UNTABAN 3 - Tanou Moonsoi Timugon

Anak-anak ri Arun

¹ Gitio noyo sasambaloi ri Arun am i Musa paat Tuhan minindagu ri Musa giu' ra rasawat ru Gunung Sinai.

² Mokoondo' i Arun ra apat ngaulun anak ungkuyon: i Nadab, anak ra katuaan, am malupus raginio i Abigu, i Iliajar am i Itamar.

³ Patimpokon ilo ra imam ra upacara papasasaran ra umau ra rasawat ru ulu.

⁴ Kaa' minatoi i Nadab am i Abigu giu' ra Tana' kaagisan Sinai paat ilo napataak ra apui ondo' kalo iniou ru Tuhan. Ilo ruo no kolondo' anak. Buoi boo ru bayag ri Arun, nangandoi i Iliajar am i Itamar ra imam.

Ulun ru Liwi pinasauk ra ulun mangindangan ra imam

⁵ Indagu Tuhan ri Musa,

⁶ “Susubo' bansa' ru Liwi matong ra saang, am saukon ilo ra mangindangan ri Arun, imam no.

⁷ Mangandoi ilo ra Kim Kuno, am mapaugar ra kandoi ra tayar ru imam-imam am niayuk ra ngaangai' ulun ru Israil.

⁸ Pinaalungan risilo ngaangai' kuliamos ru Kim Kuno am mapaugar ra kandoi ra tayar ru ngaangai' ulun ru Israil.

⁹ Rorondo' kandoi ru ulun ru Liwi iono mangindangan ri Arun am papag nano.

¹⁰ Saukon noyo i Arun am anak-anak nano mapaugar ra kandoi ru imam. Ulun ra bokon ondo' kuminam mapaugar ra kandoi ru imam musiti' ukumin ra matoi.”

¹¹ Indagu Tuhan ri Musa,

^12-13 “Raino ulun ru Liwi masauk ra Aku tatangan. Paat ra Aku namatoi ra ngaangai' anak ungkuyon katuaan ru ulun ru Misir, patimpokon Kuno noyo ngaangai' anak ungkuyon katuaan sasambaloi ru Israil masauk ra Aku galama' tatangan, am niayuk moonong anak ungkuyon katuaan ru bibiag tinambiag. Kaa' raino alapon Ku ulun ru Liwi masauk ra Aku tatangan koson suali ra ngaangai' anak ungkuyon katuaan ru Israil; ulun ru Liwi masauk ra Aku tatangan. Aku noyo Tuhan.”

Inuntob ulun ru Liwi

¹⁴ Giu' ra Tana' kaagisan Sinai, nanaak Tuhan ri Musa ra susuban

¹⁵ koson maparijisto ra ulun ru Liwi sumugut ra bansa' am sasambaloi ru sigagama'; inggalan ru moonong anak ungkuyon ondo' umur sansila' am nakasail musiti' parijistoon.

¹⁶ Binaal ri Musa susuban no.

^17-20 Mokoondo' i Liwi ra talu ngaulun anak ungkuyon: i Girson, i Kigat am i Mirari. Ilo noyo kinamatuaan ru ngaangai' bansa' ondo' sabiton ra inggalan nilo. Mokoondo' i Girson ra ruo ngaulun anak ungkuyon, i Libni am i Simii. Mokoondo' i Kigat ra apat ngaulun anak ungkuyon: i Amram, i Jijgar, i Gibron am i Ujiil. Mokoondo' i Mirari ra ruo ngaulun anak ungkuyon, i Magli am i Musi. Ilo noyo kinamatuaan ru ngaangai' sasambaloi ondo' sabiton ra inggalan nilo.

²¹ Bansa' ru Girson intor ra sasambaloi ri Libni am sasambaloi ri Simii.

²² Ungkuyon nilo ondo' umur sansila' am nakasail ondo' narijisto, suang no 7,500 ngaulun.

²³ Bansa' ragitio musiti' mangkim tampilon ra kalasaan, tinaulian ru Kim ru Tuhan.

²⁴ Tingganai ru bansa' ragitio iono i Ilyasap anak ri Lail.

²⁵ Pinaalungan risilo Kim ru Tuhan am angob no, tabir ru kulobon

²⁶ am tabir ru liliut ondo' libung ra Kim ru Tuhan am altar, am tabir ru kulobon ra liliut. Pinaalungan risilo ngaangai' kandoi ondo' makakulawit ra kuliamos-kuliamos raginio.

