UNTABAN 23 - Tanou Moonsoi Timugon

¹ Indagu i Biliam ra Raja' Balak, “Baali' aku ra tulu' altar ragiti, am potomposo' tulu' ngainan sapi' gawayan am tulu' ngainan domba gawayan.”

² Sinugut ri Raja' Balak kitaak ri Biliam. Raja' Balak am i Biliam nampataak boo ra sanginan sapi' gawayan am sanginan domba gawayan giu' ra rasawat ru moonong altar.

³ Indagu boo i Biliam ra Raja' Balak, “Bigor ra sapapa' ru taak ondo' pataakon muno. Liliwa' raginio mongoi aku pagilong ru matong Tuhan no tumuum raki' kapoam kalo. Mambala' aku rirun ra ngaangai' no ondo' paraguon ru Tuhan raki'.” Ugar i Biliam sangulun giu' ra tampak ru rondo' bulur,

⁴ am timinuum i Aki Kapuuno' ri Biliam ra giu' no. Indagu i Biliam ri Aki Kapuuno', “Nambaal aku noyo ra tulu' altar am napataak ra sanginan sapi' gawayan am sanginan domba gawayan giu' ra rasawat ru moonong altar.”

⁵ Tuhan pana nambala' ri Biliam ra atan musiti' baalon nano, am nanusub riso sumaguli' ra Raja' Balak koson mapasaboi ra bilin ru Tuhan ra raja' no.

⁶ Pakasaguli' i Biliam, kakito no lakat poyo Raja' Balak minigor nabaya' ra ngaangai' tingganai ru Moab, giu' ra sapapa' ru taak-taak simbalui ondo' pinataak nano.

⁷ I Biliam pana mindagu ra ragu inala' ragitio, “Raja' Balak, manguasa' ru Moab nagibit noyo raki' intor ra Siria, intor ra kagunungan giu' ra sirangon. Kono, ‘Ibok no, indagu no ra tayar kuno, ulaso' noyo ulun ru Israil.’

⁸ Makapagulas aku kia ra atan ondo' kalo ulason ri Aki Kapuuno', kapoam mangukum ra atan ondo' kalo ukumin ru Tuhan?

⁹ Intor ra tampak ru gunung makito ku ilo, intor rasawat ru bulur magilong aku risilo. Ilo rondo' bansa' ondo' naayag nagirondo', nakapandai ilo, binarakat ilo nasailan intor ra bansa' ra bokon.

¹⁰ Papag ru Israil koson ra kaau kalo mauntob; masuang ilo kaga'. Gama' ru pupus ru bayag kuno koson ra pupus ru bayag ru sangulun ra ulun ri Aki Kapuuno'; Gama' ru matoi aku ra mamimio koson ra ulun mabanis guang.”

¹¹ Raja' Balak pana mindagu ri Biliam, “Atan kia binaal mu noyo raki'? Nagibit aku rirun ragiti koson magulas ra pantula' kuno, kaa' nambarakat kou risilo.”

¹² Taam i Biliam, “Maragu kuno ayuk atan ondo' sinusub ru Tuhan.”

Ragu inala' ri Biliam ra kainduo

¹³ Raja' Balak pana mindagu ri Biliam, “Ibok ongoi takau intok ra bokon. Giu' no makakito kou ra santayaran ayuk intor ra ulun ru Israil. Intor ra giu' no, ulaso' noyo ilo ra tayar kuno.”

¹⁴ Nagibit Raja' Balak ri Biliam giu' ra padang Jopim, giu' ra tampak ru Gunung Pisga. Giu' no nambaal niayuk Raja' Balak ra tulu' altar am napataak ra sanginan sapi' gawayan am sanginan domba gawayan giu' ra rasawat ru moonong altar.

¹⁵ Indagu i Biliam ra Raja' Balak, “Bigor noyo ra sapapa' ru taak ondo' pinataak muno, liliwa' mongoi aku tuum ra Tuhan ra giu' no.”

¹⁶ Timinuum Tuhan ri Biliam am nambala' riso ra atan musiti' raguon nano, am nanusub riso sumaguli' ra Raja' Balak koson mapasaboi ra ragu raginio riso.

¹⁷ Pakasaguli' i Biliam, ilai' no lakat poyo Raja' Balak no minigor nabaya' ra ngaangai' tingganai ru Moab, giu' ra sapapa' ru taak-taak simbalui ondo' pinataak nano. Nangkuot Raja' Balak ra ragu ru Tuhan,

¹⁸ am raguo' ri Biliam ragu inala' ragitio, “Okou Raja' Balak anak ri Jipor, rongogo' ragu kutu.

¹⁹ I Aki Kapuuno' sala' ka ulun, kalo magabau Io; I Aki Kapuuno' sala' ka ulun toojo, kalo mangulau Io ra pangkaraan. Atan ondo' binantu' Nano suguton No; atan ondo' rinagu Nano maaru' baalon No.

²⁰ Sinusub aku mambarakat; paat ri Aki Kapuuno' mambarakat, kalo masulang ku ginio.

²¹ Kolondo' kalaatan ra orou matong ru Israil, Kolondo' kapaganan ra orou matong nilo. Tuhan i Aki Kapuuno' nilo mabaya' risilo; Nangiou Israil Riso ra raja'.

²² Naningganai i Aki Kapuuno' risilo miningkual intor ra Misir, Nangayou i Aki Kapuuno' ra tayar nilo koson ra sapi' masigo.

²³ Kolondo' jampi kapoam ilimu' sihir ondo' makaanggal ra Israil. Mindagu ulun intor ra Israil, ‘Ilai' noyo binaal ri Aki Kapuuno' risilo!’

²⁴ Bansa' ru Israil koson ra singa' ondo' mapanggol, ondo' kalo mororo' saboi masaam ondo' akanon nano, am manginum ra raraa' ru inakan nano.”

²⁵ Indagu Raja' Balak ra raja' Biliam, “Sama' noyo, amon ru kalo masaga' kou magulas ra ulun ru Israil, pai' no pambarakat risilo!”

²⁶ Taam i Biliam, “Sala' ka kia binalaan tokou noyo ra musiti' aku mambaal ra atan ondo' sinusub ru Tuhan?”

Ragu inala' ri Biliam ra kaintalu

²⁷ Indagu Raja' Balak, “Ibok no, ongoi takau intok ra bokon. Maaru' lair giu' no, mangiou i Aki Kapuuno' rirun magulas ra ulun ru Israil ra tayar kuno.”

²⁸ Ginio ra nagibit Raja' Balak ri Biliam mongoi ra tampak ru Gunung Pior ondo' tumingkuang ra tana' kaagisan.

²⁹ Indagu i Biliam ra Raja' Balak, “Baali' aku ra tulu' altar ragiti, am ibito' noyo tulu' ngainan sapi' gawayan am tulu' ngainan domba gawayan.”

³⁰ Sinugut ru Raja' Balak kinitaak ri Biliam, am napataak ra sanginan sapi' gawayan am sanginan domba gawayan giu' ra rasawat ru moonong altar.