UNTABAN 25 - Tanou Moonsoi Timugon

Ulun ru Israil giu' ra Gunung Pior

¹ Paat ra ulun ru Israil nangkim giu' ra Limayak Sitim, bala ru ungkuyon nilono tumalimpuun makimarulug ra ruandu' ru Moab ondo' minayan ra giu' no.

² Nangkimait ruandu'-ruandu' no risilo minongoi ra bunsag-bunsag ru taak simbalui koson mangurumat ra tuhan nilono. Ulun ru Israil niayuk nangakan ra kual intor ra taak simbalui no am siminamba

³ ra tuhan ru ulun ru Moab. Sabap ra siminamba ilo ra Baal giu' ra Pior, siminangit Tuhan risilo

⁴ am indagu ri Musa, “Rokopo' ngaangai' tingganai ru ulun am potoyo' ilo paat ra matawang, sumugut ra susuban Kuno, maa' raginio kalo boo sumangit Aku ra ulun ragitio.”

⁵ Indagu i Musa ra tingganai-tingganai ru ulun ru Israil no, “Akau sigagama' musiti' mamatoi ra moonong ulun intor ra bansa' mino ondo' siminamba ra Baal giu' ra Pior.”

⁶ Paat ri Musa am ngaangai' ulun tatanga' manulaboi giu' ra kulobon ru Kim ru Tuhan, nakito nilo sangulun Israil nagibit ra sangulun ruandu' Midian minumpos ralalom ru kim nano.

⁷ Paat ri Pinigas anak ri Iliajar, iono akupu ri Imam Arun, nakakito raginio, bigor io am nangiruan ra pantimungan. Nangalap io rondo' tutura',

⁸ am nangilou ra ungkuyon am ruandu' no giu' ralalom ru kim; tinobok no karuruo no ra tutura'. Koon raginio noyo maruol tumapik ondo' tatanga' mamuso ra ulun ru Israil no timinaru'.

⁹ Kaa' ulun ondo' minatoi suang no 24,000 ngaulun noyo.

¹⁰ Indagu Tuhan ri Musa,

¹¹ “Pinigas anak ri Iliajar, akupu ri Imam Arun, napalinos noyo ra sangit Kuno ra Israil. Kalo nopoloso io ra Israil sumamba ra tuhan ra bokon ondo' ayuk am Aku, saboi sangit Kuno limininos am kalo mamuso Aku ra ulun raginio.

¹² I Pinigas pana balai' ra makimabantu' Aku riso ondo' masauk ra sabuoi-buoi no.

¹³ Sabap ra kalo pinoloso no Israil siminamba ra tuhan ra bokon, am naparatong io niayuk ra pangampunan ra tula ra tayar ru ulun raginio, io am papag nano masauk ra imam ra sabuoi-buoi no.”

¹⁴ Inggalan ru ulun ru Israil ondo' pinatoi nabaya' ra ruandu' Midian no iono i Jimri anak ri Salu; tingganai io ru rondo' sasambaloi ru bansa' ru Simion.

¹⁵ Inggalan ru ruandu' no iono i Kojbi. I Jur, ama' ru ruandu' no, iono tingganai ru santimungan bansa' ru ulun ru Midian.

¹⁶ Nanaak Tuhan ri Musa ra susuban ragitio,

¹⁷ “Bulunsaro' ulun ru Midian am patindukuo' noyo ilo,

¹⁸ sabap ra kalaatan ondo' binaal nilo ramuyun paat ra ilo namparuung ramuyun giu' ra Pior, am niayuk sabap i Kojbi ondo' pinatoi giu' ra Pior paat ra maruol tumapik nasauk.”