UNTABAN 9 - Tanou Moonsoi Timugon

Pangiantakan Paska ondo' karuo

¹ Minindagu Tuhan ri Musa giu' ra Tana' Kaagisan Sinai ra sila' kasaa', ralalom bilor karuo malupus ulun ru Israil nangiruan ra Misir. Indagu Tuhan,

^2-3 “Ulun ru Israil musiti' mangiantak ra Paska intor ra paat ru mato ru orou tumolop ra orou koopor am apat sila' ragitio, am sumugut ra ngaangai' aturan ondo' inaru' noyo tayar ru pangiantakan ragitio.”

⁴ Nanusub boo i Musa ra ulun ru Israil mangiantak ra Paska.

⁵ Mangiantak ilo raginio paat ra orou koopor am apat sila' kasaa', paat ra palunggai' giu' ra Tana' kaagisan Sinai. Nambaal ilo ra ngaangai' topot koson ra susuban ru Tuhan ri Musa.

⁶ Kaa' mokoondo' kukula' ngaulun risilo ondo' majamol sabap nangambong noyo ra baangkai. Ginio sabap ra ilo kalo nakapangiantak ra Paska paat ra orou raginio. Minongoi ilo tuum ri Musa am i Arun,

⁷ am indagu, “Majamol akai sabap ra nangambong ra baangkai, kaa' kua inggalari' akai mapataak ra taak simbalui ra Tuhan mababaya' ra ulun ru Israil ra bokon?”

⁸ Taam i Musa, “Paginaa saboi makaapu aku ra panuluan intor ra Tuhan.”

⁹ Nanusub Tuhan ri Musa

¹⁰ mambala' ra ulun ru Israil, “Paat ra mokoondo' sasangulun ra popolos min kapoam papag min ondo' majamol sabap ra nangambong ra baangkai, kapoam ralalom pangkiralanan ra maalur, kaa' lakat poyo masaga' mangiantak ra Paska,

¹¹ makapangiantak io raginio malupus sansila', paat palunggai' ru orou koopor am apat sila' karuo. Musiti' io mangiantak raginio ra mangakan ra domba paska am ruti' kalo linatakan ra ragi am niayuk sayur mangapait.

¹² Kalo panatangon io ra suwo ru akanon no saboi ra susuab ru suabon no, am kalo pamandakon io ra rondo' bungul pana intor ra bibiag no. Musiti' io mangiantak ra Paska sumugut ra ngaangai' kaulayan no.

¹³ Sasangulun ondo' kalo majamol am sala' ka ralalom pangkiralanan ra maalur, kaa' kalo mangiantak ra Paska, kalo boo karaan ra ulun Kuno sabap ra kalo napataak io ra taak Raki' paat ondo' inaru'. Musiti' io mansaan ra kinibit ru tula nano.

¹⁴ Amon ru mokoondo' sangulun bansa' ra bokon ondo' minayan ra popolos min ondo' masaga' mangiantak ra Paska, musiti' io mangiantak raginio sumugut ra ngaangai' kaulayan. Ukum ondo' nogondo' masauk ra moonong ulun, iou ra ulun ru Israil am niayuk ra ulun bansa' ru bokon.”

Gaun ondo' makasinda

^15-16 Paat ra orou napatirangan ra Kim ru Tuhan, ratong gaun nanili ra Kim no. Paat ra rondom ilain gaun no koson ra apui.

¹⁷ Pogonong ra minsawat gaun no, rulunon ru ulun ru Israil Kim no am mugar. Ati ayuk tuunan ru gaun no, giu' no intok nilo mapatirong ra kim.

¹⁸ Sumugut ra susuban ru Tuhan, rulunon kim no ru ulun no, sumugut ra susuban Nano niayuk patirongon nilo kim. Buoi ru gaun no soroi ra rasawat ru Kim ru Tuhan, magulayun ilo ayan ra intok raginio.

¹⁹ Amon ru mabuoi gaun no soroi ra rasawat ru Kim ru Tuhan, gumagaya' ilo ra Tuhan am kalo manding.

²⁰ Sanganuan no soroi gaun no giu' ra rasawat ru Kim ru Tuhan ra kukula' ngoorou ayuk. Kabalu' pana raginio, susuban ru Tuhan ayuk mangaru' ru mayan ilo ra rondo' intok kapoam manding.

²¹ Sanganuan no soroi gaun no giu' ra rasawat ru Kim ru Tuhan intor ra mai' ti saboi ra susuab ti ayuk, am mugar ilo ra makainsawat ayuk gaun no. Paat ra minsawat ayuk gaun no, mugar ilo.

²² Amon ru soroi gaun no giu' ra rasawat ru Kim ru Tuhan buoi ruo ngoorou, sansila', sambilor, kapoam mabuoi poyo intor raginio, buoi raginio noyo ilo mayan ra intok raginio. Kaa' paat ra minsawat gaun no, mugar ilo.

²³ Mayan ilo ra rondo' intok am manding ra intok bokon sumugut ra susuban ru Tuhan ondo' pinasaboi Nano ra pinasaboi galing ri Musa.