UNTABAN 4 - Tanou Moonsoi Timugon

Kandoi ru bansa' ru Kigat

¹ Nanusub Tuhan ri Musa am i Arun

² maa' raginio mapaugar ra panguntaban ra bansa' ru Kigat intor ra bansa' ru Liwi, sumugut ra bansa' am sasambaloi ru sigagama',

³ am maa' raginio maparijisto ra ngaangai' ungkuyon intor ra 30 am 50 ngambilor, ondo' maaya' mangandoi giu' ra Kim ru Tuhan.

⁴ Pinaalungan risilo kuliamos ra mangapasau kaga'.

⁵ Nanaak Tuhan ri Musa ra panuluan ragitio. Masaboi paat no ra maparulun ra kim, i Arun am anak-anak nano musiti' mumpos ralalom ru Kim ru Tuhan am mangalap ra tabir giu' ra saang ru Kaban Nabantuan. Musiti' nilo taubin Kaban Nabantuan ra tabir no.

⁶ Ilo pana musiti' manaub poyo ra kaban no rondo' kungkung malumis, am pabingkalon rondo' konoon motomou ra ralimbou no, am paatangon tataun pamandas ra Kaban Nabantuan.

⁷ Musiti' nilo pabingkalon rondo' konoon motomou ra rasawat ru mija', intok ru ruti' ondo' pataakon ra Tuhan. Musiti' nilo pabantaan pinggan, mangkuk ru kaminyan, mangkuk ru taak simbalui, am rarapu' tayar ru taak simbalui wain rasawat ru mija'. Musiti' taak ra ruti' magail soroi ra rasawat ru mija'.

⁸ Rondo' konoon malia' musiti' pabingkalon ra rasawat ru ngaangai' kuliamos no, am taubin ngaangai' no ra rondo' kungkung malumis. Ilo pana musiti' mapaatang ra tataun pamandas ra mija' no.

⁹ Musiti' ilo mangalap ra rondo' konoon motomou am taubin tampakan ra lampung am niayuk lampung-lampung no, sumpit pamasau ra sumbu' ru lampung, talam am ngaangai' papasuangan ra umau jaitun.

¹⁰ Musiti' nilo lopoton tampakan ra lampung no am niayuk kuliamos no ra rondo' kungkung malumis, am pabantaan ngaangai' no ra rasawat ru pamandasan.

¹¹ Mopongo raginio musiti' nilo pabingkalon rondo' konoon motomou ra rasawat ru altar mas, am taubin ginio ra rondo' kungkung malumis. Ilo pana musiti' mapaatang ra tataun pamandas ra altar no.

¹² Musiti' ilo mangalap ra ngaangai' kuliamos ondo' pakayon giu' ralalom Lamin Matulai, am lopoton ngaangai' no ra rondo' konoon motomou. Ngaangai' no musiti' taubin ra rondo' kungkung malumis, am ngaangai' no pabantaan ra rasawat ru pamandasan.

¹³ Musiti' nilo impasawin altar intor ra kaau ondo' makaumau, am pabingkalon rondo' konoon matanggilung ra rasawat no.

¹⁴ Giu' rasawat ru altar no, musiti' pabantaan ngaangai' kuliamos ondo' pakayon ralalom ru sambayang giu' ra altar: intok ru baa, garapu', susuuk am bisin. Ngaangai' no musiti' taubin ra kungkung malumis, am paatangon boo tataun pamandas ra altar.

¹⁵ Paat maparulun ra Kim, bansa' ru Kigat mangkayang ra kuliamos mangapasau ra mopongo ayuk taubin ri Arun am anak-anak nano ngaangai' kuliamos no am niayuk kuliamos ra ukop nano. Kalo pokombongon bansa' ru Kigat ra kuliamos mangapasau no. Amon ru mangambong ilo raginio, matoi ilo. Ginio noyo kandoi ru bansa' ru Kigat paat pabandingon Kim ru Tuhan.

¹⁶ Anak ru Imam Arun, i Iliajar musiti' magalung ra ngaangai' Kim ru Tuhan, makaaya' umau ru lampung, kaminyan, taak simbalui intor ra kaunaran ondo' inaru', umau ru upacara, am ngaangai' ralalom ru Kim ru Tuhan ondo' luntukon noyo ra Tuhan.

