UNTABAN 31 - Tanou Moonsoi Timugon

Pangayawan pambalos ra ulun ru Midian

¹ Indagu Tuhan ri Musa,

² “Balasi' noyo kalaatan ru ulun ru Midian ra ulun ru Israil. Mopongo raginio matoi kou.”

³ I Musa pana mindagu ra ulun ru Israil, “Tampos noyo ra mangayou. Bulunsaron ulun ru Midian am balasi' noyo kalaatan nilo ra Tuhan.

⁴ Moonong bansa' ru Israil musiti' mangator ra saribu ngaulun saujor koson mongoi pangayou.”

⁵ Saribu ngaulun boo pinili' intor ra moonong bansa' ru Israil, saboi ulun ondo' nakatampos mangayou ra suang no 12,000 ngaulun.

⁶ Nanusub i Musa risilo mongoi pangayou mababaya' ri Pinigas anak ri Imam Iliajar. Nagibit i Pinigas ra kuliamos intor ra Kim ru Tuhan am bujung-bujung koson mangani' ra pulanu.

⁷ Namulunsar ulun ru Israil ra ulun ru Midian, koson ra nanusuban ru Tuhan ri Musa. Namatoi ilo ra ngaangai' ungkuyon ru Midian,

⁸ nakaaya' limo ngaulun raja' ru Midian: I Iwi, i Rikim, i Jur, i Gur am i Riba. Namatoi ilo niayuk ri Biliam anak ri Bior.

⁹ Namparakop ulun ru Israil ra ngaangai' ruandu' am anak ru ulun ru Midian, nampagaau ra tinambiag ra sapi' am domba, am niayuk ngaangai' kalangkayaan ru ulun Midian.

¹⁰ Nonolob ilo niayuk ra bandar-bandar am pangkiman-pangkiman ru ulun ru Midian.

¹¹ Ulun ru Israil pana nangalap ra ngaangai' kuliamos ginaau no, nakaaya' ulun rinakop am bibiag tinambiag.

¹² Inibit nilo ngaangai' no ri Musa, ri Iliajar am ulun ru Israil ondo' tatanga' nangkim giu' ra tana' marata' Moab, giu' ra sandaup ru Sungoi Jordan, nantaluma' ra bandar Jiriko.

Siminaguli' saujor ru Israil

¹³ Kopongo raginio i Musa, Imam Iliajar am ngaangai' tingganai ru ulun ru Israil miningkual ra pangkiman koson manguma' ra saujor ru Israil.

¹⁴ Siminangit i Musa ra tingganai-tingganai ru saujor am komandan ru pulalai no ondo' bagu minuli' intor ra pangayawan.

¹⁵ Nangkuot io risilo, “Kua kalo pinatoi min ngaangai' ruandu' ti?

¹⁶ Karaa' noyo ra ruandu' noyo ondo' minaya' ra bilin ri Biliam saboi nangkinibit ra ulun ru Israil kalo giminagaya' ra Tuhan giu' ra Pior. Baal raginio noyo naparatong ra maruol tumapik ra ulun ru Tuhan.

¹⁷ Raino potoyo' noyo ngaangai' lalaing ungkuyon am ngaangai' ruandu' ondo' kalo boo ralaa,

¹⁸ kaa' alapo' noyo ngaangai' ralaa am ruandu' ondo' lakat poyo ralaa kaga' ra tayar min galama'.

¹⁹ Ngaangai' ulun ra popolos min ondo' namatoi noyo ra ulun, kapoam ondo' nangambong noyo ra baangkai moonsoi mayan ra liwar ru pangkiman buoi katuluan. Paat ra orou ra katalu am orou ra katulu', akau musiti' mambaal ra upacara pamasawan ra inan mabaya' ra ngaangai' ruandu' ondo' rinakop min noyo.

²⁰ Kapasawo' niayuk ngaangai' bayang am atan ayuk ondo' binaal intor ra kungkung, bulu kambing kapoam tataun.”

²¹ Indagu Imam Iliajar risilo ondo' bagu minuli' intor ra pangayawan, “Gitio noyo aturan-aturan ondo' tinaakan ru Tuhan ri Musa.

^22-23 Ngaangai' ondo' kalo mosolob ru apui, koson ra mas, pirok, gangsa', basi', timah, mapulak kapoam timah maitom musiti' kapasawon ra pasailon ra ralalom ru apui. Ngaangai' kuliamos ra bokon ondo' mosolob ru apui musiti' kapasawon ra timug ru upacara pamasawan.

