UNTABAN 10 - Tanou Moonsoi Timugon

Bujung-bujung pirok

¹ Indagu Tuhan ri Musa,

² “Pambaal ruo bujung intor ra pirok tinuyu' maa' raginio pakayon koson mampiau ra ulun ru Israil tumimung am manusub risilo mugar.

³ Amon ru karuo-ruo bujung no samputin kaawaron, ngaangai' ulun ru Israil musiti' tumimung ra liput muno, giu' ra saang ru kulobon ru Kim Kuno.

⁴ Kaa' amon ru rondo' ayuk bujung samputin, tingganai ru bansa' ayuk ondo' tumimung ra liput muno.

⁵ Paat bujung no samputin kariwaan, bansa' ondo' nangkim tampilon ra sirangon no musiti' mugar.

⁶ Paat ra bujung no samputin kariwaan ra kainduo no, bansa' tampilon ra rabugus no musiti' mugar. Bujung no musiti' samputin kariwaan tayar ru tatandu' ra mugar.

⁷ Bujung no musiti' samputin kaawaron tayar ru tatandu' manimung ra ulun ru Israil.

⁸ Bujung-bujung no musiti' samputin ru anak-anak ungkuyon ri Arun, imam-imam no. Aturan ragitio musiti' gagayaan ra sabuoi-buoi no.

⁹ Paat ra akau mangayou giu' ra tana' min koson mangampin ra inan intor ra pantula' ondo' namulunsar ramuyun, samputi' bujung-bujung raginio koson manaak ra pulanu ru pangayawan. Aku Tuhan, i Aki Kapuuno' min, mangindangan am mamayag ramuyun intor ra pantula'.

¹⁰ Koson raginio niayuk paat ra akau munsag; paat pangiantakan Sila' Bagu am pangiantakan ra bokon, samputi' noyo bujung-bujung raginio paat ra akau mapataak ra taak simbalui koson mapabansuk ra guang Kuno am taak simbalui koson makibarakat Raki', am mangindangan Aku ramuyun. Aku noyo Tuhan, i Aki Kapuuno' min.”

Naparulun ulun ru Israil ra Kim

¹¹ Paat ra orou karuo ngoopor sila' karuo, paat ra bilor karuo nalupus ulun ru Israil nangiruan ra Misir, gaun ondo' soroi giu' ra rasawat ru Kim ru Tuhan no mininsawat.

¹² Nansusunu' boo ulun ru Israil minugar nangiruan ra Tana' kaagisan Sinai. Uog boo gaun no giu' ra tana' kaagisan Paran.

¹³ Ginio noyo kasaa' toojo ilo minugar sumugut ra susuban ru Tuhan ondo' pinabala' galing ri Musa.

¹⁴ Pogonong ra ilo mugar, mansusunu' ilo maya' ra ondo' tinampos ra nogondo'. Ulun ondo' ragana' ru bandira' ra pulalai ondo' tiningganai ru bansa' ru Jiuda minugar pagulu, nansusunu' pulalai am pulalai. I Nagason anak ri Aminadab ondo' naningganai risilo.

¹⁵ I Nitaniil anak ri Juar ondo' naningganai ra bansa' ru Isakar

¹⁶ am i Iliab anak ri Gilon ondo' naningganai ra bansa' ru Jibulon.

¹⁷ Rinulun boo Kim ru Tuhan no; am bansa' ru Girson am Mirari ondo' nagibit ra Kim no boo minugar.

¹⁸ Mopongo raginio ulun ondo' ragana' ru bandira' ra pulalai ondo' tiningganai ru bansa' Rubin minugar, nansusunu' pulalai am pulalai. I Ilijur anak ri Sidiur ondo' naningganai risilo.

¹⁹ I Silumiil anak ri Jurisyadai ondo' naningganai ra bansa' ru Simion

²⁰ am i Ilyasap anak ri Riguil ondo' naningganai ra bansa' ru Gad.

²¹ Bansa' ru Kigat boo ondo' namikul ra kuliamos mangapasau no minugar. Paat ra ilo nakasaboi giu' ra intok pangkiman bagu, natirong noyo Kim ru Tuhan.

²² Ulun ondo' ragana' ru bandira' ra pulalai ondo' tiningganai ru bansa' ru Ipraim minugar, nansusunu' pulalai am pulalai. I Ilisama anak ri Amigud ondo' naningganai risilo.

²³ I Gamaliil anak ri Pidajur ondo' naningganai ra bansa' ru Manasi

²⁴ am i Abidan anak ri Gidioni ondo' naningganai ra bansa' ru Binjamin.

²⁵ Pupus no, ulun ondo' ragana' ru bandira' ra pulalai ondo' tiningganai ru bansa' ru Dan minugar, nansusunu' pulalai am pulalai. I Agiijir anak ri Amisyadai ondo' naningganai risilo. Nasauk ilo ra magalung ra barisan tinaulian ra tayar ru ngaangai' pulalai no.

²⁶ I Pagiil anak ri Okran ondo' naningganai ra bansa' ru Asyir

²⁷ am i Agira anak ri Inan ondo' naningganai ra bansa' ru Naptali.

²⁸ Ginio noyo lili' ru barisan ru ulun ru Israil paat ilo minugar, nansusunu' pulalai am pulalai.

²⁹ Indagu i Musa ra lango' nano i Gobab anak ri Jitro, ulun ru Midian no, “Mugar akai mongoi ra intok ondo' kon ru Tuhan paat Io minindagu ra manaak raginio ramon. Nambantu' Io noyo ra baal ondo' moonsoi ra ulun ru Israil. Ginio ra baya' ramon am moonsoi akai rirun.”

³⁰ Taam i Gobab, “Kalo, masaga' aku sumaguli' ra namagunan kuli.”

³¹ Indagu i Musa, “Pai' akai tatango'. Pasaukon kou ra ulun manulu' ra ralan ramon sabap ra makapandai kou ra intok takau mangkim giu' ra tana' kaagisan.

³² Amon ru maya' kou, am ngaangai' ondo' moonsoi ondo' baalon ru Tuhan ramon baalon mai niayuk rirun.”

Minugar ulun ru Israil

³³ Paat ra ulun ru Israil nangiruan ra Sinai, gunung matulai no, minugar ilo buoi talu ngoorou. Kaban Nabantuan ru Tuhan magail ibiton sumigulu risilo koson maguyum ra intok pangkiman nilo.

³⁴ Pogonong ra ilo mugar intor ra intok pangkiman, gaun ru Tuhan magail soroi giu' ra rasawat nilo paat ra matawang.

³⁵ Pogonong ra Kaban Nabantuan ru Tuhan no saanin paat ra mugar, mindagu i Musa, “Luat noyo, iou Tuhan, pantutuliaro' noyo pantula' Muno am polosoo' ulun ondo' masisang Rirun magiru'!”

³⁶ Pogonong ra ulun ru Israil muog am mapatuun ra Kaban Nabantuan, mindagu i Musa, “Saguli' no, iou Tuhan, ra riribu sasambaloi ru Israil.”