UNTABAN 12 - Tanou Moonsoi Timugon

Inukum i Miriam

¹ Naguot i Musa ra sangulun ruandu' ru Kus. Ginio ra sinauk ri Miriam am i Arun ginio ra sasaban manuyu' ri Musa.

² Konilo, “Mindagu Tuhan pinabala' galing ri Musa ayuk kia? Kalo kia mindagu Tuhan no pinabala' galing rito niayuk?” Naining ru Tuhan ragu nilono.

³ I Musa ti sangulun ondo' minggana' guang, minggana' guang poyo intor ra osoi pana ra tana' ti.

⁴ Pulali' ru Tuhan minindagu ri Musa, i Arun am i Miriam, “Masaga' Aku ra akau talu ngaulun mongoi ra Kim Kuno.” Ilo pana minongoi,

⁵ am tuun boo Tuhan ralalom lugu' ru gaun am bigor giu' ra kulobon ru Kim ru Tuhan, am pampiau, “Arun! Miriam!” Jalai ilo karuo-ruo,

⁶ indagu boo Tuhan, “Iningo' ragu Kutu. Paat ra mokoondo' nabi-nabi ra gino ngai' mino, minintalang Aku risilo am minindagu Aku risilo ralalom ru inupi.

⁷ Kaa' kalo koson raginio ra ulipon Kuno i Musa; sinauk Ku noyo io ra tingganai ru ngaangai' ulun Kuno Israil.

⁸ Ginio ra minindagu Aku riso ra mantaluma', sailon toojo am sala' ka misunggait; am nakakito io noyo ra baal Kuno. Kua kia baani kau manggal ri Musa, ulipon Kuno?”

⁹ Siminangit Tuhan ri Arun am i Miriam; ginio ra paat Tuhan mugar

¹⁰ am nangiruan gaun no ra Kim, pulali' ru kungkung ri Miriam natiu' ra maruol ru kungkung ondo' maaja'. Nasauk kungkung nano ra mapulak koson ra ais batu. Pakakito i Arun ra natiu' Miriam ra maruol raginio,

¹¹ indagu i Arun ri Musa, “Tuan, indangano' ra pai' akai polosoo' imboloon sabap ra tula ondo' binaal mai ra sambung mai.

¹² Pai' polosoo' io masauk koson ra lalagang ondo' inanak ra minatoi, am ra kual nano sampiruo mootong.”

¹³ Pampiau i Musa ra Tuhan, “Iou Aki Kapuuno', babaso' io noyo!”

¹⁴ Taam Tuhan, “Amon ru tiwagin ru ama' nano bulos nano, moonsoi io mansaan ra uyu' buoi tulu' ngoorou. Ginio ra paingkualo' io intor ra pangkiman buoi tulu' ngoorou. Mopongo raginio, paumposon io saguli'.”

¹⁵ Pinaingkual i Miriam intor ra pangkiman buoi tulu' ngoorou, am ulun ru Israil kalo napabanding ra pangkiman saboi i Miriam pinaumpos saguli'.

¹⁶ Iruani' nilo boo Gajirot, am pangkim giu' ra tana' kaagisan Paran.