SAGULION 7 - Tanou Moonsoi Timugon

Ulun pinili' ri Aki Kapuuno'

¹ “Ibiton kau ru Tuhan i Aki Kapuuno' min mongoi ra tana' ondo' ayanin min, am mapagiru' Io ra masuang bansa' intor ra tana' raginio. Paat akau jumalai, mapagiru' Io ra tulu' bansa' ondo' maayo poyo am maikang poyo intor ramuyun: ulun ru Git, Girgasi, Amori, Kanaan, Piris, Giwi am Jibusi.

² Paat Tuhan i Aki Kapuuno' min napataak ra bansa'-bansa' ragitio ramuyun am kalaan min ilo, akau musiti' mamatoi risilo ngaangai'. Pai' pakimabantu' risilo, am pai' pakaasi' risilo.

³ Pai' paguot risilo, am pai' polosoo' anak-anak min maguot risilo,

⁴ sabap mapainggalur ilo ra anak-anak min intor ra Tuhan, saboi anak-anak min sumamba ra tuhan-tuhan ra bokon. Amon baal ragitio masauk, sumangit Tuhan ramuyun am pulaliin kau pusoo'.

⁵ Ginio ra puuto' min altar ru bansa'-bansa' raginio, popolo' min lugu' batu karamat, tuntuaro' noyo tatandu' ru Dewi Asyira am solobo' sinungkalalaing nilono.

⁶ Baalo' noyo baal raginio sabap akau longgom ru Tuhan i Aki Kapuuno' min. Intor ra ngaangai' bansa' ra tana' ti, nampili' Io ramuyun masauk ra ulun Nano ondo' tagamin.

⁷ “Motogom Tuhan ramuyun, am nampili' ramuyun sala' ka ra masuang kau poyo intor ra bansa'-bansa' ra bokon; sotopot no bansa' mino ondo' boborok kaga' ra tana' ti.

⁸ Kaa' motogom Tuhan ramuyun, am masaga' Io mangukop ra nabantuan ondo' binaal Nano ra kinamatuaan min. Ginio noyo sasaban ra Ilo namayag ramuyun ra kuasa' Nano ondo' maayo, am napalabus ramuyun intor ra inulipon ru raja' ru Misir.

⁹ Karaa' noyo ra Tuhan i Aki Kapuuno' min rorondo' ayuk i Aki Kapuuno', am toojo Io manutun. Manugut Io ra nabantuan Nano am magail mapakito ra togom Nano ra saribu papag ru ulun ondo' motogom Riso, am ondo' gumagaya' ra ukum Nano,

¹⁰ kaa' kalo pagantangan Io mangukum ra ulun ondo' masisang Riso.

¹¹ Ginio ra, gagayaa' noyo atan ondo' nangilaan ramuyun; gagayaa' noyo ngaangai' ukum ondo' taakin kuno ramuyun ra orou raiti'.”

Barakat tayar ra ulun ondo' gumagaya'

¹² “Amon mangkirongog kau ra ukum ragitio am baalon min ra gagaya', rumayus boo Tuhan i Aki Kapuuno' min manugut ra nabantuan ondo' binaal Nano ramuyun am mapakito ra togom Nano ramuyun, koson ondo' binantu' Nano ra kinamatuaan mini.

¹³ Motogom am mambarakat Io ramuyun, maa' raginio rumuang kau am makaalap kau ra masuang anak. Mambarakat Io ra umo min maa' raginio kaulian kau ra gandum, wain am umau jaitun. Mambarakat Io ramuyun am manaak ramuyun ra masuang bibiag tinambiag am domba. Manaak Io ramuyun ra ngaangai' barakat ti giu' ra tana' ondo' binantu' Nano ramuyun, sumugut ra bantu' Nano ra kinamatuaan min.

¹⁴ Kolondo' bansa' ra ati pana ra tana' ti ondo' barakaton ra malabaan koson ramuyun. Kolondo' sangulun pana ra gino ngai' min tabanang, am ngaangai' bibiag tinambiag min sumayat.

¹⁵ Mangampin Tuhan ramuyun intor ra ngaangai' maruol. Kalo mopoloso Io ramuyun marualan ra makalalaa' koson ondo' nailian min giu' ra Misir, kaa' mapalumpa' Io ra maruol raginio ra ngaangai' pantula' min.

¹⁶ Pusoo' noyo ngaangai' bansa' ondo' pataakon ru Tuhan i Aki Kapuuno' min ralalom ru kuasa' min, am pai' pakaasi' risilo. Pai' samba ra tuhan-tuhan nilo, sabap binaal raginio makaratong ra karaat.

¹⁷ “Pai' karaa' ra kinasuang ru bansa'-bansa' raginio masuang poyo intor ramuyun, am ra kalo makapapagiru' kau risilo.

¹⁸ Pai' kalaa' risilo. Karaa' noyo binaal ru Tuhan i Aki Kapuuno' min ra raja' ru Misir am ngaangai' mamagun nano.

¹⁹ Karaa' noyo karaat makalalaa' ondo' nakito min ra mato galama', kaimuagan am tatandu', am niayuk kuasa' maayo am kinapanggol ondo' pinakai ru Tuhan i Aki Kapuuno' min koson mapalabus ramuyun. Koson ra Io namuso ra ulun ru Misir ra galing i, koson niayuk raginio io mamuso ra ngaangai' bansa' ondo' kalaanin min raino.

²⁰ Mapatabual io ra pagalabaan ra popolos nilo am mamuso risilo ondo' nagiru' am minongoi pansibuni.

²¹ Ginio ra pai' kalaa' ra bansa'-bansa' raginio. Tuhan i Aki Kapuuno' min mabaya' ramuyun; Io i Aki Kapuuno' ondo' matulai, am ondo' musiti' kalaanin.

²² Ulitakon ru Tuhan i Aki Kapuuno' min mapagiru' ra bansa'-bansa' raginio paat akau jumalai. Kalo makapamuso kau risilo ra igondo' ayuk, sabap amon mambaal kau raginio, kinasuang ru bibiag mangasigo gumaai am masauk ra lolob ramuyun.

²³ Pataakon ru Tuhan ramuyun pantula', am mangkinibit Io risilo magalabo saboi pusoon ilo.

²⁴ Mapataak Io ra raja' nilono ramuyun. Potoyon min ilo, am lilianin ilo ru ulun. Kolondo' sangulun pana makapanginga' ramuyun; mamuso kau ra moonong ulun.

²⁵ Solobo' noyo sinungkalalaing nilo. Pai' gogoto' mas am pirok ondo' soroi ra sinungkalalaing nilo, am pai' alap ra kuliamos raginio tayar rirun galama'. Pai' kau pangalap raginio, malumpa' kau ra kapio, sabap masisang Tuhan ra sumamba ra sinungkalalaing.

²⁶ Pai' pagibit ra rondo' pana sinungkalalaing no ra baloi min. Amon magibit kau raginio, ulas ondo' lumumpa' ra sinungkalalaing no lumumpa' ramuyun niayuk. Akau musiti' masisang am magasab ra sinungkalalaing, sabap ulason sinungkalalaing no ru Tuhan.”