UNTABAN 21 - Tanou Moonsoi Timugon

Kamanangan ra ulun ru Kanaan

¹ Arad rondo' bandar tampilon rabugus ru tana' ru Kanaan. Paat ra raja' ru bandar no nokorongog ra ulun ru Israil matong mansail ra ralan Atarim, ongoi raja' no pamulunsar risilo am namparakop ra kukula' ngaulun.

² Ulun ru Israil pana mokoondo' ra nazar ra Tuhan. Indagu ilo, “Iou Tuhan, amon ru mangiou Kou ramon mangala ra mamagun ru pagun ragitio, luuson mai bandar-bandar nilo am niayuk mamagun ru bandar, koson ra tatandu' ru ngaangai' no Okou tatangan.”

³ Iniou ru Tuhan kitaakon ru ulun ru Israil, am nangindangan risilo nangala ra ulun ru Kanaan. Linuus ru ulun ru Israil ngaangai' ulun ru Kanaan am bandar-bandar nilo. Ininggalanan ru ulun ru Israil intok raginio ra Orma.

Kukuo intor ra gangsa'

⁴ Iruani' boo ru ulun ru Israil Gunung Gor am minaya' ra ralan sumuku' ra Teluk Akaba koson lumiput ra tana' Idom. Kaa' giu' ra tanga' ralan, kalo nokoorot ilo,

⁵ am nambubutok ri Aki Kapuuno' am ri Musa. Konilo, “Kua kia ibito' mu akai miningkual intor ra Misir koson matoi ra tana' kaagisan ti? Giti kolondo' akanon kapoam timug. Najala' akai ra akanon ondo' mapalo ti!”

⁶ Tuhan pana namparatong ra kukuo mangabisa' giu' ra tatanga' nilo am masuang ulun ru Israil minatoi tininduk ru kukuo-kukuo no.

⁷ Ratong ulun ru Israil ri Musa am indagu, “Makatula akai paat akai nambubutok ra Tuhan am okou. Pakiasi' no ra Tuhan maa' raginio kukuo-kukuo ti painggaluron intor ramon.” I Musa pana pakiasi' ra Tuhan ra tayar ru ulun no.

⁸ Kopongo raginio nanusub Tuhan ri Musa mambaal sanginan kukuo intor ra logam am patampakon ra rondo' lugu', maa' raginio osoi ondo' tindukon ru kukuo pailongon ra kukuo intor ra logam no, am mababas boo.

⁹ Nambaal boo i Musa ra sanginan kukuo intor ra gangsa' am patampako' ginio ra rondo' lugu'. Moonong ulun ondo' tininduk ru kukuo mababas amon ru magilong ra kukuo intor ra gangsa' no.

Intor ra Gunung Gor mongoi ra Limayak Moab

¹⁰ Naparayus ulun ru Israil ra pangkiralanan am nangkim giu' ra Obot.

¹¹ Intor ra Obot, minugar ilo poyo, am nangkim giu' ra nangatuyas Abarim giu' ra tana' kaagisan, ra tampilon sirangon ru tana' Moab.

¹² Ilo pana nangkim giu' ra Limayak Jirid.

¹³ Kopongo raginio minugar ilo poyo am nangkim giu' ra ralayo ru Sungoi Arnon, giu' ra tana' kaagisan ondo' malangka' saboi ra pagun ru ulun ru Amori. Sungoi Arnon iono balitan ru Moab am tana' ru ulun ru Amori.

¹⁴ Ginio sabap ra ralalom Kitab Pangayawan ru TUHAN mokoondo' tinulisan, “…Wagib giu' ra libung Supa am limayak-limayak nano; Sungoi Arnon

¹⁵ am pipilon ru limayak-limayak ondo' malangka' saboi ra bandar Ar am tampilon ra balitan ru tana' Moab.”

¹⁶ Intor ra giu' no minongoi ilo ra intok makainggalan ra Biir, ondo' makaarati' ra tulubong-tulubong. Giu' no minindagu Tuhan ri Musa, “Timungo' noyo ulun no; manaak Aku risilo ra timug.”

¹⁷ Paat raginio marimbai ulun ru Israil ra rimbai ragitio: “Akau tulubong, pabuluako' timug mino, mangkaang akai raginio ra rimbai.

