UNTABAN 16 - Tanou Moonsoi Timugon

Guor ri Kora, i Datan am i Abiram

^1-2 I Kora anak ri Jijgar, intor ra bansa' ru Kigat bansa' ru Liwi, giminuor ri Musa. Inindangan i Kora ru talu ngaulun intor ra bansa' ru Rubin, iono i Datan am i Abiram, karuo-ruo no anak ri Iliab, am niayuk i On anak ri Pilit, am niayuk 250 ngaulun tingganai mangaatang ondo' pinili' ru ulun ru Israil.

³ Nababaya' ilo minuma' ri Musa am i Arun, am indagu, “Najanjayan kau! Ngaangai' ulun ru Israil Tuhan tatangan, am Tuhan mabaya' ritakau ngaangai'. Kaa' okou Musa, kua karaa' mu inan muno masawat poyo intor ra ulun ru Tuhan?”

⁴ Paat ra norongog ri Musa ragu raginio, kubu io ra tana' am pakiasi' ra Tuhan.

⁵ Indagu boo i Musa ri Kora am mamaya' nano, “Susuab no ra susuab ti, manulu' Tuhan ra osoi longgom Nano, iono ulun ondo' patimpokon Riso; ulun ondo' pinili' Nano iowon No minggaar Riso giu' ra altar.

^6-7 Susuab no ra susuab ti okou am mamaya' muno musiti' magibit ra intok ru baa am kaminyan, am magibit raginio giu' ra altar. Ilain takau boo osoi ritakau ti pinili' ru Tuhan. Akau ulun ru Liwi ra najanjayan!”

⁸ Indagu poyo i Musa ri Kora, “Rongog kau ulun ru Liwi!

⁹ Indos min kia ra baal ragitio boborok paat i Aki Kapuuno' ru Israil napasuai ramuyun intor ulun ru Israil ra bokon, maa' raginio makainggaar kau Riso am mangandoi giu' ra Kim Nano, am niayuk mangandoi tayar ru ulun ru Israil am kumambo risilo?

¹⁰ Nanaak noyo Tuhan ramuyun am ngaangai' ulun ru Liwi ra pangurumatan no, kaa' raino gumogot kou poyo masauk ra imam niayuk!

¹¹ Paat okou am mamaya' muno nambutok ri Arun, sotopot no minanggal kau ra Tuhan.”

¹² Kopongo raginio nanusub i Musa ra ulun mampiau ri Datan am i Abiram, kaa' kalo masaga' i Datan am i Abiram matong. Konilo,

¹³ “Kalo poyo kia sama' ra okou nagibit ramon miningkual intor ra Misir, tana' ondo' malabung no, koson mamatoi ramon ra tana' kaagisan ti? Musiti' kia ru mamarinta kou ramon niayuk?

¹⁴ Napandayan noyo ra kalo magibit kou ramon mongoi ra tana' ondo' malabung, kapoam manaak ramon ra umo am umo ru anggur koson ra longgom mai. Raino masaga' kou mamparuung poyo ramon. Kalo masaga' akai matong!”

¹⁵ Siminangit toojo i Musa am indagu ra Tuhan, “Pai' noyo apuo' atan-atan taak intor risilo. Kalo igondo' aku pambaal ra sala risilo; am sanginan kaladai pana kalo igondo' ku alapo' intor risilo.”

¹⁶ Indagu i Musa ri Kora, “Susuab no, okou am 250 ngaulun maamaya' muno musiti' matong giu' ra Kim ru Tuhan. Soroi niayuk i Arun ra giu'.

¹⁷ Akau ngaangai' musiti' magibit ra intok ru baa ru sigagama'. Suangi' ra kaminyan intok ru baa no, am pataakon ginio ra Tuhan.”

¹⁸ Ginio ra moonong ulun nagibit ra intok ru baa, sinuangan ra baa ru apui am kaminyan, am bigor giu' ra kulobon ru Kim ru Tuhan nababaya' ri Musa am i Arun.

¹⁹ Timungo' boo ri Kora ngaangai' ulun, am bigor ilo timiningkuang ri Musa am i Arun giu' ra kulobon ru Kim ru Tuhan. Pulali' ru sinda katulayan ru Tuhan nakito ru ngaangai' ulun.

²⁰ Indagu Tuhan ri Musa am i Arun,

²¹ “Lugut intor ra ngaangai' ulun no; masaga' Aku mamatoi risilo raino niayuk.”

²² Kaa' kubu i Musa am i Arun am indagu, “Iou Aki Kapuuno', Okou noyo puun ru kaayagan ra ngaangai' ondo' maayag. Amon ru sangulun ayuk makatula, sumangit Kou kia ra ngaangai' ulun?”

²³ Indagu Tuhan ri Musa,

²⁴ “Susubo' noyo ngaangai' ulun minggalur ra kim ri Kora, i Datan am i Abiram.”

²⁵ Kopongo raginio i Musa, binaya' ru tingganai-tingganai ru Israil, minongoi ra intok ri Datan am i Abiram.

²⁶ Indagu i Musa ra ngaangai' ulun ru Israil ra giu' no, “Inggaluri' kim ru ngaangai' ulun ondo' malaat ti am pai' kambong ra atan pana longgom nilo. Amon ru kalo sumugut kau, matoi kau mabaya' risilo sabap ra ngaangai' tula nilono.”

²⁷ Ilo pana minggalur intor ra kim ri Kora, i Datan am i Abiram. Miningkual noyo i Datan am i Abiram intor ra kim am tatanga' migor giu' ra kulobon ru kim mababaya' ra anak andu' nilo.

