SULABOI 3 - Tanou Moonsoi Timugon

Ukuman, tumalikur ra tula am kalansanan

¹ Aku no ondo' nakapandai ra ati kulaan mili' ra inukum ri Aki Kapuuno'.

² Rinalaat No aku ra intok ondo' najanjayan londom,

³ am ruruli' nampalamba' raki' ra kolondo' guang makaasi'.

⁴ Pinilatan No inan kuno ra masaran am namandak ra bungul-bungul kuno.

⁵ Linibung No aku ra kangilukan am kaimbalaan.

⁶ Jinajalan No aku mayan ralalom kalandaman, koson ra ulun ondo' minatoi paat ra galing i.

⁷ Rinantai No aku ra inigot; inaput aku ra kolondo' kalansanan koson magiru'.

⁸ Giminolok aku makiindangan, kaa' marara' i Aki Kapuuno' mangkirongog raki'.

⁹ Mugar aku ra kakasiling; ralan kuno inompong ra timbok batu.

¹⁰ Nangipa' Io raki' koson ra sanginan baawang; Nansaam Io raki' koson ra sanginan singa'.

¹¹ Nangilou Io raki' saboi aku liminisang ra ralan, am bininsang aku am iniruanan aku.

¹² Pinaatang No tanggayan ru panah Nano, am sinauk aku ra intok napatumaan ra anak panah Nano.

¹³ Anak panah Nano nansabut ra inan kuno, saboi nakatujok ra pusu' kuno.

¹⁴ Ulun makakurit raki' ra monsongorou; aku sinauk ra pangiisan.

¹⁵ Mapait ayuk pinataak Nano raki' koson ra inumon am akanon.

¹⁶ Pinakisas No bulos kuno ra tana', am pinapipik ripon kuno ra batu saboi napandak.

¹⁷ Nalilianan ku noyo kaligagan, kaansayan am kaansukan.

¹⁸ Kalo boo maayag aku ra mabuoi, nairu' noyo kalansanan kuno ra Tuhan.

¹⁹ Mangkara' ra tanggawan am kaimbalaan kuno, koson ayuk mangakan ra tuwo ondo' mapait.

²⁰ Baal ragili ayuk boo kakaraan kuno, saboi inan kuno naimbolo'.

²¹ Kaa' kalansanan kuno minatong saguli' paat ra aku nakakara' ra baal ragitio:

²² Togom ru Tuhan mantilayun am asi' Nano kolondo' pupus;

²³ masalok baguon ra moonong susuab ti, sotopot no Io mampagagaya'!

²⁴ Tuhan ayuk soroi raki', ginio ra malansan aku Riso.

Kalansanan ra tayar ru Israil

²⁵ Tuhan moonsoi ra moonong ulun ondo' mangintopot Riso.

²⁶ Ginio ra moonsoi inaani' takau Io ra tumaan guang, saboi Io mamayag ritakau.

²⁷ Moonsoi noyo ra itakau migila' ra tumaan guang paat ra lakat poyo mamulok.

²⁸ Paat ra Io mamparatong ra kaimbalaan, musiti' takau manturung misangulun am mongkoror.

²⁹ Musiti' takau minggana' guang am maginaa, sabap ra maaru' lair lakat poyo mokoondo' ra kalansanan.

³⁰ Kabalu' pana linamba' am inasaban, musiti' takau mangapu ra ngaangai' no.

³¹ Tuhan makaasi' am kalo mangimpai ritakau ra sabuoi-buoi no.

³² Kabalu' pana porotongon No kaimbalaan ritakau, magulayun Io motogom ritakau ra togom ondo' kolondo' polos.

³³ Kalo masaga' Io mangkinibit ritakau maimbolo' am mangiluk.

³⁴ Makapandai Tuhan paat ra guang takau maimbolo' bulintok ralalom pangaputan;

³⁵ Nakapandai Io paat ra itakau nairuan ra linonggom ondo' tinaakan Nano ritakau;

³⁶ paat ra katimpakan patumbalikon, maaru' Tuhan makapandai raginio.

³⁷ Kasagaan ru Tuhan ayuk ondo' masalok masauk.

³⁸ Baal moonsoi am malaat masauk ra susuban ru Tuhan ayuk.

³⁹ Kua kia pambutok takau paat ra ukumin sabap ra tula takau?

⁴⁰ Ibok no tutuno' takau kaayagan takau, am saguli' no ra Tuhan.

⁴¹ Ibok ukabo' guang takau ri Aki Kapuuno' giu' ra suruga' am pakiasi',

⁴² “Iou Tuhan, makatula akai noyo am giminuor Rirun, am kalo poyo nangampun Kou ramon.

⁴³ “Nangilou Kou ramon am namatoi Kou ramon; sangit Muno nampasibuni ra guang makaasi' Muno.

⁴⁴ Sangit Muno koson ra gaun ondo' makapal kaga', saboi kalo makalasut pakiasian.

⁴⁵ Pinasauk Mu akai koson ra ginsamol ra pagilangan ru titikop ru tana' ti.

⁴⁶ “Inasaban akai am inanja' ru ngaangai' pantula';

⁴⁷ linumpa' akai ru karaat am katutukan; maayag akai ralalom ru makalalaa' am malaa'.

⁴⁸ Lomou kuno tumilis koson ra sungoi sabap ra bansa' kuno natutuk noyo.

⁴⁹ “Lomou kuno kalo lumonggo' rumatu'

⁵⁰ saboi Tuhan intor ra suruga', magilong am mangimansa' ramon.

⁵¹ Guang kuno mangiluk paat magilong ra baal ondo' nasauk ra bala ruandu' giu' ra bandar mai.

⁵² “Linandak aku koson ra susuit ru pantula' ondo' masisang raki' ra kolondo' sasaban.

⁵³ Namatir ilo raki' ra naayag ayuk poyo ra ralalom ru luang ondo' malandom, am tinauban luang no ra batu.

⁵⁴ Siminimpor timug saboi ra ulu kuno, am nangkara' aku ra patayan kuno mamaar noyo.

⁵⁵ “Iou Tuhan, intor ra lonor ru luang ondo' malandom no mompogolok aku Rirun.

⁵⁶ Paat ra aku makiindangan Rirun, rongogon Mu golok kuno.

⁵⁷ Iowon Mu pakiasian kuno, am mindagu raki', ‘Pai' kalaa'.’

⁵⁸ Matong Kou manaung ra baal kuno, iou Tuhan, am mamayag Kou ra painawo kuno.

⁵⁹ Nakakito Kou ra kalaatan ondo' binaal raki'; ginio ra saungo' baal kuno.

⁶⁰ Nakapandai Kou ra pantula' masisang raki', am mangatang ra malaat raki'.

⁶¹ “Nokorongog Kou ra ilo magasab raki', iou Tuhan, nakapandai Kou ra ngaangai' inatang malaat nilo.

⁶² Nonsongorou ilo mansusunur raki', am mangatang koson mampajamar raki'.

⁶³ Intor ra susuab saboi ra mamai' magasab ilo raki'.

⁶⁴ “Iou Tuhan, ukumi' ilo nogondo' ra binaal nilo.

⁶⁵ Pagulas risilo am pampalawo ra guang nilo!

⁶⁶ Ilowo' ilo am pusoo' ilo intor ra tana' ti.”