UNTABAN 33 - Tanou Moonsoi Timugon

Pangkiralanan intor ra Misir mongoi ra Moab

¹ Kopongo ulun ru Israil nangiruan ra Misir, ralalom barisan sumugut ra bansa' ru sigagama' tiningganai ri Musa am i Arun, nangkim ilo ra kukula' intok.

² Nanusub Tuhan ri Musa nanulis ra inggalan ru moonong intok nangkiman nilo.

³ Nangiruan ulun ru Israil ra Misir paat ra orou koopor am limo ra sila' kasaa', nalupus songorou ra Paska ondo' kasaa'. Ralalom panindungan ru Tuhan, ulun ru Israil ra intopot toojo nangiruan ra bandar Ramisis liliwa' inilayan ru ulun ru Misir,

⁴ ondo' paat raginio tatanga' mompolobong ra anak ungkuyon katuaan nilo ondo' pinatoi ru Tuhan. Koson raginio noyo Tuhan nanulu' ra makakuasa' Io poyo intor ra tuhan-tuhan ru ulun ru Misir.

⁵ Minugar ulun ru Israil intor ra Ramisis am nangkim giu' ra Sukot.

⁶ Minugar ilo poyo am nangkim giu' ra Itam, kiing ru tana' kaagisan.

⁷ Intor ra giu' no, siminaguli' ilo ra Pi-Agirot, tampilon ra sirangon ru Baal-Jipon, am nangkim maar ra Migdol.

⁸ Intor ra Pi-Agirot liminaup ilo ra Raat Galaga: am umpos ra tana' kaagisan Itam. Kopongo talu ngoorou pangkiralanan, nangkim ilo giu' ra Mara.

⁹ Intor ra giu' no minugar ilo am nangkim giu' ra Ilim; giu' no mokoondo' mopor am ruo taur ru timug am tulu' ngoopor ngampuun kurma.

¹⁰ Ilo pana nangiruan ra Ilim am nangkim maar ra Raat Galaga.

¹¹ Rayus no nangkim ilo giu' ra tana' kaagisan Sin.

¹² Kopongo raginio nangkim ilo giu' ra Dopka,

¹³ am giu' ra Alus,

¹⁴ am giu' boo ra Rapidim, kaa' giu' no kolondo' timug inumon.

^15-37 Ralalom pangkiralanan nilo intor ra Rapidim mongoi ra Gunung Gor, nangkim ilo ra intok ragitilo: Tana' kaagisan Sinai, Kibrot-Taawa (kapoam “Kalabangan ru Moroot”), Gajirot, Ritma, Rimon-Piris, Libna, Risa, Kigilata, Gunung Syapir, Garada, Makgilot, Tagat, Tara, Mitka, Gasmona, Mosirot, Bini-Jaakan, Or-Gidgad, Jotbata, Abrona, Ijion-Gibir, tana' kaagisan Jin (iono Kadis), am Gunung Gor giu' ra balitan ru tana' Idom.

^38-39 Nagaloi Imam Arun ra Gunung Gor sumugut ra susuban ru Tuhan. Giu' no minatoi i Arun ra umur nano 123 ngambilor, paat ra orou kasaa' ra sila' kalimo, bilor ra kaapat ngoopor kalupus ulun ru Israil nangiruan ra Misir.

⁴⁰ Liliwa' raginio raja' ru pagun Arad, giu' ra Tana' Nigib, tampilon rabugus ru Kanaan nakaapu ra tanou ra ulun ru Israil tatanga' matong ra pagun no.

^41-49 Gitilo noyo intok nangkiman ru ulun ru Israil ralalom pangkiralanan intor ra Gunung Gor saboi ra tana' marata' ru Moab: Jalmona, Punon, Obot, nangatuyas ru Abarim giu' ra Moab, Dibon-Gad, Almon-Diblataim, Kagunungan Abarim mamaar ra Gunung Nibo am giu' ra tana' marata' ru Moab ra kiing ru Sungoi Jordan, nantaluma' ra bandar Jiriko, lolot ru Bit-Jisimot am Limayak Sitim.

Panuluan-panuluan ra kalo poyo lumaup ra Sungoi Jordan

⁵⁰ Giu' ra tana' marata' ru Moab, kiing ru Sungoi Jordan, nantaluma' ra bandar Jiriko, nanaak Tuhan ri Musa

⁵¹ ra panuluan-panuluan ragitio ra tayar ru ulun ru Israil, “Paat ra akau lumaup ra Sungoi Jordan am mongoi ra tana' ru Kanaan,

⁵² pagiruo' noyo ngaangai' mamagun ru tana' no. Pusoon noyo ngaangai' sinungkalalaing nilo ondo' binaal intor ra batu am basi'; pusoon noyo intok-intok sambayangan nilo.

⁵³ Ayani' noyo tana' no am ayan noyo ra giu' sabap ra taakin Ku ginio ramuyun.

⁵⁴ Mopongo raginio tayaro' noyo tana' no ra bansa'-bansa' mino ra magundi': tayar ondo' maayo taakin ra bansa' ondo' maayo, am tayar ondo' boborok taakin ra bansa' ondo' boborok.

⁵⁵ Kaa' amon ru kalo pagiruon min mamagun ru tana' raginio, ulun ondo' minayan ra giu' no mantipagon ramuyun koson ra tipolon ralalom ru mato mino am ruui ra tiagang mino. Ilo pana manggal ramuyun.

⁵⁶ Amon ru kalo pagiruon min ilo, pusoon Ku akau koson ondo' inatang Kuno risilo.”