SAGULION 9 - Tanou Moonsoi Timugon

Ulun ru Israil kalo giminagaya'

¹ “Rongogo' noyo, ulun ru Israil kau ngai'! Paat ra orou raiti' lumaup kau ra Sungoi Jordan, am mayan ra tana' ondo' linonggom ru bansa'-bansa' ondo' maayo poyo am maikang poyo intor ramuyun. Bandar-bandar nilo mangaayo, am timbok ru bandar-bandar no masawat saboi ra limbowon.

² Ulun ra giu' mangasawat am mangaikang; ilo no maayo ulun, am norongog min noyo ra kolondo' sangulun pana makagula' risilo.

³ Kaa' raino nakito min galama' ra Tuhan i Aki Kapuuno' min nagulu ramuyun koson ra apui ondo' mapaang. Kalaan No ilo liliwa' akau jumalai, maa' raginio makapapagiru' kau am mamuso risilo ra mataki', koson ondo' binantu' Nali.

⁴ Mopongo Tuhan i Aki Kapuuno' min nampagiru' risilo ra bala min, pai' indagu ra akau galama' ra magibit Io ramuyun mongoi ra tana' raginio koson mangalap ra tana' no sabap maaya' kau. Sala' ka koson raginio! Mampagiru' Tuhan ra bansa'-bansa' no ra tayar min sabap malaat ilo.

⁵ Nangiou Tuhan ramuyun mangalap ra tana' nilono sala' ka sabap ra moonsoi kau am nambaal ra motopot. Nampagiru' Tuhan risilo sabap malaat ilo, am sabap masaga' Io manugut ra nabantuan ondo' binaal Nano ra kinamatuaan min i Abragam, i Isak am i Jakub.

⁶ Pangintopot noyo ra sala' ka sabap ra maaya' kau, inanian kau ru Tuhan min ra tana' ondo' malabung. Sala' ka koson raginio! Akau totopot ulun ondo' bambalingatan.

⁷ Karaa' noyo ati kulaan akau nangkinibit ra Tuhan i Aki Kapuuno' min siminangit giu' ra tana' kaagisan. Intor ra akau nangiruan ra Misir saboi ra orou nasabayan min ragiti, giminuor kau Riso.

⁸ Mulu' poyo giu' ra Gunung Sinai pana nangkinibit kau ra Tuhan siminangit saboi masaga' Io mamuso ramuyun.

⁹ Nagaloi aku ra gunung raginio koson nangapu ra ruo batu tulis ondo' tinulisan ra nabantuan ondo' binaal ru Tuhan ramuyun. Minayan aku ra giu' buoi apat ngoopor ngoorou am apat ngoopor ngorondom, am kalo nangakan kapoam nanginum aku ra atan pana.

¹⁰ Kopongo raginio nanaak Tuhan raki' ra ruo batu tulis raginio. Tinulisan No ra kalindu' Nano galama' batu-batu no ra atan ondo' rinagu Nano ramuyun intor ra apui, paat akau timinimung giu' ra lonson toojo ru gunung.

¹¹ Nalupus apat ngoopor ngoorou am apat ngoopor ngorondom, nanaak Tuhan raki' ra ruo batu tulis raginio. Tinulisan No batu tulis no ra nabantuan no.

¹² Kopongo raginio indagu Tuhan raki', ‘Kataki' noyo tuun giu' ra lonson toojo ru gunung, sabap ulun ondo' tiningganai muno miningkual intor ra Misir no nambaal noyo ra malaat. Timinalikur ilo noyo intor ra susuban Kuno, am nambaal noyo ra rondo' sinungkalalaing tayar nilo galama'.’

¹³ Indagu poyo Tuhan raki', ‘Nakapandai Aku ra mapara' bambalingatan ulun ragitio.

¹⁴ Pai' kinam manginga' Raki'. Makaguang Aku mamuso risilo maa' raginio kolondo' sangulun pana mangkara' boo risilo. Okou pana saukon Ku ra ama' ru rondo' bansa' ondo' maayo poyo am maikang poyo intor risilo.’

¹⁵ Aku pana tumuun intor ra gunung no liliwa' nagibit ra ruo batu tulis ondo' tinulisan ra nabantuan no. Apui ondo' bibilak makito giu' ra gunung no.

¹⁶ Nakito ku mapara' mataki' akau minanggal noyo ra ukum ondo' tinaakan ru Tuhan i Aki Kapuuno' min am nakito ku ra akau makatula noyo Riso. Nambaal kau noyo ra rondo' sinungkalalaing intor ra logam tayar min galama', iono sinungkalalaing ondo' tinilu baal no ra sapi'.

¹⁷ Ginio ra, giu' talupak ru mato min, pinampasan ku ruo batu tulis i saboi nopopol-popol.

¹⁸ Kopongo raginio igondo' poyo kubu samba aku ra saang ru Tuhan buoi apat ngoopor ngoorou am apat ngoopor ngorondom, am kalo nangakan kapoam nanginum ra atan pana. Binaal kuno koson raginio sabap ra akau makatula noyo ra Tuhan am nangkinibit Riso siminangit.

¹⁹ Malaa' Aku ra sangit ru Tuhan, sabap siminangit Io kaga' saboi masaga' mamuso ramuyun, kaa' gitio pana riminongog Tuhan raki'.

²⁰ Siminangit kaga' Tuhan ri Arun saboi masaga' mamuso riso. Paat raginio niayuk boo, nakiasi' aku ra bala ri Arun.

²¹ Inalap ku kuliamos jajajou ondo' binaal min noyo, iono sapi' intor ra logam, am pinatiran ginio ralalom ru apui. Kopongo raginio pinilang-pilang am inumok ku nasauk ra kaau, am pinatiran ralalom ru sungoi ondo' timinilis intor ra gunung no.

²² Paat ra akau giu' ra Tabira, Masa, am Kibrot-Taawa, nangkinibit kau niayuk ra Tuhan i Aki Kapuuno' siminangit.

²³ Paat ra Io nanusub ramuyun nangiruan ra Kadis-Barnia ra susuban maa' raginio mayan ra tana' ondo' tinaakan Nano ramuyun, giminuor kau Riso. Kalo nangintopot am kalo giminagaya' kau Riso.

²⁴ Intor ra aku nakaulig ramuyun, magail kau gumuor ra Tuhan.

²⁵ Ginio ra samba kubu aku ra saang ru Tuhan buoi apat ngoopor ngoorou am apat ngoopor ngorondom, sabap nakapandai aku ra namatas Io koson mamuso ramuyun.

²⁶ Aku pana nakiasi' Riso, ‘Iou Tuhan Raja', pai' pusoo' ulun Muno, ondo' binayag Mu noyo am inibit miningkual intor ra Misir ra kaikangan am kuasa' Muno ondo' maayo.

²⁷ Karaa' noyo ulipon muno i Abragam, i Isak am i Jakub. Pai' lioo' bambalingatan, kalaatan am tula ru ulun ragitio.

²⁸ Amon mamuso Kou risilo, mindagu ulun ru Misir ra kalo masaga' Kou magibit ra ulun Muno mongoi ra tana' ondo' binantu' Muno risilo. Mindagu ilo ra magibit Kou ra ulun Muno mingkual intor ra tana' kaagisan koson mamatoi risilo, sabap masisang Kou risilo.

²⁹ Sala' ka kia ilo ti ulun ondo' pinili' Muno masauk ra ulun Muno galama'? Ilo noyo ondo' inibit Muno miningkual intor ra Misir ra kuasa' am kaikangan Muno ondo' maayo.’ ”