UNTABAN 35 - Tanou Moonsoi Timugon

Bandar-bandar ra tayar ru ulun ru Liwi

¹ Giu' ra tana' marata' ru Moab, giu' ra kiing ru Sungoi Jordan, nantaluma' ra bandar Jiriko, indagu Tuhan ri Musa,

² “Balai' ulun ru Israil ra intor ra tana' ondo' maapu, musiti' ilo manaak ra ulun ru Liwi ra kukula' bandar koson ra intok ayanan am padang sakot ra liliut ru bandar.

³ Bandar-bandar no masauk ra longgom ru ulun ru Liwi, am mayan ilo ra giu' no. Padang-padang sakot no tayar ru bibiag tinambiag am ngaangai' bibiag ra bokon ondo' tinambiag nilo.

⁴ Padang-padang sakot no musiti' langka' no 450 ngamito mongoi ra ngaangai' tampilon, tukuon intor ra timbok ru bandar.

⁵ Intok ru ulun ru Liwi musiti' apat persegi, gayo no 900 ngamito ra moonong pisuk. Bandar no musiti' mokosoroi ra tatanga' ru intok raginio.

⁶ Akau musiti' manaak ra ulun ru Liwi ra onom bandar panindungan, maa' raginio amon ru mokoondo' osoi ondo' namatoi ra ulun ra kalo siningon, makapagiru' ulun no ra rondo' ra bandar raginio. Suai raginio, pataakin niayuk risilo 42 bandar,

⁷ saboi suang no 48 bandar, am pabayaan ra padang sakot no.

⁸ Suang ru bandar ondo' musiti' pataakin ra ulun ru Liwi aruon sumugut ra suang ru bandar am gayo ru wilayah ru moonong bansa' no.”

Bandar-bandar panindungan

⁹ Indagu Tuhan ri Musa

¹⁰ maa' raginio mambala' ra ulun ru Israil, “Paat ra akau lumaup ra Sungoi Jordan am mongoi ra tana' ru Kanaan,

¹¹ pilio' noyo kukula' bandar pangampinan, maa' raginio osoi ondo' namatoi ra ulun ra kalo siningon, makapagiru' ra bandar no.

¹² Giu' no maayag io intor ra pabukat ru ulun ondo' pinatoi, ondo' masaga' mansuli'. Sasangulun ondo' inuwan namatoi ra ulun, kalo maukuman ra matoi saboi bisaraan ulun no ra saang ru ulun masuang.

¹³ Pilio' noyo onom bandar panindungan,

¹⁴ talu tampilon ra sirangon ru Sungoi Jordan am talu poyo giu' ra tana' ru Kanaan.

¹⁵ Bandar-bandar no masauk ra bandar panindungan ra ulun ru Israil am ulun ru bansa' bokon ondo' magayan kapoam ondo' lumayun ra tana' no. Osoi ondo' namatoi noyo ra ulun ra kalo siningon, makapagiru' ra rondo' ra bandar panindungan no.

^16-18 Kaa' amon ru mamakai sasangulun no ra malarom, kapoam batu, kapoam tataun koson mamatoi ra ulun, makasala io am musiti' ukumin ra matoi.

¹⁹ Pabukat mamaar ru ulun ra minatoi no pinalansanan mapaugar ra ukuman matoi no. Paat ra pabukat raginio makatuum ra namatoi no, musiti' io mamatoi ra ulun no.

²⁰ Amon ru masisang sasangulun ra sangulun bokon am pinatoi io ra pinampasan io, kapoam pinobobol rorondo' riso,

²¹ kapoam linuntug io, ulun no mamatoi am musiti' ukumin ra matoi. Pabukat mamaar ru ulun minatoi no pinalansanan mapaugar ra ukuman matoi ra mamatoi no. Paat ra pabukat raginio makatuum ra mamatoi no, musiti' io mamatoi ra ulun no.

²² Kaa' amon ru kalo siningon, sasangulun namatoi ra ulun ondo' kalo kasisangin no, ondo' ru pinampasan io kapoam pinobobol rorondo' riso;

²³ kapoam amon ru sasangulun nopobobol ra batu ra kalo nagilong, am batu no namatoi ra sasangulun, kaa' sala' ka makaguang ulun no mamatoi, am ulun ra minatoi no pana sala' ka pantula' nano,

²⁴ am ralalom ru baal raginio, ulun masuang musiti' manaung ra ulun no, am kalo sumaung ra pabukat ru ulun ondo' minatoi no, ondo' masaga' mansuli'.

²⁵ Polosoon noyo ulun masuang manindung ra ulun inuwan no intor ra pabukat ondo' masaga' mansuli', am nagibit riso sumaguli' ra bandar panindungan, intok nano nagiru'. Musiti' io mayan ra giu' saboi matoi Tingganai Maayo Imam paat raginio.

²⁶ Amon ru nangiruan ulun no ra bandar panindungan, intok nagiruan nano,

²⁷ am amon ru natuum io am pinatoi ru pabukat ru ulun ondo' minatoi noyo, pinambalos raginio sala' ka pamatayan.

²⁸ Ulun ondo' inuwan no musiti' mayan ra ralalom bandar pangampinan saboi matoi Tingganai Maayo Imam, am io pana makauli' ra baloi nano.

²⁹ Aturan-aturan ragitio masauk ramuyun am papag mino ra ati ayuk intok mino.

³⁰ Sasangulun ondo' inuwan ra mamatoi, iowon makasala am ukumin ra matoi, amon ru baal raginio mainono' ru ruo ngaulun kapoam nasailan sasi'. Inono' ru sangulun kalo maukop ra tayar ru baal pamatayan.

³¹ Sangulun mamatoi musiti' ukumin ra matoi, am kalo makalabus intor ra ukuman no ra mambayar ra ruit.

³² Amon ru magiru' sasangulun ra rondo' ra bandar panindungan, pai' iowo' io manaak ra ruit maa' raginio makasaguli' io ra baloi nano ra kalo poyo matoi Tingganai Maayo Imam no.

³³ Baal raginio mapajamol ra tana' intok ayanan mino. Pamatayan mapajamol ra tana' mino, am kolondo' ralan ra bokon ondo' makapasau ra tana' no ondo' ayuk am kapatayan ru ulun mamatoi no galama'.

³⁴ Pai' jamali' tana' intok ayanan mino, sabap ra Aku noyo Tuhan, am mayan Aku ra tatanga' ru ulun ru Israil.”