TINGGANAI RU BANSA' 1 - Tanou Moonsoi Timugon

Bansa' ru Jiuda am bansa' ru Simion namparakop ra Raja' Adoni-Bijik

¹ Kopongo i Josua minatoi, pangkuot ulun ru Israil ra Tuhan, “Iou Tuhan, ati kia ra bansa' ondo' musiti' kasaa' mongoi bulunsar ra ulun ru Kanaan?”

² Taam Tuhan, “Bansa' ru Jiuda. Manaak Aku risilo ra kuasa' koson mampagaau ra pagun no.”

³ Indagu bansa' ru Jiuda ra bansa' ru Simion, “Indangano' akai mamulunsar ra ulun ru Kanaan am mampagaau ra wilayah ondo' inaru' ru Tuhan ramon. Kopongo raginio akai poyo mangindangan ramuyun mampagaau ra wilayah ondo' inaru' ru Tuhan ramuyun.” Ginio ra bansa' ru Simion

⁴ minongoi pamulunsar nababaya' ra bansa' ru Jiuda. Nanaak Tuhan risilo ra kamanangan ra ulun ru Kanaan am ulun ru Piris. Kinala nilo mopor ngaribu ngaulun saujor giu' ra Bijik.

⁵ Nakatuum ilo ra Raja' Adoni-Bijik, am bulunsaro' nilo io.

⁶ Nagiru' Raja' Adoni-Bijik, kaa' inilou am rinakop nilo io. Pinutul nilo pangina' ru kalindu' am pangina' ru kalayam nano.

⁷ Indagu Raja' Adoni-Bijik, “Ragili namutul aku ra pangina' ru kalindu' am pangina' ru kalayam ru tulu' ngoopor ngaulun raja', am nanganam ilo ra suwo ru akanon susut ru mija' kuno. Raino pinamakuan ri Aki Kapuuno' raki' koson ra pinamakuan kuno risilo.” Raja' Adoni-Bijik pana inibit boo giu' ra Jirusalim, am minatoi io ra giu'.

Bansa' ru Jiuda nangala ra Jirusalim am Gibron

⁸ Namulunsar ulun ru Jiuda ra Jirusalim, am nampagaau am nonolob ra bandar no, am niayuk namatoi ra mamagun nano.

⁹ Kopongo raginio namulunsar ilo ra ulun ru Kanaan ondo' minayan giu' ra kabuluran, lonson toojo ru bulur am giu' ra tana' mapua' tampilon ra rabugus.

¹⁰ Namulunsar ulun ru Jiuda ra ulun ru Kanaan ondo' minayan giu' ra bandar Gibron, ondo' ragili ininggalanan ra Kiryat-Arba. Giu' no kinala nilo bansa' Sisai, Agiman am Talmai.

I Otniil nangala ra bandar Dibir

¹¹ Intor ra Gibron, namulunsar ulun ru Jiuda ra bandar Dibir, ondo' paat raginio ininggalanan ra Kiryat-Sipir.

¹² Sangulun intor ra bansa' ru Jiuda no ondo' makainggalan ri Kalib minindagu, “Paanduin ku anak ruandu' kuno i Aksa no ra ulun ondo' makasugut mampagaau ra Kiryat-Sipir.”

¹³ I Otniil, anak ru boborok ungkuyon ri Kalib ondo' makainggalan ri Kinas, nakasugut nampagaau ra bandar no. Ginio ra pinagandu' ri Kalib anak ruandu' nano i Aksa am i Otniil.

¹⁴ Paat ra orou paguatan nilo, jinajalan ri Otniil i Aksa makitaak ra sampila' tana' intor ra ama' nano. Tuun i Aksa intor ra kaladai nano, am pangkuot i Kalib riso ra atan kasagaan nano.

¹⁵ Taam i Aksa, “Tana' ondo' tinaakan muno raki' no mapua'. Anii' aku niayuk ra kukula' taur ru timug.” Ginio ra nangani' i Kalib riso ra taur ru timug giu' ra tampilon ralayo am taur ru timug giu' ra tampilon rabugus.

Kamanangan ru bansa' ru Jiuda am bansa' ru Binjamin

¹⁶ Papag ru iwan ra ungkuyon ri Musa, iono ulun ru Kini, minugar nababaya' ra bansa' ru Jiuda intor ra Jiriko, bandar ru puun kurma. Ilo pana minongoi ra tana' mapua' giu' ra tampilon rabugus ru Arad ra wilayah ru Jiuda. Minayan ilo ra giu' no ra gino ngai' ru ulun ru Amalik.

¹⁷ Bansa' ru Jiuda nababaya' boo ra bansa' ru Simion minongoi pamulunsar am nangala ra ulun ru Kanaan ondo' minayan giu' ra bandar Jipat. Nagulas ilo ra bandar no am napalunsai raginio, am inggalani' ginio ra Orma.

