UNTABAN 7 - Tanou Moonsoi Timugon

Taak ru tingganai-tingganai

¹ Paat rondo' orou nopongo i Musa napatirong ra Kim ru Tuhan, patimpokon no Kim no ra Tuhan, nababaya' ra ngaangai' kuliamos no am luiti' ngaangai' no ra umau upacara. Koson niayuk raginio binaal no ra altar am niayuk kuliamos no.

² Tingganai-tingganai ru bansa' ondo' nasauk ra tingganai ralalom bansa' ru Israil, iono ulun linansanan mapaugar ra panguntaban no,

³ magibit ra taak nilo ra Tuhan: Onom kurita' ru sapi' am mopor am ruo ngainan sapi', rondo' kurita' sapi' tinaakan ru ruo ngaulun tingganai, am sanginan sapi' tinaakan ru moonong tingganai. Pakataak nilo ngaangai' no,

⁴ indagu Tuhan ri Musa,

⁵ “Apuo' noyo ngaangai' taak no koson pakayon ralalom kandoi giu' ra Kim Kuno. Pataako' ngaangai' no ra ulun ru Liwi, sumugut ra kondoyon nilo.”

⁶ Ginio ra pataako' ri Musa ra ulun ru Liwi ngaangai' kurita' ru sapi' am sapi' no.

⁷ Pataako' no ra bansa' ru Girson ruo kurita' ru sapi' am apat ngainan sapi',

⁸ am apat kurita' ru sapi' am balu' ngainan sapi' ra bansa' ru Mirari. Ngaangai' kondoyon nilo musiti' tainuin ri Itamar anak ri Arun.

⁹ Kaa' kalo nanaak i Musa ra bansa' ru Kigat ra kurita' ru sapi' kapoam sapi', sabap ra kuliamos ra mangapasau ondo' alungin nilo musiti' saanin nilo.

¹⁰ Nagibit tingganai-tingganai niayuk ra taak koson mangiantak ra upacara patimpokon ra altar. Pakataak nilo noyo taak giu' rasawat ru altar,

¹¹ Indagu Tuhan ri Musa, “Balai' ilo ra moonong orou, buoi mopor am ruo ngoorou, sangulun tingganai musiti' mapataak ra taak nano ra upacara patimpokon ra altar.”

^12-83 Mapataak ilo ra pataakon nilo sumugut ra pansunuan ragitio: Orou Bansa' Tingganai Kasaa' Jiuda Nagason anak ri Aminadab Karuo Isakar Nitaniil anak ri Juar Katalu Jibulon Iliab anak ri Gilon Kaapat Rubin Ilijur anak ri Sidiur Kalimo Simion Silumiil anak ri Jurisyadai Koonom Gad Ilyasap anak ri Riguil Katulu' Ipraim Ilisama anak ri Amigud Kabalu' Manasi Gamaliil anak ri Pidajur Kasiam Binjamin Abidan anak ri Gidioni Koopor Dan Agiijir anak ri Amisyadai Koopor am saa' Asyir Pagiil anak ri Okran Koopor am ruo Naptali Agira anak ri Inan Taak ondo' ibiton ru moonong ulun no mogondo': Rondo' mangkuk pirok bagat no 1.5 ngakilogram, am rondo' bisin pirok bagat no 800 ngagram, sumugut ra timbangan ondo' pakayon giu' ra Kim ru Tuhan. Karuo-ruo kuliamos no mapanu' ra tapung ondo' linatakan ra umau tayar ru taak simbalui koson paringkuanangan; rondo' pinggan mas bagat no 110 ngagram, ondo' mapanu' ra kaminyan; sanginan sapi' gawayan mamulok, sanginan domba gawayan am sanginan anak domba ondo' umur no sambilor ra tayar ru taak simbalui koson mapabansuk ra guang ru Tuhan; sanginan kambing koson taak simbalui koson mangampun ra tula; ruo ngainan sapi' gawayan, limo ngainan domba gawayan, limo ngainan kambing gawayan am limo ngainan anak domba ondo' umur no sambilor tayar ru taak simbalui koson makibarakat ra Tuhan.

Orou Bansa' Tingganai

^84-88 Suang ru taak ondo' ibiton ru mopor am ruo ngaulun tingganai ra upacara patimpokon ra altar no koson ragitilo: – 12 mangkuk pirok am 12 bisin pirok, ngaangai' bagat no 27.6 ngakilogram, – 12 pinggan mas, ngaangai' bagat no 1.32 ngakilogram am mapanu' ra kaminyan, – 12 ngainan sapi' gawayan, 12 ngainan domba gawayan, 12 ngainan anak domba ondo' umur no sambilor, tayar ru taak simbalui koson mapabansuk ra guang ru Tuhan, pabayaan ra taak simbalui ondo' inaru', iono taak simbalui koson paringkuanangan, – 12 ngainan kambing tayar ru taak simbalui koson mangampun ra tula, – 24 ngainan sapi' gawayan, 60 ngainan domba gawayan, 60 ngainan kambing am 60 ngainan anak domba ondo' umur no sambilor tayar ru taak simbalui koson makibarakat ra Tuhan.

⁸⁹ Paat ri Musa mumpos ra ralalom Kim ru Tuhan koson mindagu ra Tuhan, morongog no Tuhan mindagu riso intor rasawat ru taub ru Kaban Nabantuan, pangkilolot ru ruo patung kirub.