UNTABAN 6 - Tanou Moonsoi Timugon

Aturan intor ra ulun nazir

¹ Nanusub Tuhan ri Musa

² manaak ra aturan ragitilo ra ulun ru Israil. Paat ra sangulun ungkuyon kapoam ruandu' mokoondo' ra nazar koson patimpokon inan tayar ra Tuhan koson ulun Nazir,

³ kalo makainum io ra wain am inumon makagauk. Kalo makainum io ra inumon atan pana ondo' binaal intor ra kawa' ru anggur, am kalo makaakan io ra kawa' ru anggur baguon kapoam kismis.

⁴ Buoi ra io ulun Nazir, kalo makaakan io ra atan pana ondo' intor ra puun ru anggur, iou pana unor kapoam kulapa' ru kawa' ru anggur.

⁵ Buoi ra io ulun Nazir, kalo mokopomolompor io ra abuk nano kapoam sukurin. Maguut io ru nazar nano saboi makai' paat nano patimpokon inan tayar ra Tuhan. Ginio ra abuk nano am jangut nano musiti' polosoon gumawar.

^6-7 Abuk nano tatandu' ra patimpokon no ra inan tayar ri Aki Kapuuno'. Ginio ra kalo jamalin no ra inan ra minggaar ra baangkai, iou pana baangkai ru ama' nano, ina' nano, maayo nano ra ungkuyon kapoam ruandu'.

⁸ Buoi ra io ulun Nazir, io noyo ulun ondo' patimpokon ra Tuhan.

⁹ Amon ru majamol abuk ru ulun Nazir sabap ra sapapa' io ru sangulun ondo' minatoi pamulali', ulun Nazir no musiti' maginaa buoi tulu' ngoorou, am sukurin abuk am jangut nano. Ra koson raginio masauk io ra mapasau.

¹⁰ Paat orou kabalu', musiti' io magibit ra imam no ra ruo ngainan susuit maningkuluuk kapoam ruo ngainan susuit asang giu' ra kulobon ru Kim ru Tuhan.

¹¹ Mapataak imam no ra sanginan susuit tayar ru taak simbalui koson mangampun ra tula, am sanginan poyo tayar ru taak simbalui koson mapabansuk ra guang ru Tuhan. Mapaugar imam ra upacara pamasawan ra ulun no sabap mininggaar io noyo ra baangkai. Paat orou raginio niayuk, ulun no musiti' patimpokon abuk nano saguli' ra Tuhan,

¹² am manalimbagu ra nazar nano ra Tuhan koson ra ulun Nazir buoi ra ondo' inaru'. Buoi ondo' nakasail no kalo boo untobon sabap ra abuk nano ondo' patimpokon nano nasauk ra majamol. Koson ra taak simbalui koson mambayar ra kalubatan, musiti' ulun no mapataak ra sanginan anak domba ondo' umur no sambilor.

¹³ Paat mopongo ru sangulun Nazir no gogoton nano, musiti' io mambaal ra upacara ragitio. Musiti' io mongoi ra kulobon ru Kim ru Tuhan

¹⁴ am mapataak ra talu ngainan bibiag ondo' kalo najamaran no ra Tuhan: Sanginan anak domba gawayan ondo' umur no sambilor tayar ra taak simbalui koson mapabansuk ra guang ru Tuhan, sanginan anak domba ruandu' umur no sambilor tayar ru taak simbalui koson mangampun ra tula, am sanginan anak domba gawayan koson taak simbalui koson makibarakat ra Tuhan.

¹⁵ Musiti' io niayuk mapataak ra sambakul ruti' kalo linatakan ra ragi: Ruti' makapal ondo' linatakan ra umau jaitun, am ruti' malilis ondo' linuitan ra umau jaitun. Musiti' io niayuk mapataak ra taak simbalui koson paringkuanangan am taak simbalui wain, koson ra ondo' inaru' noyo.

¹⁶ Imam musiti' magibit ra ngaangai' no ra saang ru Tuhan, am niayuk taak simbalui koson mangampun ra tula am taak simbalui koson mapabansuk ra guang ru Tuhan.

¹⁷ Mapataak io ra domba gawayan no ra Tuhan tayar ru taak simbalui koson makibarakat ra Tuhan, am mapataak raginio am pabayaan ra sambakul ruti'; musiti' io niayuk mapataak ra taak simbalui koson paringkuanangan am taak simbalui wain.

¹⁸ Ulun Nazir no musiti' sukurin abuk nano giu' ra kulobon ru Kim ru Tuhan, am papatiron abuk no ralalom ru apui ondo' tatanga' monolob ra taak simbalui koson makibarakat ra Tuhan.

¹⁹ Mopongo raginio, mangalap imam ra kalayam ra saang ru domba gawayan ondo' tinanok noyo, rondo' ruti' makapal am rondo' ruti' malilis intor ra bakul no, am pabantaan ngaangai' no ra kalindu' ru ulun Nazir no.

²⁰ Imam no pana musiti' mapataak ra ngaangai' no tayar ru taak luntukon ra Tuhan. Ngaangai' taak no mapasau am masauk ra imam tatangan, mabaya' ra kubab am paa ru domba gawayan ondo' sumugut ra aturan, masauk noyo ginio ra imam tatangan. Mopongo raginio, ulun no sala' ka boo ulun Nazir, am makainum io ra wain.

²¹ Ginio noyo aturan ra ulun Nazir. Kaa' amon ru nambantu' sangulun Nazir koson manaak ra taak ondo' nasailan intor ra kitaak ru nazar nano, musiti' suguton no ngaangai' bantu' nano.

Ragu ru barakat

²² Nanusub Tuhan ri Musa koson

²³ mambala' ri Arun am anak-anak ungkuyon nano maa' raginio mindagu ra ragu ragitio paat ra ilo mambarakat ra ulun ru Israil:

²⁴ Gama' ru mambarakat am magalung Tuhan ramuyun.

²⁵ Gama' ru moonsoi guang am mataau guang ru Tuhan ramuyun.

²⁶ Gama' ru maansayan Tuhan ramuyun am manaak ramuyun ra kaansayan.

²⁷ Indagu Tuhan, “Amon ru mindagu ilo ra inggalan Kuno koson ra barakat ra ulun ru Israil, barakaton Ku ulun ru Israil.”