SAGULION 5 - Tanou Moonsoi Timugon

Mopor Ukum ri Aki Kapuuno'

¹ Nanimung i Musa ra ngaangai' ulun ru Israil am indagu risilo, “Akau ulun ru Israil, rongogo' noyo ngaangai' ukum ondo' taakin kutu ramuyun ra orou raiti'. Igila' noyo ra ngaangai' ukum ti am gagayaa' noyo ngaangai' no ra totopot.

² Nambaal noyo Tuhan i Aki Kapuuno' takau ra rondo' nabantuan ritakau giu' ra Gunung Sinai.

³ Nambaal Io ra nabantuan no sala' ka ayuk ra kinamatuaan takali kaa' ritakau niayuk, itakau ngaangai' ondo' naayag ra orou raiti'.

⁴ Giu' rasawat ru gunung no, intor ralalom ru apui, minindagu Tuhan rayus ramuyun.

⁵ Paat ragili nasauk aku ra mampasuku' min am Tuhan koson mampasaboi ra ragu Nano ramuyun, sabap malaa' kau ra apui no am kalo masaga' magaloi ra gunung. Indagu Tuhan,

⁶ ‘Aku noyo Tuhan i Aki Kapuuno' min ondo' nagibit ramuyun miningkual intor ra Misir, intok akau sinauk ra ulipon.

⁷ ‘Pai' samba ra tuhan-tuhan ra bokon; samba ayuk Aku.

⁸ ‘Pai' pambaal ra sinungkalalaing tayar rirun, sinungkalalaing ondo' salu ru atan pana ondo' soroi giu' ra limbowon, giti ra tana' ti, kapoam giu' ralalom ru timug ra ragana' ru tana' ti.

⁹ Pai' samba ra sinungkalalaing ru atan pana, kapoam mongompor raginio, sabap ra Aku noyo Tuhan i Aki Kapuuno' min am kalo masaga' Aku pogondoon ra atan pana. Mangukum Aku ra ulun ondo' masisang Raki'. Mangukum Aku niayuk ra papag nilo saboi ra sukor katalu am kaapat.

¹⁰ Kaa' pakitonon Ku togom Kuno ra riribu papag ondo' motogom Raki', am ondo' gumagaya' ra ukum Kuno.

¹¹ ‘Pai' sabito' inggalan Kuno ra kuayan ondo' malaat sabap Aku Tuhan i Aki Kapuuno' min, mangukum ra osoi ayuk ondo' mampajajou ra inggalan Kuno.

¹² ‘Iantako' noyo orou Sabat am urumato' noyo orou raginio koson orou ondo' matulai, koson ondo' nanusuban Kuno Tuhan i Aki Kapuuno' min.

¹³ Mokoondo' kau onom ngoorou mangandoi,

¹⁴ kaa' orou ondo' katulu' iono orou tangusan ondo' patimpokon Raki'. Paat orou raginio rondo' pana kalo pongondoyon: iou pana akau, anak mino, uliponon mino, bibiag tinambiag mino kapoam ulun bansa' ru bokon ondo' minayan giu' ra pagun min. Uliponon mino musiti' tumangus koson ramuyun.

¹⁵ Karaa' noyo ra galing i inulipon kau giu' ra pagun ru Misir, am Aku Tuhan i Aki Kapuuno' min napalabus ramuyun ra kuasa' am kaikangan Kuno ondo' maayo. Ginio sabap ra nanusub Aku ramuyun mangiantak ra orou Sabat.

¹⁶ ‘Urumato' noyo ama' am ina' mino, koson nanusuban Kuno Tuhan i Aki Kapuuno' min ramuyun, maa' raginio makakaansayan am maawar painawo giu' ra tana' ondo' taakin Kuno ramuyun.

¹⁷ ‘Pai' pamatoi.

¹⁸ ‘Pai' pansawa'.

¹⁹ ‘Pai' pantakou.

²⁰ ‘Pai' panaak ra inono' magabau intor ra ulun bokon.

²¹ ‘Pai' pangingkaut ra longgom ru ulun bokon: andu' nano, baloi nano, tana' nano, uliponon nano, bibiag tinambiag nano, kaladai nano kapoam atan pana longgom nano.’

²² “Ginio noyo ukum-ukum ondo' pinatinaak ru Tuhan ramuyun ngaangai' paat akau timinimung giu' ra gunung raginio. Paat Io minindagu ra bolos ondo' mosongou intor ra apui am gaun ondo' makapal no, nanaak Io ra ukum-ukum raginio ayuk. Io pana nanulis ra ukum-ukum raginio ra ruo batu tulis, am pinataak ginio raki'.”

Ulun ru Israil nangalaa'

²³ “Paat ra titikop ru gunung no natauban ru apui am norongog min bolos intor ra kalandaman raginio, tingganai-tingganai ru bansa' am tingganai-tingganai ru mamagun min minatong raki'

²⁴ am indagu, ‘Tuhan i Aki Kapuuno' takau nambala' ra kinaayo am katulayan Nano paat morongog takau ragu Nano intor ra apui no. Paat ra orou raiti' nakakito akai ra sasangulun magulayun maayag kabalu' pana minindagu noyo i Aki Kapuuno' riso.

²⁵ Kaa' kua kia musiti' mapataak poyo ra painawo? Apui ondo' makalalaa' no mamuso ramon. Maaru' matoi akai amon ru morongog mai Tuhan i Aki Kapuuno' takau mindagu poyo.

²⁶ Igondo' kia ulun magulayun maayag malupus mokorongog ri Aki Kapuuno' ondo' maayag intor ra apui?

²⁷ Okou Musa, ugar noyo am rongogo' noyo ngaangai' ondo' rinagu ru Tuhan i Aki Kapuuno' takau. Kopongo raginio saguli' noyo am balai' akai ra atan ondo' rinagu Nano rirun. Mangkirongog am gagayaan mai.’

²⁸ “Paat ra norongog ru Tuhan ragu mino, indagu Io raki', ‘Norongog Ku noyo atan rinagu ru ulun ragitio, am ragu-ragu nilono motopot.

²⁹ Mapara' bonsoi no amon ru magail ilo makaliman koson raginio. Mapara' bonsoi no amon ru magail ilo malaa' Raki' am gumagaya' ra ngaangai' susuban Kuno, maa' raginio ilo am papag nilo makakaansayan ra sabubuoi no.

³⁰ Ongoi noyo am susubo' ilo muli' ra kim ru sigagama'.

³¹ Kaa' okou, Musa, musiti' mayan ragiti mabaya' Raki'. Manaak Aku rirun ra ngaangai' ukum am susuban Kuno. Pailaa' ngaangai' no ra ulun raginio maa' raginio gumagaya' ilo raginio giu' ra pagun ondo' taakin Kuno risilo.’

³² “Akau ulun ru Israil, tutuno' ra baalon min ngaangai' ondo' nanusuban ru Tuhan i Aki Kapuuno' min. Pai' anggal ra rondo' pana ukum Nano.

³³ Gagayaa' noyo ngaangai' ondo' nanusuban ru Tuhan i Aki Kapuuno' min maa' raginio makakaansayan am maawar painawo min giu' ra tana' ondo' ayanin min.”