, “Ongoi no ra lolot ru luda'-luda' ragana' ru kirub-kirub no am alapo' sogonggom baa ru apui ra kalindu' muno. Patauko' boo baa no giu' ra rasawat ru titikop bandar.” Inilayan ku io minugar.

³ Paat ra io sumubol, kirub-kirub no tatanga' migor giu' ra tampilon rabugus ra Baloi ru Tuhan, am liliut ra ralalom natikop ra gaun.

⁴ Sinda manguliat, ondo' tatandu' ratangan ru Tuhan mininsawat intor ra kirub-kirub no am mininsir mongoi ra kulobon subalan ra Baloi ru Tuhan. Kopongo raginio gaun nakatikop ra Baloi ru Tuhan, am liliut no nasauk ra matawang kaga'.

⁵ Bolos ru kawo ru kirub-kirub no morongog saboi ra liliut ra liwar. Bolos no koson ra bolos ri Aki Kapuuno' Ondo' Maayo Kaga' Kuasa'.

⁶ Paat Tuhan manusub ra ulun ondo' nambayang ra linon no mangalap ra apui intor ra ragana' ru luda'-luda' ondo' ragana' ru kirub-kirub no, subol io am bigor giu' ra kiing ru rondo' ra luda'-luda' no.

⁷ Rondo' ra kirub no nampasubol ra kalindu' nano ra ralalom ru apui ondo' soroi giu' ra tatanga' ru kirub-kirub no am nanganam kukula' baa am pabantaa' no ginio ra kalindu' ru ulun nambayang ra linon no. Ulun no pana nangapu ra baa no am ugar.

⁸ Nakito ku moonong ra kirub no mokoondo' rondo' ondo' koson ra kalindu' ru ulun giu' ra ragana' ru moonong kawo nano.

^9-10 Nakito ku niayuk giu' ra sapapa' ru moonong kirub no mokoondo' rondo' luda'. Kaapat-apat ru luda' no nogondo' am manguliat koson ra batu intan. Moonong luda' mokoondo' rondo' poyo luda' ondo' natiampal giu' ra tatanga' no.

¹¹ Koon boo raginio kirub-kirub no makaugar mongoi ra ati ayuk intok ra kalo lumimpuong. Ngaangai' kirub no mababaya' mugar mongoi ra intok sukuan ra kalo lumimpuong.

¹² Ngaangai' inan, bakulung, kalindu', kawo am luda' nososok ra mato.

¹³ Luda' no nogondo' ra luda' ondo' nakito ku ralalom ru pinaintalang ra kasaa'.

¹⁴ Moonong kirub mokoondo' apat bulos ondo' nansasala': ondo' kasaa' bulos ru sapi', ondo' karuo bulos ru ulun, ondo' katalu bulos ru singa' am ondo' kaapat bulos ru susuit kanui.

¹⁵ Kirub-kirub raginio noyo ondo' nakito ku ragili giu' ra kiing ru Sungoi Kibar. Paat ra kirub-kirub no rumasawat

¹⁶ am muyog, luda'-luda' no maya'. Paat ra kirub-kirub no mampabilar ra kawo ra mansiab, luda'-luda' no pana maya'.

¹⁷ Paat ra kirub-kirub no muog kapoam mansiab, luda'-luda' no pana maya' sabap ra kinuasa' ru kirub-kirub no.

¹⁸ Kopongo raginio sinda manguliat ondo' tatandu' ratangan ru Tuhan, nangiruan ra kulobon subalan ra Baloi ru Tuhan am manding ra rasawat ru kirub-kirub no.

¹⁹ Kirub-kirub no mampabilar ra kawo am mansiab intor ra tana' liliwa' aku magilong, am luda'-luda' no pana maya'. Kirub-kirub no minuog sangkinolor giu' ra kulobon garabang sirangon ra Baloi ru Tuhan, am sinda ondo' manguliat no soroi ayuk ra rasawat ru kirub-kirub no.

²⁰ Nakaulig aku ra ngaangai' kirub no koson ra kirub-kirub ondo' soroi ra ragana' ri Aki Kapuuno' ru Israil, ondo' nakito ku giu' ra tobo ru Sungoi Kibar.

²¹ Moonong kirub mokoondo' apat bulos, apat kawo, am rondo' koson ra kalindu' ru ulun giu' ra ragana' ru moonong kawo no.

²² Bulos ru kirub-kirub no natilu ra bulos ondo' nakito ku giu' ra kiing ru Sungoi Kibar. Moonong Kirub mugar mabanis mongoi ra saang.