UNTABAN 34 - Tanou Moonsoi Timugon

Balitan ru tana' raginio

¹ Nanaak Tuhan ri Musa

² ra susuban ragitilo tayar ru ulun ru Israil, “Paat ra akau mumpos ra pagun Kanaan ondo' pataakin Ku ramuyun, balitan ru tana' no koson ragitio.

³ Tampilon ra rabugus ru balitan no tumalimpuun intor ra tana' kaagisan Jin am mansisil ra balitan ru Idom. Tampilon ra sirangon ru balitan no tumalimpuun intor ra pompor ru rabugus ru Raat Matoi.

⁴ Intor ra giu' no balitan no lumikou mongoi ra rabugus mongoi ra Ginting Akrabim, am rayus mongoi ra tana' kaagisan Jin saboi ra Kadis-Barnia giu' ra rabugus. Balitan no pana lumikou mongoi ra kalasaan ralayo saboi ra Gajar-Adar am rayus ra Ajmon.

⁵ Giu' no balitan no lumikou mongoi ra limayak giu' ra balitan ru pagun ru Misir, am mapupusan giu' ra Raat Tanga'.

⁶ “Balitan tampilon ra kalasaan iono Raat Tanga'.

⁷ “Giu' ra ralayo, balitan no tumalimpuun intor ra Raat Tanga' am sumuku' ra Gunung Gor,

⁸ am intor ra giu' mongoi ra Ginting Gamat, am rayus mongoi ra Jidad

⁹ am mongoi ra Jipron, am mapupusan giu' ra Gajar-Inan.

¹⁰ “Giu' ra sirangon, balitan no tumalimpuun intor ra Gajar-Inan mongoi ra Sipam.

¹¹ Intor ra giu' no balitan no tumuun mongoi ra Ribla tampilon ra sirangon ru Ain, rayus mongoi ra bulur-bulur giu' ra nagas sirangon ru Tasik Galilia,

¹² am mongoi boo ra rabugus sisil ru Sungoi Jordan saboi ra Raat Matoi. Ginio noyo tana' mino am balitan ra libung no.”

¹³ Kopongo raginio nambala' i Musa ra ulun ru Israil, “Ginio noyo tana' ondo' apuon min ra magundi', tana' ondo' pataakin ru Tuhan ra bansa' ru Israil ondo' siam am maintanga'.

¹⁴ Bansa' ru Rubin, bansa' ru Gad, am sampiruo intor ra bansa' ru Manasi, nakaapu noyo ra tayar nilono, ondo' tinayar sumugut ra sasambaloi nilono.

¹⁵ Tana' tungkuson nilono intok no giu' ra sirangon ru Sungoi Jordan, nantaluma' ra bandar Jiriko.”

Tingganai-tingganai ondo' pinaguang mantayar ra tana'

¹⁶ Indagu Tuhan ri Musa,

¹⁷ “Imam Iliajar am i Josua anak ri Nun mantayar ra tana' ra ulun ru Israil.

¹⁸ Intor ra moonong bansa', pilio' noyo sangulun tingganai koson mangindangan risilo mantayar ra tana' no.”

^19-28 Gitilo noyo inggalan ru ulun ondo' pinili' ru Tuhan: Bansa' Tingganai Jiuda Kalib anak ri Jipuni Simion Samuil anak ri Amigud Binjamin Ilidad anak ri Kislon Dan Buki anak ru Jogli Manasi Ganil anak ri Ipod Ipraim Kimuil anak ri Siptan Jibulon Ilisapan anak ri Parna Isakar Paltiil anak ri Ajan Asyir Agigud anak ri Silomi Naptali Pidail anak ri Amigud

Bansa' Tingganai

²⁹ Ginilo noyo ngaangai' ulun ondo' inaru' ru Tuhan mantayar ra tana' tungkuson ra ulun ru Israil giu' ra tana' ru Kanaan.