²⁷ Bansa' ru Kigat intor ra sasambaloi ri Amram, i Jijgar, i Gibron am i Ujiil.

²⁸ Ungkuyon nilo ondo' umur sansila' am nakasail ondo' narijisto, suang no 8,600 ngaulun.

²⁹ Bansa' ragitio musiti' mangkim tampilon ra rabugus ru Kim ru Tuhan.

³⁰ Tingganai nilo iono i Ilisapan anak ri Ujiil.

³¹ Magalung ilo ra Kaban Nabantuan, mija', tampakan ra lampung, altar-altar, kuliamos-kuliamos pakayon ru imam giu' ra Lamin Matulai am tabir ru kulobon ru Lamin Matulai Kaga'. Magalung ilo ra ngaangai' kandoi ondo' makakulawit ra kuliamos-kuliamos raginio.

³² Tingganai ru ulun ru Liwi iono i Iliajar anak ri imam Arun. Magalung i Iliajar ra ulun ondo' mapaugar ra kandoi giu' ra Lamin Matulai.

³³ Bansa' ru Mirari intor ra sasambaloi ri Magli am sasambaloi ri Musi.

³⁴ Ungkuyon nilo ondo' umur sansila' am nakasail ondo' narijisto, suang no 6,200 ngaulun.

³⁵ Bansa' ragitio musiti' mangkim ra tampilon ralayo ru Kim ru Tuhan. Tingganai nilo iono i Juriil anak ri Abiail.

³⁶ Magalung ilo ra rangka ru Kim ru Tuhan, tataun bandayan, lugu', antulan am kuliamos pinaruang. Magalung ilo niayuk ra ngaangai' kandoi ondo' makakulawit ra kuliamos-kuliamos raginio,

³⁷ am niayuk lugu', antulan, popok am tali tayar ru liliut ra liwar.

³⁸ I Musa, i Arun am anak-anak nano musiti' mangkim ra saang ru Kim ru Tuhan, tampilon ra sirangon. Mapaugar ilo ra sambayang giu' ralalom ru Lamin Matulai tayar ru ulun ru Israil. Ulun ra bokon ondo' kuminam mapaugar ra kandoi raginio musiti' ukumin ra matoi.

³⁹ Ngaangai' ungkuyon intor ra bansa' ru Liwi ondo' umur sansila' am nakasail, suang no 22,000 ngaulun. Pinarijisto ilo ri Musa sumugut ra bansa' ru sigagama', koson ra nanusuban ru Tuhan.

Nasauk ulun ru Liwi ra suali ru anak ungkuyon katuaan ru Israil

^40-41 Indagu Tuhan ri Musa, “Ngaangai' anak ungkuyon ru Israil Aku tatangan. Ginio ra parijistoo' inggalan ru moonong anak ungkuyon katuaan ru Israil ondo' umur sansila' am nakasail. Kaa' koson suali nilo, mangalap Aku ra ngaangai' ulun ru Liwi ra Aku tatangan. Aku noyo Tuhan. Mangalap Aku niayuk ra bibiag tinambiag ru ulun ru Liwi koson suali ru ngaangai' anak katuaan ru bibiag tinambiag ru ulun ru Israil.”

⁴² Binaal ri Musa susuban no am naparijisto ra ngaangai' anak ungkuyon katuaan

⁴³ ondo' umur sansila' am nakasail; suang ru ngaangai' no 22,273 ngaulun.

⁴⁴ Indagu Tuhan ri Musa,

⁴⁵ “Raino patimpokon ulun ru Liwi masauk ra Aku tatangan koson suali ru ngaangai' anak ungkuyon ru bibiag tinambiag ru ulun ru Israil.

⁴⁶ Ginio sabap ra suang ru anak ungkuyon katuaan ru ulun ru Liwi suang no 273 ngaulun, am ondo' sonsol no musiti' pulion min.

⁴⁷ Bayari' limo ngampila' ruit pirok ra moonong ulun, sumugut ra logo ondo' inaru' noyo giu' ra Kim Kuno.

⁴⁸ Pataako' noyo ruit no ri Arun am anak-anak nano.”

⁴⁹ Binaal ri Musa susuban no, am nangalap

⁵⁰ suang 1,365 ngampila' ruit pirok,

⁵¹ am pataako' ngaangai' no ri Arun am anak-anak nano.