²⁸ Indagu i Musa ra ngaangai' ulun ra giu' no, “Gitio noyo ralan min makapandai ra Tuhan ondo' nanusub raki' mambaal ra ngaangai' baal ragitio, am ra kalo nambaal aku raginio sumugut ra kasaga' kuno galama'.

²⁹ Amon ru ngaangai' ulun no matoi toojo ayuk ra kolondo' ukuman intor ri Aki Kapuuno', ginio noyo tatandu' no ra Tuhan kalo nanusub raki'.

³⁰ Kaa' amon ru mambaal Tuhan ra rorondo' ondo' kalo igondo' kasauk, am malapak tana' ti am monolon boo risilo am ngaangai' longgom nilo, saboi biag-biag ilo mumpos ra intok ru kapatayan, am mapandayan min boo ra ngaangai' ulun no manggal ra Tuhan.”

³¹ Karagu ayuk ri Musa ginio, tana' ragana' ru kalayam ri Datan am i Abiram nalapak,

³² am nonolon boo tana' ti risilo am niayuk sasambaloi nilono, nababaya' ra ngaangai' maamaya' ri Kora am longgom nilo.

³³ Ginio ra biag-biag ilo naratu' ra intok kapatayan nabaya' ra ngaangai' longgom nilo. Tana' ondo' nalapak no narikit saguli' am napaliot ilo tinolon ru tana' ti.

³⁴ Ngaangai' ulun ru Israil ondo' soroi ra giu' no nagiru' paat nokorongog ra golok nilo. Ngaangai' ulun ru Israil no pana giminolok, “Pagiru'! Magu' itakau niayuk tolonon ru tana' ti!”

³⁵ Kopongo raginio paparatong Tuhan ra apui ondo' nanimbula' am nonolob ra 250 ngaulun ondo' napataak noyo ra kaminyan.

Intok ru baa

³⁶ Indagu boo Tuhan ri Musa,

³⁷ “Susubo' i Iliajar, anak ri Imam Arun, mangalap ra ngaangai' intok ru baa gangsa' no intor ra nongosolob am patabulon boo arang no giu' intok ra bokon, sabap ra intok ru baa no matulai.

³⁸ Intok ru baa no matulai sabap pinataak noyo giu' ra altar ru Tuhan. Ginio ra alapo' noyo intok ru baa ru ngaangai' ulun ondo' inukum ra matoi sabap ra tula nilo, am tuyuo' boo ra intok ru baa no masauk ra kapingan mangalilis koson saukon ra taub ru altar. Taub no masauk ra rondo' papakaraan ra ulun ru Israil.”

³⁹ Imam Iliajar pana nangalap ra ngaangai' intok ru baa no, am panusub boo ra ulun nanuyu' raginio masauk ra kapingan mangalilis koson saukon ra taub ru altar.

⁴⁰ Taub no nasauk ra papakaraan ra ulun ru Israil ra kolondo' sangulun pana ondo' ayuk am papag ri Arun makainggaar ra altar monolob ra kaminyan ra Tuhan. Ulun ondo' manggal ra aturan no matoi koson ri Kora am ngaangai' maamaya' nano. Ngaangai' no binaal sumugut ra susuban ru Tuhan ri Iliajar ra pinasaboi galing ri Musa.

Namayag i Arun ra ulun ru Israil

⁴¹ Suabon no, nambutok ngaangai' ulun ru Israil ri Musa am i Arun. Konilo, “Namatoi kau ra santayaran ulun ru Tuhan.”

⁴² Pakatimung ilo ngaangai' koson manggal ri Musa am i Arun, ponontong ilo tampilon ra Kim ru Tuhan am nakakito ra gaun nanili ra Kim no, am sinda katulayan ru Tuhan pana makito.

⁴³ Ongoi i Musa am i Arun giu' ra saang ru Kim ru Tuhan,

⁴⁴ am indagu boo Tuhan ri Musa,

⁴⁵ “Lugut intor ra ngaangai' ulun ti sabap ra masaga' Aku mamatoi risilo ra intok raginio niayuk!” Kubu ilo ruo,

⁴⁶ am indagu boo i Musa ri Arun, “Alapo' intok ru baa muno am suangi' ra baa ru apui intor ra altar, am suangi' ra kaminyan ra baa ru apui no. Ibito' intok ru baa ru apui no ra ulun no ra mataki', am baalo' upacara pamasawan risilo. Ribaki'! Sangit ru Tuhan nasimbulukan noyo am maruol tumapik tumalimpuun noyo.”

⁴⁷ Binaal ri Arun atan ondo' rinagu ri Musa. Nagibit i Arun ra intok ru baa nano am pasimbul mongoi ra tatanga' ru ulun ondo' tatanga' mantimung. Pakakito i Arun ra maruol tumapik tumalimpuun noyo, pasuango' no kaminyan ra baa ru apui am pambaal ra upacara pamasawan tayar ru ulun no.

⁴⁸ Ginio ra longgo' maruol tumapik no am bigor i Arun giu' ra tatanga' ru ulun ondo' lakat poyo maayag am ondo' minatoi noyo.

⁴⁹ Ulun minatoi paat raginio suang no 14,700 ngaulun, kalo nakaaya' ulun ondo' minatoi paat ra guor ri Kora.

⁵⁰ Pokolonggo' maruol tumapik no, saguli' i Arun ri Musa giu' ra kulobon ru Kim ru Tuhan.