²⁴ Paat ra orou ra katulu', akau musiti' mampupu' ra bayang. Bagu no kalo majamol kau, am makaumpos kau ralalom ru pangkiman.”

Pantayaran ra kuliamos ginaau

²⁵ Indagu Tuhan ri Musa,

²⁶ “Okou, Imam Iliajar am tingganai-tingganai ru Israil ra bokon, musiti' manguntob ra kuliamos ginaau, makaaya' niayuk ulun rinakop am bibiag tinambiag.

²⁷ Tayaro' noyo kuliamos ginaau no ra ruo ngantayaran ondo' nogondo' suang no. Santayaran ra saujor-saujor ondo' mangayou am santayaran poyo ra ulun ru Israil ra bokon.

²⁸ Intor ra tayar ondo' tinaakan ra saujor, alapo' noyo sangulun rinakop intor ra moonong 500 ngaulun rinakop, am pataako' noyo ilo Raki', Tuhan, koson ra taak indangan ra luntukon. Baalo' koson raginio niayuk ra sapi', kaladai, domba am kambing.

²⁹ Pataako' noyo ngaangai' no ra Imam Iliajar koson ra taak indangan ra luntukon Raki' Tuhan.

³⁰ Intor ra tayar ondo' pinataak ra ulun ru Israil ra bokon, alapo' sangulun rinakop intor ra moonong 50 ngaulun rinakop. Koson niayuk ra sapi', kaladai, domba am kambing. Pataako' noyo ngaangai' no ra ulun ru Liwi ondo' manalingapu ra Kim Kuno.”

³¹ Binaal ri Musa am i Iliajar atan ondo' nanusuban ru Tuhan.

^32-35 Gitilo noyo ondo' ginaau ru saujor-saujor no, suai ra ginaau ondo' binulian nilo galama': domba am kambing 675,000 ngainan, sapi' 72,000 ngainan, kaladai 61,000 ngainan am ralaa kaga' 32,000 ngaulun.

^36-40 Sampiruo intor ra suang raginio pinataak ra saujor-saujor no ra suang ragitilo: domba am kambing 337,500 ngainan am intor ra suang raginio ondo' inalap koson taak indangan luntukon ra Tuhan iono 675 ngainan; sapi' 36,000 ngainan, am intor ra suang raginio 72 ngainan koson ra taak indangan luntukon ra Tuhan; kaladai 30,500 ngainan, am intor ra suang raginio 61 ngainan inalap koson ra taak indangan luntukon ra Tuhan; ralaa kaga' 16,000 ngaulun, am intor ra suang raginio 32 ngaulun inalap ra taak indangan luntukon ra Tuhan.

⁴¹ Ginio ra nangani' i Musa ra taak indangan luntukon no ri Iliajar koson ra taak ra Tuhan, koson ra nanusuban ru Tuhan.

^42-46 Tayar ru ulun ru Israil ra bokon nogondo' suang no ra tayar ru saujor: domba am kambing 337,500 ngainan, sapi' 36,000 ngainan, kaladai 30,500 ngainan am ralaa kaga' 16,000 ngaulun.

⁴⁷ Intor ra tayar ragitio, nangalap i Musa rondo' intor ra moonong 50 ngaulun rinakop am bibiag tinambiag, am pinataak ngaangai' no ra ulun ru Liwi ondo' nangandoi ra Kim ru Tuhan, koson ra nanusuban ru Tuhan.

⁴⁸ Kopongo raginio tingganai-tingganai ondo' naningganai ra pulalai ru saujor no

⁴⁹ minuma' ri Musa am indagu, “Inuntob mai noyo ngaangai' saujor ondo' tiningganai maino am kolondo' sangulun pana natatak.

⁵⁰ Ginio ra nagibit akai ra kuliamos limpor ru mas, golong kalindu', golong kalayam, sinsing, anting-anting am sisigot ondo' sigagama' mai nangalap. Raino pataakon mai ngaangai' ti ra Tuhan koson ra taak mai, maa' raginio magulayun io manindung ramon.”

⁵¹ Inapu ri Musa am i Iliajar mas no, ondo' ngaangai' no kuliamos limpor.

⁵² Taak ru tingganai-tingganai ru saujor no maar 200 ngakilogram bagat no.

⁵³ Saujor ra bokon ondo' sala' ka tingganai nambuli ra kuliamos ginaau ra tayar ru sigagama'.

⁵⁴ Kopongo raginio inibit ri Musa am i Iliajar mas no ralalom Kim ru Tuhan, maa' raginio manindung Tuhan ra ulun ru Israil.