UNTABAN 28 - Tanou Moonsoi Timugon

Taak-taak ra ondo' inaru'

¹ Nanusub Tuhan ri Musa

² mapasaboi ra susuban ti ra ulun ru Israil. Paat ra ondo' inaru', musiti' ilo mapataak ra taak akanon ondo' owou no mapabansuk ra guang ru Tuhan.

³ Gitio noyo taak akanon ondo' musiti' pataakon ra Tuhan ra moonong orou: Tayar ru taak simbalui koson mapabansuk ra guang ru Tuhan, ruo ngainan domba gawayan ondo' umur no sambilor am kalo najamaran.

⁴ Pataako' sanginan anak domba tampilon ra susuab ti am sanginan poyo tampilon ra mai' ti;

⁵ moonong taak simbalui no musiti' pabayaan ra sakilogram tapung moonsoi kaga' latakin ra salito umau jaitun ondo' moonsoi kaga'.

⁶ Gitio noyo taak simbalui moonong orou ondo' solobon ngaangai' no, ondo' kasaa' pinataak giu' ra Gunung Sinai, tayar ru taak akanon; owou no mapabansuk ra guang ru Tuhan.

⁷ Pabayaan ra anak domba no musiti' pataakon niayuk salito wain koson taak simbalui pasasaron, ondo' pasasaron ra rasawat ru altar.

⁸ Anak domba tayar ru taak simbalui tampilon ra mai' ti, pabayaan ra taak simbalui wain musiti' pataakon ra ralan nogondo' koson ra taak simbalui tampilon ra susuab ti. Taak simbalui ti iono taak akanon ondo' owou no mapabansuk ra guang ru Tuhan.

Taak paat ra Orou Sabat

⁹ Paat ra orou Sabat, pataako' ruo ngainan domba gawayan ondo' umur no sambilor am kalo najamaran, pabayaan ra ruo ngakilogram tapung moonsoi kaga' latakin ra umau jaitun tayar ru taak simbalui koson paringkuanangan am niayuk taak simbalui wain.

¹⁰ Taak simbalui koson mapabansuk ra guang ru Tuhan musiti' pataakon paat ra moonong orou Sabat koson paruangon ra taak simbalui moonong orou pabayaan ra taak simbalui wain.

Taak paat ra orou kasaa' ra moonong sila'

¹¹ Papataak noyo ra taak simbalui koson mapabansuk ra guang ru Tuhan paat ra orou kasaa' ra moonong sila', ondo' ginio ruo ngainan sapi' gawayan mamulok, sanginan domba gawayan, tulu' ngainan anak domba gawayan ondo' umur no sambilor am kalo najamaran.

¹² Koson ra taak simbalui koson paringkuanangan, pataako' noyo tapung moonsoi kaga' naratok ra umau jaitun: talu ngakilogram tapung moonsoi kaga' ra tayar ru moonong sanginan sapi' gawayan; ruo ngakilogram tapung moonsoi kaga' ra tayar ru domba gawayan,

¹³ am sakilogram tapung moonsoi kaga' ra tayar ru moonong anak domba. Taak-taak simbalui raginio koson mapabansuk ra guang ru Tuhan iono taak akanon, ondo' owou no mapabansuk ra guang ru Tuhan.

¹⁴ Mabaya' ra taak simbalui no musiti' pataakon niayuk taak simbalui wain, suang no ruo ngalito ra tayar ru moonong sapi' gawayan, salito am maintanga' ra tayar ru moonong sanginan domba gawayan, am salito tayar ru moonong sanginan anak domba. Ginio noyo aturan intor ra taak simbalui koson mapabansuk ra guang ru Tuhan, ondo' moonsoi pataakon paat ra orou kasaa' ra moonong sila' ralalom sambilor.

¹⁵ Liliwa' taak simbalui ra moonong orou pabayaan ra taak simbalui wain, pataako' niayuk sanginan kambing gawayan ra tayar ru taak simbalui mangampun ra tula.

