UNTABAN 17 - Tanou Moonsoi Timugon

Jujuga' ri Arun

¹ Indagu Tuhan ri Musa,

² “Susubo' ulun ru Israil manaak rirun mopor am ruo ngantaun jujuga'; jujuga' no musiti' pataakon ru moonong tingganai ru bansa'. Tulisi' inggalan ru moonong tingganai ra jujuga' no,

³ am tulisi' inggalan ri Arun ra jujuga' ondo' nanguakil ra bansa' ru Liwi. Moonong tingganai ru bansa' musiti' mokoondo' rondo' jujuga'.

⁴ Ibito' jujuga'-jujuga' no giu' ra ralalom Kim Kuno, am pabantaa' ngaangai' no giu' ra saang ru Kaban Nabantuan, intok Kuno muma' ramuyun.

⁵ Jujuga' ru ulun ondo' pinili' Kuno manalantar. Koson raginio noyo Aku mopolonggo' ra butok ru ulun ru Israil rirun ondo' kalo mapuputat.”

⁶ Ginio ra nambala' i Musa ra ulun ru Israil ra baal raginio. Moonong tingganai nilo pana manaak ri Musa ra rondo' jujuga', iono rondo' intor ra moonong bansa'. Ngaangai' no mopor am ruo ngantaun, makaaya' jujuga' ri Arun.

⁷ Kopongo raginio pinabanta' ri Musa ngaangai' jujuga' no giu' ralalom Kim ru Tuhan, giu' ra saang ru Kaban Nabantuan.

⁸ Suabon raginio, paat ri Musa mumpos ra ralalom Kim ru Tuhan, nakito no ra jujuga' ri Arun, jujuga' ondo' nanguakil ra bansa' ru Liwi, nanalantar noyo. Jujuga' no makapumput noyo, makabusak am makaampos kukula' kawa' ru badam ondo' matuo.

⁹ Nangalap i Musa ra ngaangai' jujuga' no am napakito ra ulun ru Israil. Nakakito ilo noyo ra atan nasauk noyo, am moonong tingganai nangalap ra jujuga' ru sigagama'.

¹⁰ Indagu boo Tuhan ri Musa, “Pabantaa' saguli' jujuga' ri Arun giu' ra saang ru Kaban Nabantuan. Jujuga' no musiti' buliin koson ra papakaraan ra ulun ru Israil ondo' masaga' gumuor, ra matoi ilo amon ru kalo lumonggo' ilo mambutok.”

¹¹ Nambaal i Musa ra atan ondo' nanusuban ru Tuhan.

¹² Indagu boo ulun ru Israil ri Musa, “Amon ru koson raginio, matoi akai! Maluus akai!

¹³ Amon ru ulun ondo' minggaar ra Kim ru Tuhan musiti' matoi, am kolondo' boo kalansanan mai!”