SULABOI 5 - Tanou Moonsoi Timugon

Pakiasian ra makimasi'

¹ Karaa' noyo, iou Tuhan, atan ondo' nasauk noyo ramon. Ilai' akai no, ilai' nagasaban ramon.

² Rapu' tungkuson mai ginaau ru ulun ra bokon; ulun bansa' ra bokon tatanga' mayan ra baloi mai.

³ Ama' mai pinatoi ru pantula', am raino ina' mai nasauk ra napuor.

⁴ Nambali akai kalalaat ra timug inumon am luton koson suruin.

⁵ Jinajalan akai mangandoi ra maagat koson ra bibiag; naagui akai, kaa' kalo pinatangus.

⁶ Makikitaak akai giu' ra Misir am Asyur, makitaak akai ra akanon koson mapatanduus ra kaayagan.

⁷ Kinamatuaan mai makatula, am raino kalio boo; kaa' akai musiti' maimbolo', sabap ra tula-tula nilo.

⁸ Kinuasa' akai ru ulipon, am kolondo' ulun ondo' makakuasa' mampalabus ramon intor risilo.

⁹ Ulun mamatoi jajawot giu' ra liwar bandar, mokololob ra painawo mai paat maguyum ra akanon.

¹⁰ Mansalom akai sabap maitilan, inan mai malasu' koson ra rapuan.

¹¹ Andu' mai sinawa' giu' ra Bulur Sion, ralaa mai rinulug giu' ra moonong bandar giu' ra Jiuda.

¹² Tingganai-tingganai mai rinakop am tinair, ulun matutuo mai kalo boo urumaton.

¹³ Kamulakan ungkuyon mai jinajalan manginsar ra gandum koson ra ulipon, anak ungkuyon naintunan ru tataun pipikul saboi makasiling.

¹⁴ Ulun matutuo kalo boo tumimung giu' ra kulobon garabang ru bandar, kamulakan ungkuyon kalo boo mangkuli ra miujik.

¹⁵ Kaansukan nairu' noyo ra ralalom ru kaayagan mai, sayau nakulau nasauk ra panguliran.

¹⁶ Baal ra kaantakan ru guang mai kalio noyo. Raino ukumin akai sabap makatula.

¹⁷ Mangiluk kaga' guang mai, lomou mai naratu' saboi mato mai majapul,

¹⁸ sabap ra Bulur Sion masiluk am iniruanan, uku' kataunan salilitau giu' ra nalunsai no.

¹⁹ Kaa' Okou, iou Tuhan, raja' ra sabuoi-buoi no, mamarinta Kou ra kolondo' pupus.

²⁰ Kua iruani' Mu akai ra mabuoi kaga'? Marara' Kou kia boo mangkara' ramon?

²¹ Iou Tuhan, ibito' akai no sumaguli' Rirun; ibito' akai no sumaguli' Rirun! Patapulio' baal moonsoi mai koson ragili.

²² Lingonon Mu kia patiri' akai? Kolondo' kia polos ru sangit Muno ramon?