UNTABAN 8 - Tanou Moonsoi Timugon

Intok ru lampung

¹ Indagu Tuhan ri Musa,

² “Balai' i Arun ra paat io mapabanta' ra tulu' lampung ra tampakan ra lampung, sinda ru lampung-lampung no musiti' matampulau giu' ra tayar saang ru tampakan ra lampung.”

³ Ginagaya' ri Arun susuban no. Pinabanta' no lampung-lampung no pinatampilon ra saang ru tampakan ra lampung.

⁴ Tampakan ra lampung no binaal intor ra mas tinuyu', intor ra antulan no saboi ra bunga' ra pinamunga' tampilon ra rasawat, sumugut ra tiluan ondo' pinatulu' ru Tuhan ri Musa.

Pamasawan am patimpokon ra ulun ru Liwi

⁵ Indagu Tuhan ri Musa,

⁶ “Pasuayon ulun ru Liwi intor ra ulun ru Israil ra bokon am paugaron upacara pamasawan risilo

⁷ ra ralan ragitio: patakison risilo timug koson mamasau risilo, am susubon ilo sukurin ngaangai' inan am mampupu' ra bayang nilo. Koon raginio noyo ilo masauk ra mapasau.

⁸ Ulun ru Liwi pana musiti' mangalap ra sanginan sapi' gawayan mamulok am taak ondo' inaru', iono taak simbalui koson paringkuanangan, iono tapung ondo' linatakan ra umau jaitun. Okou musiti' mangalap ra sanginan sapi' gawayan poyo tayar ru taak simbalui koson mangampun ra tula.

⁹ Timungo' boo ngaangai' ulun ru Israil am susubon ulun ru Liwi migor ra saang ru Kim Kuno.

¹⁰ Ulun ru Israil musiti' mapabanta' ra kalindu' ra rasawat ru ulu ru ulun ru Liwi,

¹¹ am i Arun musiti' patimpokon no ulun ru Liwi tayar ru taak luntukon intor ra ulun ru Israil Raki', maa' raginio ulun ru Liwi makapangandoi Raki'.

¹² Mopongo raginio ulun ru Liwi musiti' mapabanta' ra kalindu' ra rasawat ru ulu ru karuo-ruo sapi' gawayan no; sanginan pataakon tayar ru taak simbalui koson mangampun ra tula am ondo' sanginan poyo tayar ru taak simbalui koson mapabansuk ra guang ru Tuhan. Ralalom ru upacara raginio noyo ulun ru Liwi kinapasau.

¹³ Patimpokon ulun ru Liwi tayar ru taak luntukon Raki' am susubon i Arun am anak-anak ungkuyon nano masauk ra tingganai nilo.

¹⁴ Koon ra ralan raginio noyo ulun ru Liwi pinasuai intor ra ulun ru Israil ra bokon maa' raginio masauk ilo ra Aku tatangan.

¹⁵ Mopongo kou mapapasau am patimpokon ra ulun ru Liwi, maaya' ilo mangandoi ra Kim Kuno.

¹⁶ Pinasauk Kuno noyo ilo ra suali ru ngaangai' anak ungkuyon katuaan ru Israil, am masauk ilo ra Aku ayuk tatangan.

¹⁷ Paat ra Aku namatoi ra ngaangai' anak ungkuyon katuaan ru ulun ru Misir, patimpokon Ku ngaangai' anak ungkuyon katuaan intor ra moonong sasambaloi ru Israil masauk ra Aku tatangan, am niayuk moonong anak katuaan ra ungkuyon ru bibiag tinambiag.

¹⁸ Kaa' raino nangalap Aku ra ulun ru Liwi koson suali ru ngaangai' anak ungkuyon katuaan ru Israil.

¹⁹ Ulun ru Liwi pataakon Ku ri Arun am anak-anak ungkuyon nano tayar ru taak intor ra ulun ru Israil, maa' raginio ulun ru Liwi makapangandoi ra tayar ru ulun ru Israil giu' ra Kim Kuno. Makiampun ulun ru Liwi niayuk intor Raki' ra tayar ru ulun ru Israil maa' raginio ulun raginio kalo malumpa' ra karaat amon ru matong ilo mamaar kaga' ra Lamin Matulai.”

²⁰ Ginio ra i Musa, i Arun am ngaangai' ulun ru Israil patimpokon ra ulun ru Liwi ra Tuhan, sumugut ra susuban ru Tuhan ri Musa.

²¹ Nangimpasau ulun ru Liwi ra inan am nampupu' ra bayang nilo, am patimpokon ilo ri Arun tayar ru taak luntukon ra Tuhan. Napaugar niayuk i Arun ra upacara pamasawan risilo.

²² Nambaal ulun ru Israil ra ngaangai' nanusuban ru Tuhan ri Musa intor ra ulun ru Liwi. Koon raginio noyo ulun ru Liwi maaya' mangandoi giu' ra Kim ru Tuhan ra tiningganai ri Arun am anak-anak ungkuyon nano.

²³ Indagu Tuhan ri Musa,

²⁴ “Moonong ulun ru Liwi ondo' umur no ruo ngoopor am limo ngambilor am nakasail, musiti' mapaugar ra kandoi nano giu' ra Kim Kuno.

²⁵ Paat ra sangulun Liwi ondo' umur no limo ngoopor ngambilor, palabuson io intor ra kandoi nano.

²⁶ Mopongo raginio makapangindangan io ra gino po ngai' ulun ru Liwi ondo' mangandoi giu' ra Kim Kuno, kaa' kolondo' boo kandoi magulayun nano. Ginio noyo ralan muno manampos ra kandoi ru ulun ru Liwi.”