¹⁸ Tulubong ondo' kinali ru panguasa'-panguasa' am ru tingganai-tingganai ru bansa'; kalion ra jujuga' ru raja', am ra jujuga' tatandu' ru kuasa' nilono.” Intor ra tana' kaagisan mongoi ilo ra Matana,

¹⁹ am intor ra giu' mongoi ilo ra Nagaliil, am intor ra Nagaliil mongoi ra Bamot,

²⁰ am intor ra Bamot mongoi ra limayak giu' ra tana' Moab, giu' ra ragana' ru tampak Gunung Pisga ondo' mongoi ra tampilon ra tana' kaagisan.

Nangala ra raja' Sigon am raja' Og

²¹ Ulun ru Israil pana nanusub ra ulun mongoi ra Raja' Sigon, manguasa' ra ulun ru Amori. Indagu ulun-ulun sinusub no,

²² “Iowo' akai noyo mansail ra pagun mutu. Akai am bibiag tinambiag maino kalo lumisang ra umo kapoam umo ru anggur muno. Kalo manginum akai ra timug intor ra tulubong muno. Maya' akai ra ralan maayo saboi ra akai makaingkual intor ra tana' muno.”

²³ Kaa' kalo nangiou Raja' Sigon ra ulun ru Israil mansail ra tana' nano. Timungo' ru Raja' Sigon saujor nano am ongoi ra Jagas koson mamulunsar ra ulun ru Israil giu' ra tana' kaagisan no.

²⁴ Kaa' ralalom pangayawan no namatoi ulun ru Israil ra masuang saujor Amori. Ginio ra ayan ulun ru Israil ra pagun nilono, intor ra Sungoi Arnon saboi ra Sungoi Jabok giu' ra ralayo, iono balitan ru intok ru ulun ru Amon, sabap ra saujor giu' ra balitan ru Amon no maikang kaga'.

²⁵ Koon raginio noyo ulun ru Israil nampagaau ra ngaangai' bandar ru ulun ru Amori, nakaaya' Gisybon am ngaangai' pekan ra libung no, am ilo pana pamagun ra giu' no.

²⁶ Gisybon iono pusor bandar ru Raja' Sigon, manguasa' ru pagun ru Amori. Nakaili' ilo nangala ra raja' Moab am minayan ra titikop ru tana' no saboi ra Sungoi Arnon.

²⁷ Ginio sabap ra ulun-ulun magilupot no nagilupot koson ragitio, “Ratong no ra Gisybon, mongoi ra bandar ru Raja' Sigon. Matipagilong akai ra bandar ti patirongon am punaan.

²⁸ Igondo' kasaukan ra bandar ragitio, jiminalog saujor ru Raja' Sigon koson ra apui mamuso ra bandar Ar giu' ra Moab, am nonolon ra bulur-bulur giu' ra sisil ru Arnon.

²⁹ Akau ulun ru Moab, mapara' kia usung mino! Akau mongompor ri Kamos, maluus kau! Nopoloso Tuhan mino ra ungkuyon-ungkuyon nasauk ra ulun nagiru', am ruandu'-ruandu' nasauk ra ulun rinakop ru raja' Amori.

³⁰ Kaa' raino maluus papag nilono, giu' ra galur ru ralan intor ra Gisybon mongoi ra Dibon, intor ra Nasyim mongoi ra Nopa maar ra Midiba.”

³¹ Koson raginio noyo ulun ru Israil namagun ra tana' ru ulun ru Amori.

³² Nanusub i Musa ra ulun maguyum ra ralan ondo' moonsoi kaga' koson mamulunsar ra bandar Jaijir. Ginaau ru ulun ru Israil bandar no am niayuk pekan-pekan giu' ra libung no am napagiru' ra ulun ru Amori ondo' minayan ra giu' no.

³³ Ulun ru Israil pana liminikou am baya' ra ralan mongoi ra Basan. Kaa' Raja' Og intor ra Basan, minugar nababaya' ra saujor nano am namulunsar risilo giu' ra Idrii.

³⁴ Indagu Tuhan ri Musa, “Pai' kalaa' riso. Manaak Aku rirun ra kamanangan. Maala mu raja' raginio, ngaangai' mamagun nano, am mampagaau ra tana' am niayuk pagun raginio. Pamakuan ra raja' raginio koson ra pinamakuan muno ra Raja' Sigon, raja' Amori ondo' namarinta giu' ra Gisybon.”

³⁵ Ginio ra namatoi ulun ru Israil ra Raja' Og, anak-anak ungkuyon nano am ngaangai' mamagun nano. Kalo pinoloso nilo sangulun pana naayag. Ilo pana namagun ra tana' raginio.