UNTABAN 18 - Tanou Moonsoi Timugon

Kandoi toojo ru imam-imam am ulun-ulun ru Liwi

¹ Indagu Tuhan ri Arun, “Okou, anak-anak ungkuyon muno am ulun-ulun ru Liwi musiti' mansaan ra kinibit ru kasalaan ondo' nasauk, ondo' makakulawit ra kandoi giu' ra Kim Kuno. Kaa' okou am anak-anak ungkuyon muno ayuk ondo' mansaan ra kasalaan ondo' makakulawit ra kandoi ru imam.

² Susubo' pabukat-pabukat muno, iono bansa' ru Liwi, mangandoi mababaya' ramuyun am mangindangan ramuyun paat ra okou am anak-anak ungkuyon muno mangandoi giu' ra Kim Kuno.

³ Ulun ru Liwi musiti' mambaal ra kandoi toojo nilono ramuyun am mapaugar ra kandoi nilono giu' ra Kim Kuno, kaa' kalo makainggaar ra altar kapoam mangambong ra kuliamos-kuliamos matulai giu' ralalom ru Lamin Matulai. Amon ru manggal ilo ra aturan raginio, ilo am niayuk akau matoi.

⁴ Musiti' ilo mangandoi mababaya' ramuyun am mapaugar ra kandoi ondo' makakulawit ra ngaangai' kandoi giu' ra Kim Kuno, kaa' ulun ondo' kalo inanian ra kuasa' mambaal ra kandoi no inggalarin mangandoi mababaya' ramuyun.

⁵ Okou am anak-anak ungkuyon muno ayuk pambaalon ra kandoi giu' ra Lamin Matulai am giu' ra altar, maa' raginio kalo sumangit Aku ra ulun ru Israil.

⁶ Sotopot no, Aku noyo nampili' ra pabukat-pabukat muno ulun ru Liwi ra gino ngai' ru ulun ru Israil, maa' raginio masauk ilo ra taak rirun. Patimpokon ilo noyo Raki' maa' raginio makapambaal ilo ra kandoi giu' ra Kim Kuno.

⁷ Kaa' okou am anak-anak ungkuyon muno ayuk pambaalon ra ngaangai' kandoi toojo ru imam ondo' makakulawit ra altar am atan pana ondo' giu' ralalom ru Lamin Matulai Kaga'. Ngaangai' baal raginio pinakandayan rirun, sabap ra nanaak Aku noyo rirun ra kandoi ru imam. Osoi ayuk ondo' kolondo' kuasa' mapaugar ra kandoi raginio ukumin ra matoi paat minggaar ra kuliamos-kuliamos mapasau.”

Patungkuson ra imam-imam

⁸ Indagu Tuhan ri Arun, “Karaa' noyo ra ngaangai' indangan luntukon ondo' kalo sinolob ra tayar ru taak simbalui, ondo' pinataak Raki', pataakon Ku rirun. Manaak Aku rirun am papag muno ra indangan no, koson okou no ra tayar raginio ondo' inaru' ra sabuoi-buoi no.

⁹ Intor ra taak-taak ra mapasau kaga', ondo' kalo sinolob giu' ra rasawat ru altar, ondo' gitio noyo rirun no: taak simbalui koson paringkuanangan, taak simbalui koson mangampun ra tula am taak simbalui koson mambayar ra kalubatan. Ngaangai' taak simbalui ondo' pataakon Raki' tayar ru taak mapasau masauk ra longgom muno am anak-anak ungkuyon muno.

¹⁰ Akau musiti' mangakan ra akanon raginio giu' ra intok ondo' mapasau, am ungkuyon ayuk makaakan raginio; akanon no mapasau.

¹¹ Suai raginio, ngaangai' indangan luntukon ra bokon ondo' pinataak ru ulun ru Israil Raki' masauk ra okou tatangan. Pataakon Ku ngaangai' no rirun, anak-anak muno ungkuyon am ruandu'. Aturan ragitio masauk sabuoi-buoi no. Moonong sasambaloi muno ondo' kalo najamalan makaakan raginio.

¹² Pataakon Ku rirun ngaangai' ampos kasaa' ondo' moonsoi kaga', ondo' pataakon ru ulun ru Israil Raki' ra moonong bilor: umau jaitun, wain am gandum.

¹³ Ngaangai' no okou tatangan. Moonong sasambaloi muno ondo' kalo najamalan makaakan raginio.

¹⁴ Ngaangai' no giu' ra tana' Israil ondo' patimpokon noyo Raki', masauk ra okou tatangan.