¹⁷ Indagu Tuhan ri Musa am i Arun,

¹⁸ “Pai' polosoo' bansa' ru Kigat matoi

¹⁹ sabap ra minggaar ra kuliamos mangapasau kaga'. Koson miliu ra baal raginio masauk, i Arun am anak-anak ungkuyon nano musiti' mumpos ra ralalom ru Kim ru Tuhan am mangaru' ra kandoi ru moonong ulun, am niayuk kuliamos ondo' musiti' ibiton ru moonong ulun.

²⁰ Kaa' amon ru ulun intor ra bansa' ru Kigat mumpos ralalom Kim ru Tuhan am magilong ra imam-imam manampos ra kuliamos mangapasau ra pabandingon, matoi ilo.”

Kandoi ru bansa' ru Girson

²¹ Nanusub Tuhan ri Musa

²² manguntob ra bansa' ru Girson intor ra bansa' ru Liwi, sumugut ra bansa' am sasambaloi ru sigagama'.

²³ Sinusub niayuk i Musa maparijisto ra ngaangai' ungkuyon ondo' umur no intor ra 30 am 50 ngambilor, ondo' maaya' mangandoi giu' ra Kim ru Tuhan.

²⁴ Kandoi nilo magibit ra kuliamos-kuliamos ragitio:

²⁵ Kim ru Tuhan am angob no, am niayuk taub ra ralimbou ondo' binaal intor ra kungkung malumis, tabir ru kulobon,

²⁶ tabir am tali ra liliut ra libung ru Kim ru Tuhan am altar, tabir ru kulobon ra liliut, am ngaangai' kuliamos ondo' pakayon koson manirong ra kuliamos-kuliamos raginio. Baalon nilo ngaangai' kandoi ondo' makakulawit ra kuliamos-kuliamos raginio.

²⁷ I Musa am i Arun musiti' mantainu ra bansa' ru Girson maa' raginio baalon nilo ngaangai' kandoi no am magibit ra ngaangai' kuliamos ondo' inaru' ri Arun am anak-anak ungkuyon nano.

²⁸ Ginio noyo kandoi ru bansa' ru Girson giu' ra Kim ru Tuhan. Musiti' nilo baalon ginio ra tainuin ri Itamar anak ri Imam Arun.

Kandoi ru bansa' ru Mirari

²⁹ Nanusub Tuhan ri Musa manguntob ra bansa' ru Mirari intor ra bansa' ru Liwi sumugut ra bansa' am sasambaloi ru sigagama'.

³⁰ Naparijisto niayuk i Musa ra ngaangai' ungkuyon ondo' umur no intor ra 30 am 50 ngambilor, ondo' maaya' mangandoi giu' ra Kim ru Tuhan.

³¹ Pagibiton ilo ra rangka, tataun bandayan, lugu' am antulan ru Kim ru Tuhan,

³² am niayuk magibit ra lugu', antulan, popok, am tali tayar ru liliut ra libung ru Kim ru Tuhan, mabaya' ra ngaangai' kuliamos ondo' pakayon mapatirong raginio. Moonong ulun tinaakan ra kandoi magibit ra kuliamos-kuliamos ondo' inaru'.

³³ Ginio noyo kandoi ru bansa' ru Mirari giu' ra Kim ru Tuhan. Musiti' nilo baalon ngaangai' kandoi raginio ra tainuin ri Itamar anak ri Imam Arun.

Inuntob bansa' ru Liwi

^34-48 Nanguntob i Musa, i Arun am tingganai-tingganai ru Israil ra talu bansa' ru Liwi, iono bansa' ru Kigat, Girson am Mirari, sumugut ra susuban ru Tuhan risilo. Inuntob nilo bansa' raginilo sumugut ra bansa' am sasambaloi ru sigagama'. Naparijisto ilo niayuk ra ngaangai' ungkuyon ondo' umur no intor ra 30 am 50 ngambilor, ondo' maaya' mangandoi giu' ralalom Kim ru Tuhan. Suang nilo koson ragitio: Bansa' Suang ru Ulun Kigat 2,750 Girson 2,630 Mirari 3,200 Suang: 8,580

Bansa' Suang ru Ulun

⁴⁹ Ginio noyo ra inaru' moonong ulun ra kandoi nano ondo' kia mangandoi kapoam magibit ra kuliamos-kuliamos, sumugut ra susuban ru Tuhan ondo' pinabala' galing ri Musa; am moonong ulun narijisto sumugut ra susuban ru Tuhan ri Musa.