Taak paat ra pangiantakan ra ruti' kalo latakin ra ragi

¹⁶ Pangiantakan Paska ra tayar mangurumat ra Tuhan musiti' paugaron paat ra orou koopor am apat ra sila' kasaa'.

¹⁷ Paat ra orou koopor am limo ra sila' raginio, pangiantakan ru ugama patalimpuunon am paugaron buoi tulu' ngoorou. Paat raginio ruti' kalo latakin ra ragi ayuk maakan.

¹⁸ Paat ra orou kasaa' ru pangiantakan no, akau musiti' tumimung am sumambayang; pai' pangandoi ra maagat.

¹⁹ Papataak noyo ra taak simbalui koson mapabansuk ra guang ru Tuhan, tayar ru taak akanon Riso: ruo ngainan sapi' gawayan mamulok, sanginan domba gawayan am tulu' ngainan anak domba gawayan ondo' umur no sambilor. Ngaangai' no kalo najamaran.

²⁰ Papataak ra taak simbalui koson paringkuanangan sumugut ra atan ondo' inaru', iono tapung latakin ra umau jaitun: tayar ru moonong sanginan sapi' gawayan papataak ra talu ngakilogram tapung, ruo ngakilogram ra tayar ru domba gawayan,

²¹ am sakilogram ra tayar ru moonong sanginan anak domba gawayan.

²² Papataak niayuk sanginan kambing gawayan ra tayar ru taak simbalui koson mangampun ra tula. Koon raginio noyo akau mambaal ra upacara pamasawan ra tayar ru ulun raginio.

²³ Ngaangai' ru taak simbalui no iono paruangon ra taak simbalui ondo' pataakon paat ra moonong susuab ti, iono taak simbalui koson mapabansuk ra guang ru Tuhan.

²⁴ Koon raginio niayuk, buoi tulu' ngoorou, akau musiti' mapataak ra taak simbalui koson mapabansuk ra guang ru Tuhan. Taak no paruangon ra taak simbalui koson mapabansuk ra guang ru Tuhan, pabayaan ra taak wain, ondo' pataakon ra moonong orou. Owou ru taak simbalui no mapabansuk ra guang ru Tuhan.

²⁵ Paat ra orou katulu', akau musiti' tumimung koson sumambayang; pai' pangandoi ra maagat.

Taak paat ra pangiantakan napangaan nangkumos

²⁶ Paat ra orou kasaa' ru Pangiantakan Napangaan Nangkumos, paat ra akau mapataak ra Tuhan ra gandum ondo' bagu, akau musiti' tumimung koson sumambayang; pai' pangandoi ra maagat.

²⁷ Papataak ra taak simbalui koson mapabansuk ra guang ru Tuhan, iono ruo ngainan sapi' gawayan mamulok, sanginan domba gawayan, am tulu' ngainan domba gawayan ondo' umur no sambilor. Ngaangai' no kalo najamaran. Owou ru taak simbalui no mapabansuk ra guang ru Tuhan.

²⁸ Papataak ra tayar ru taak simbalui koson paringkuanangan, ondo' ginio tapung latakin ra umau jaitun: talu ngakilogram ra tayar ru moonong sanginan sapi' gawayan, ruo ngakilogram ra tayar ru domba gawayan

²⁹ am sakilogram ra tayar ru moonong sanginan anak domba.

³⁰ Papataak niayuk ra sanginan kambing ra tayar ru taak simbalui koson mangampun ra tula. Koon raginio noyo akau mambaal ra upacara pamasawan ra tayar ru ulun ru Israil.

³¹ Ngaangai' ru taak no pabayaan ra taak simbalui wain iono paruangon ra taak simbalui koson mapabansuk ra guang ru Tuhan am taak simbalui koson paringkuanangan, ondo' pataakon ra moonong orou.