¹⁵ Moonong anak katuaan ru ulun kapoam anak katuaan ru bibiag ondo' pinataak ru ulun ru Israil Raki', masauk ra okou tatangan. Kaa' moonong anak katuaan ru ulun am niayuk anak katuaan ru bibiag ra majamol musiti' pulion.

¹⁶ Lalaing musiti' pulion paat ra umur no sambulan. Logo ra inaru' koson mamuli' raginio iono limo ngampila' ruit pirok, sumugut ra logo ondo' inaru' giu' ra Kim Kuno.

¹⁷ Kaa' anak katuaan ru sapi', domba am kambing kalo mapuli'; bibiag raginio tayar Kuno ngaangai' am musiti' pataakon koson ra taak simbalui. Pawaso' raraa' ru bibiag no ra altar am solobo' lomok no tayar ru taak akanon; owou no mapabansuk ra guang Kuno.

¹⁸ Okou tatangan ra kual ru taak no, nogondo' koson ra kubab am paa ra pamiris ru bibiag ondo' pinataak Raki' tayar ru taak luntukon.

¹⁹ Ngaangai' indangan luntukon ondo' pataakon ru ulun ru Israil Raki', pataakon Ku rirun, anak-anak muno ra ungkuyon am ruandu' ra sabuoi-buoi no. Nabantuan ti kalo maalap kasulang; binaal Ku noyo ginio rirun am papag muno.”

²⁰ Indagu Tuhan ri Arun, “Kalo makaalap kou ra atan pana rapu' koson ra tungkuson. Kolondo' tayar ru tana' giu' ra Israil masauk ra longgom muno. Aku Tuhan noyo tungkuson muno.”

Patungkuson ra ulun ru Liwi

²¹ Indagu Tuhan, “Ngaangai' sampiopor ondo' pataakon ru ulun ru Israil Raki' pataakon Ku ra ulun ru Liwi. Ginio noyo bayaran ru kandoi nilo giu' ra Kim Kuno.

²² Ulun ru Israil ra bokon kalo boo iowon painggaaron ra Kim no. Amon ru minggaar ilo, maparatong ilo ra ukuman matoi risilo galama'.

²³ Tumalimpuun raino, ulun ru Liwi ayuk ondo' manalingapu ra Kim Kuno am pinalansan toojo ngaangai' kandoi raginio. Aturan ragitio masauk niayuk tayar ru papag mino saboi ra sabuoi-buoi no. Ulun ru Liwi kalo makapanungkus ra tana' giu' ra Israil

²⁴ sabap ra longgom nilo, nanaak Aku noyo risilo sampiopor ondo' pataakon ru ulun ru Israil Raki' tayar ru indangan luntukon. Ginio sabap ra nambala' Aku ra ulun ru Liwi ra ilo kalo makapanungkus ra tana' giu' ra Israil.”

Taak sampiopor intor ra ulun ru Liwi

²⁵ Nanusub Tuhan ri Musa

²⁶ mapasaboi ra susuban ti ra ulun ru Liwi, “Paat ra akau mangapu sampiopor intor ra ulun ru Israil, ondo' pataakon ru Tuhan ra longgom min, musiti' kau mapataak ra sampiopor intor raginio ra Tuhan ra indangan luntukon.

²⁷ Indangan luntukon no karaan nogondo' ra taak ru gandum bagu am wain bagu ondo' pinataak ru ulun magitanom.

²⁸ Ralan ragitio noyo akau niayuk mampataak ra indangan luntukon ondo' masauk ra longgom ru Tuhan intor ra ngaangai' taak sampiopor ondo' apuon min intor ra ulun ru Israil. Akau musiti' manaak ra indangan luntukon ra Tuhan ti ri Imam Arun.

²⁹ Pataako' noyo tayar ondo' moonsoi kaga' intor ra ngaangai' ondo' maapu mino.

³⁰ Mopongo kau mapataak ra tayar ondo' moonsoi kaga', iowon kau mambuli ra suwo no, nogondo' koson ra sangulun magitanom ondo' mangalap ra atan ondo' natatang malupus io manaak ra taak nano.

³¹ Akau am sasambaloi mino makaakan ra ondo' natatang no ra ati ayuk intok, sabap ginio noyo bayaran ru kandoi min giu' ra Kim ru Tuhan.

³² Kolondo' sala min paat ra akau mangakan raginio, malupus ayuk makataak min noyo tayar ondo' moonsoi kaga' ra Tuhan. Kalo pajamalin ramuyun taak ra mapasau intor ra ulun ru Israil ra mangakan ra atan pana intor ra taak no ra kalo poyo makataak tayar ondo' moonsoi kaga' ra Tuhan. Amon ru manggal kau ra aturan no, ukumin kau ra matoi.”