^18-19 Nangindangan Tuhan ra bansa' ru Jiuda saboi nakasugut ilo nampagaau ra intok kabuluran. Kaa' kalo nakasugut ilo nampagaau ra bandar Gaja, Askilon am Ikron, am niayuk intok giu' ra liliut ru ngaangai' bandar raginio. Kalo nakasugut bansa' ru Jiuda napagiru' ra mamagun ondo' minayan giu' ra galur ru nagas no, sabap ra mamagun ra giu' no makakarita' kuda ondo' binaal intor ra basi'.

²⁰ Koson ra ondo' nanusuban ri Musa, Gibron pinataak ri Kalib, sabap ragili pinagiru' ri Kalib talu bansa' ru papag ri Inak intor ra bandar no.

²¹ Kaa' bansa' ru Binjamin kalo nakasugut napagiru' ra ulun ru Jibusi intor ra Jirusalim. Ginio sabap ra lakat poyo minayan ulun ru Jibusi nabaya' ra ulun ru Binjamin.

Bansa' ru Ipraim am bansa' ru Manasi nangala ra Bitil

^22-23 Bansa' ru Ipraim am bansa' ru Manasi namulunsar ra bandar Bitil, ondo' paat raginio ininggalanan ra Lus. Nangindangan Tuhan risilo. Ulun-ulun pansigo ondo' minongoi ra bandar no,

²⁴ nakauma' ra sangulun ungkuyon ondo' minatong intor ra bandar no. Konilo riso, “Tului' akai ra ralan mumpos ra bandar ti, am moonsoi pamakuan mai ramuyun.”

²⁵ Nanulu' ungkuyon no risilo ra ralan mumpos ra bandar no. Kopongo raginio ulun intor ra bansa' ru Ipraim am bansa' ru Manasi minumpos ra bandar no am namatoi ra ngaangai' mamagun no, ondo' ayuk am ungkuyon no am sasambaloi nano.

²⁶ Ungkuyon no pana minanding ra pagun ru ulun ru Git am nambaal ra rondo' bandar ra giu'. Nanginggalan io ra bandar no Lus; bandar no lakat poyo makainggalan koson raginio.

Bansa'-bansa' ondo' kalo pinagiru' ru ulun ru Israil

²⁷ Bansa' ru Manasi kalo napagiru' ra mamagun ru bandar Bit-Sian, Taanak, Dor, Jibliam, Migido am mamagun ru ngaangai' pekan giu' ra liliut no. Ginio ra nagulayun ulun ru Kanaan minayan ra giu' no.

²⁸ Pakagaai ikang ru ulun ru Israil, nampajajal ilo ra ulun ru Kanaan nangandoi risilo, kaa' lakat poyo kalo pinagiru' nilo ngaangai' ulun ru Kanaan intor ra giu' no.

²⁹ Bansa' ru Ipraim kalo napagiru' ra ulun ru Kanaan ondo' minayan ra bandar Gijir. Ginio ra ulun ru Kanaan lakat poyo minayan ra giu' no nababaya' risilo.

³⁰ Bansa' ru Jibulon kalo napagiru' ra mamagun ru bandar Kitron am Nagalol. Ginio ra ulun ru Kanaan lakat poyo nagulayun minayan ra giu' no nababaya' risilo. Kaa' ulun ru Kanaan kalo jinajalan nangandoi risilo.

³¹ Bansa' ru Asyir kalo napagiru' ra mamagun ru bandar Ako, Sidon, Aglab, Akjib, Gilba, Apik am Rigob.

³² Ginio ra ulun ru Kanaan, mamagun toojo ru pagun no lakat poyo minayan ra giu' no nababaya' ra bansa' ru Asyir.

³³ Bansa' ru Naptali kalo napagiru' ra mamagun ru bandar Bit-Simis am Bit-Anat. Ginio ra ulun ru Kanaan, mamagun toojo ru pagun no lakat poyo minayan ra giu' no nababaya' ra bansa' ru Naptali. Kaa' jinajalan ilo nangandoi tayar ru bansa' ru Naptali.

³⁴ Ulun ru Amori nampajajal ra bansa' ru Dan nagiru' giu' ra kabuluran am kalo nopoloso risilo minayan ra pipit.

³⁵ Ulun ru Amori lakat poyo nagulayun minayan giu' ra Ayalon, Saalbim am Gunung Giris. Kaa' bansa' ru Ipraim am bansa' ru Manasi nanguasa' ra ulun ru Amori am nampajajal risilo nangandoi ra karuo-ruo bansa' no.

³⁶ Giu' ra tampilon ralayo ru Sila, balitan ru wilayah ulun ru Idom mansail ra Ginting Akrabim.