UNTABAN 30 - Tanou Moonsoi Timugon

Aturan intor ra nazar

¹ Nanaak i Musa ra aturan ragitio ra tingganai-tingganai ru bansa'-bansa' ru Israil.

² Paat ra sangulun ungkuyon mokogogoton koson manaak ra rorondo' ra Tuhan kapoam magibot ra kalo mambaal ra rorondo' baal, kalo makalungkang io ra bantu' nano. Musiti' io mambaal ra ngaangai' ondo' rinagu nano.

³ Paat ra sangulun ralaa ondo' lakat poyo minayan ra ama' nano mokoondo' ra nazar koson manaak rorondo' ra Tuhan, kapoam mambantu' ra kalo mambaal ra rorondo' baal,

⁴ musiti' io manugut ra ngaangai' nazar kapoam bantu' nano, ondo' ayuk am manginggalar ama' nano riso paat ra ama' nano mokorongog ra baal raginio.

⁵ Kaa' amon ru ama' ru ralaa no nokorongog ra baal raginio, am kalo mangiou raginio, ralaa no pana kalo boo panuguton ra nazar nano. Mangampun Tuhan no riso sabap ra kalo mangiou ama' nano riso manugut ra nazar nano.

^6-7 Amon ru sangulun ruandu' kolondo' ralaki no mokoondo' ra nazar, ru karaan galing kapoam kalo, kapoam nambantu' io kalo mambaal ra rorondo' baal, nabangkil io ru nazar kapoam bantu' nano. Amon ru paat ra orou tauli no mangindalaki ruandu' no, musiti' io manugut ra ngaangai' nazar kapoam bantu' nano, ondo' ayuk am manginggalar ralaki nano paat ra nokorongog ra baal raginio.

⁸ Kaa' amon ru nokorongog ralaki nano ra baal raginio am kalo mangiou raginio, ruandu' no kalo boo panuguton ra nazar nano. Mangampun Tuhan no riso.

⁹ Paat ra sangulun napuor kapoam sangulun ruandu' ondo' inali noyo mokoondo' ra nazar kapoam nambantu' ra kalo mambaal ra rorondo' baal, nabangkil io ra nazar kapoam bantu' nano, am musiti' io manugut raginio.

¹⁰ Amon ru sangulun ruandu' ondo' nangindalaki noyo mokoondo' ra nazar kapoam nambantu' ra kalo mambaal ra rorondo' baal,

¹¹ musiti' io manugut ra ngaangai' nazar kapoam bantu' nano, amon ru ralaki nano kalo manginggalar paat ra io nokorongog ra baal raginio.

¹² Kaa' amon ru ralaki nano manginggalar riso manugut ra nazar nano paat nokorongog ra baal raginio, ruandu' no kalo boo panuguton ra nazar nano. Ralaki nano nanginggalar riso, am mangampun Tuhan ra ruandu' no.

¹³ Makakuasa' ralaki nano mangiou kapoam manulang ra nazar kapoam bantu' ra atan ayuk ondo' binaal ru andu' nano.

¹⁴ Kaa' amon ru ralaki nano nokorongog ra baal raginio, am kalo manginggalar ra andu' nano paat raginio, andu' nano musiti' manugut ra ngaangai' nazar kapoam bantu' nano. Ralaki nano nangiou noyo ra nazar kapoam bantu' ru andu' nano, sabap ra kalo nanginggalar ra andu' nano paat ra orou io nokorongog ra baal raginio.

¹⁵ Kaa' amon ru nasulang ru ralaki no nazar kapoam bantu' ru andu' nano paat ra orou tauli, ralaki no musiti' mansaan ra kinibit ru kasulangan ru nazar no.

¹⁶ Gitio noyo aturan-aturan ondo' tinaakan ru Tuhan ri Musa intor ra nazar ondo' baalon ru sangulun ruandu' ondo' nangindalaki noyo kapoam ru sangulun ralaa ondo' lakat poyo minayan ra ama' nano.