YEHEZKIEL 1 - Tanou Moonsoi Timugon

YEHEZKIEL NAKAALAP RA PINAINTALANG KASAA' INTOR RI AKI KAPUUNO' ( 1:1—7:27 ) Kurisi' panturungan ri Aki Kapuuno'

¹ Paat orou kalimo ra sila' kaapat ralalom ru bilor katalu ngoopor, aku Imam Yehezkiel anak ri Busi, soroi giu' ra kiing ru Sungoi Kibar ra Babilonia nababaya' ra ulun ru Jaudi ra pinatiran. Bulintok raginio limbowon naukab am nakaalap aku ra rondo' pinaintalang intor ri Aki Kapuuno'. (

² Baal raginio nasauk limo ngambilor kalupus Raja' Joyakin pinatiran ra pagun.)

³ Giu' ra pagun Babilonia, giu' ra kiing ru Sungoi Kibar, nokorongog aku ra Tuhan minindagu raki', am nakaliman aku ra kuasa' Nano.

⁴ Pantingaa' aku am nakakito ra bagiu' mapuor kaga' minatong intor ra ralayo. Ganit kukurilop intor ra gaun ondo' maayo kaga', am limbowon giu' ra liput nano mapaang kaga'. Bulintok ra ganit no kukurilop, makito rondo' ondo' kukuliat koson ra gangsa'.

⁵ Giu' ra tatanga' ru bagiu' mapuor kaga' no nakito ku niayuk apat kirub, iono ondo' maayag natilu ra ulun,

⁶ kaa' moonong ondo' maayag mokoondo' apat bulos am apat kawo.

⁷ Kalayam ru ondo' maayag no mabanis, mokoondo' ra jajampang koson ra jajampang anak ru sapi' am manguliat koson ra gangsa' ondo' inisasan.

⁸ Suai ra apat bulos am apat kawo no, moonong ondo' maayag mokoondo' ra kalindu' ru ulun, rondo' kalindu' giu' ra ragana' ru moonong kawo.

⁹ Ruo kawo intor ra moonong ondo' maayag no nabilar am pompor no nakasuku' ra kawo ru ondo' maayag ra bokon saboi kaapat-apat ondo' maayag no nambaal ra apat segi. Paat minsir, ilo ondo' maayag no mugar ra mabanis mongoi ra saang ra kalo mapalimpuong ra inan.

¹⁰ Moonong ondo' maayag no mokoondo' apat bulos ondo' nansusuai: bulos ru ulun tampilon ra saang, bulos ru singa' tampilon ra pamiris, bulos ru sapi' tampilon ra kait, am bulos ru susuit kanui tampilon ra talikuron.

¹¹ Ruo kawo intor ra moonong ondo' maayag no nabilar ra masawat saboi nakasuku' ra pompor ru kawo ru ondo' sapapa' nano. Ruo kawo ra bokon nakukum nanili ra inan ru moonong ondo' maayag no.

¹² Moonong ondo' maayag nakatingkuang ra apat intok maa' raginio makasuku' ra intok ra ati ayuk sumugut ra kasagaan ru ilo ondo' maayag no ra kalo palimpuongon inan.

¹³ Gino ngai' ru ondo' maayag no mokoondo' rondo' ondo' koson ra pilasut ondo' mapaang. Pilasut no masalok minsir. Apui nano mapaang am mingkual ganit.

¹⁴ Ilo ondo' maayag no mansiab ra giu' am giti maribok koson ra ganit.

¹⁵ Tatanga' aku magilong ra apat ondo' maayag no, nakito ku poyo apat luda' ra rasawat ru tana', rondo' luda' ra sapapa' ru moonong ondo' maayag.

¹⁶ Kaapat-apat luda' no nogondo' ayuk baal no am manguliat koson ra batu intan, am moonong luda' mokoondo' rondo' luda' ra bokon ondo' nakatiampal giu' ra tatanga' no.

¹⁷ Koon raginio noyo kaapat-apat luda' no mugar mongoi ra apat intok.

¹⁸ Rim ru luda' no nototop ra mato.

¹⁹ Paat ra ilo ondo' maayag no mugar, luda' pana maya' mugar. Amon ru minsawat ilo ra rasawat, luda' no pana maya' risilo.

²⁰ Ilo ondo' maayag no mongoi ra ati ayuk sumugut ra kasagaan nilo, am luda' no masalok maya' sabap ra kinuasa' nilo.

²¹ Ginio ra moonong ra ilo ondo' maayag no minsir kapoam muog kapoam minsawat, luda' pana maya'.

²² Giu' ra tampak ru ulu nilo ondo' maayag no, mokoondo' rondo' ondo' baal no koson ra bakuran ondo' binaal intor ra kristal ondo' kukuliat.

²³ Giu' ra ragana' ru bakuran no minigor ilo ondo' maayag no, liliwa' nambilar ra ruo kawo suku' ra ondo' maayag ra sapapa' nano, liliwa' ruo ra kawo poyo nanili ra inan.

²⁴ Paat ra ilo ondo' maayag no mansiab, morongog ku bolos ru kawo mangulutub. Bolos no koson ra bolos ru bosoi, koson ra kurapak ru tumpang ru pulalai ru saujor ondo' maayo, am koson ra bolos ri Aki Kapuuno' Ondo' Maayo Kaga' Kuasa'. Ilo ondo' maayag no nangukum ra kawo paat muog mansiab,

²⁵ kaa' bolos lakat poyo morongog intor ra bakuran ondo' giu' tampak ru ulu nilo ondo' maayag no.

²⁶ Giu' ra tampak ru bakuran no poyo mokoondo' rondo' ondo' maimpal koson ra kurisi' turungan ondo' binaal intor ra batu nilam. Rondo' ondo' koson ra ulun manturung giu' ra rasawat ru kurisi' turungan no.

²⁷ Intor ra awak nano ra rasawat makito mapaang koson ra gangsa' giu' ra tanga' ru apui bibilak, am intor ra awak nano ra ragana' makito koson ra apui. Sinda no mapaang kaga'

²⁸ ra batik-batik ru bulintung. Sinda manguliat no nanulu' ra ratangan ru Tuhan.