SAGULION 31 - Tanou Moonsoi Timugon

Nasauk i Josua suali ri Musa

^1-2 Rinayus ri Musa ragu nano ra ulun ru Israil, “Raino umur kutu maatus am ruo ngoopor ngambilor noyo. Kalo boo makaandar aku masauk ra tingganai min. Naruangan poyo ra minindagu noyo Tuhan raki' ra kalo makalaup aku ra Sungoi Jordan.

³ Tuhan i Aki Kapuuno' min galama' maningganai ramuyun am mamuso ra bansa'-bansa' ondo' minayan ra giu' no, maa' raginio makaayan kau ra tana' nilo. Masauk i Josua ra tingganai min, koson ra rinagu noyo ru Tuhan.

⁴ Tuhan galama' mamuso ra bansa'-bansa' no, koson ra Io nangala ra Raja' Sigon am Raja' Og, raja' ru ulun ru Amori, am niayuk namuso ra pagun nilo.

⁵ Tuhan manaak ramuyun ra kamanangan intor risilo. Pamakuan min risilo musiti' no motopot koson ra rinagu ku noyo ramuyun.

⁶ Musiti' kau mangintopot am baani. Pai' kalaa' ra bansa'-bansa' no. Tuhan i Aki Kapuuno' min mabaya' ramuyun. Io totopot kalo noyo maninduol ramuyun kapoam mangiruan ramuyun.”

⁷ I Musa pana nampiau ri Josua am indagu riso ra saang ru ngaangai' ulun ru Israil, “Musiti' kou mangintopot am baani. Okou noyo ondo' maningganai ra bansa' ti koson mayan ra tana' ondo' binantu' noyo ru Tuhan ra kinamatuaan nilo.

⁸ Tuhan galama' maningganai am mabaya' rirun. Totopot Io kalo noyo maninduol kapoam mangiruan rirun. Ginio ra, pai' kalaa' kapoam malawo guang.”

Ukum musiti' basaan ra moonong tulu' ngambilor igondo'

⁹ I Musa pana nanulis boo ra Ukum ri Aki Kapuuno' no am taaki' no ra imam-imam Liwi ondo' nanalingapu ra Kaban Nabantuan ru Tuhan am ra tingganai-tingganai ru ulun ru Israil.

¹⁰ Nanaak i Musa risilo ra susuban, “Paat ra pupus ru moonong bilor katulu', ralalom ru bilor pamusaan ra utang, basaa' noyo Ukum ti ra bolos mosongou paat ra Pangiantakan Mangkalukub ra Raun.

¹¹ Basaa' noyo Ukum ti ra ulun ru Israil paat ilo matong koson sumamba ra Tuhan i Aki Kapuuno' min giu' ra rondo' intok sambayangan no.

¹² Susubo' noyo ngaangai' ungkuyon, ruandu', lalaing-lalaing am ulun bansa' ru bokon ondo' minayan ra bandar min, maa' raginio ngaangai' ulun mokorongog ra pambasaan ru Ukum am migila' mangurumat ra Tuhan i Aki Kapuuno' min, am niayuk gumagaya' toojo ra pangilaan Nano.

¹³ Ginio ralan ru papag min ondo' kalo poyo igondo' nokorongog ra Ukum ru Tuhan i Aki Kapuuno' min mokorongog raginio. Ginio ra migila' ilo mangurumat ra Tuhan buoi ru bayag nilo giu' ra tana' ondo' ayanin min giu' ra sandaup ru Sungoi Jordan.”

Susuban pupus ondo' tinaakan ru Tuhan ri Musa

¹⁴ Tuhan pana mindagu ri Musa, “Bayag muno kalo boo mabuoi. Piawo' noyo i Josua am ibito' io ra Kim Kuno, maa' raginio makapanaak Aku ra panuluan riso.” Umpos i Musa am i Josua ra ralalom Kim ru Tuhan,

¹⁵ am minintalang Tuhan risilo ralalom lugu' ru gaun maar ra kulobon ru Kim ru Tuhan.

¹⁶ Indagu Tuhan ri Musa, “Kalo boo mabuoi matoi kou. Mopongo ra ugaran muno, bansa' ru Israil kalo boo gumagaya' Raki'. Lumungkang ilo ra nabantuan ondo' binaal Kuno risilo. Mangiruan ilo Raki' am sumamba ra tuhan-tuhan ondo' sambaan giu' ra tana' ondo' ayanin nilo ra mataki'.

¹⁷ Paat baal raginio masauk, sumangit Aku risilo. Mangiruan Aku risilo am mapuso ilo. Masuang karaat makalumpa' risilo; am makaliman ilo boo ra ngaangai' no masauk risilo sabap Aku, i Aki Kapuuno' nilo, kalo boo mabaya' risilo.

¹⁸ Paat raginio kalo boo masaga' Aku mangindangan risilo, sabap nambaal ilo noyo ra malaat am siminamba ra tuhan-tuhan ra bokon.

¹⁹ Raino tulisi' noyo rimbai ragitio am ilaa' ra ulun ru Israil. Rimbai ragitio masauk ra sasi' risilo.

²⁰ Magibit Aku risilo ra tana' ondo' langkaya' am malabung no koson ondo' binantu' Ku noyo ra kinamatuaan nilo. Giu' no makaalap ilo ra akanon ondo' pakuan nilo am matasu' kaayagan. Kaa' tumalikur ilo intor Raki' am sumamba ra tuhan-tuhan ra bokon. Mangimpai ilo Raki' am lumungkang ra nabantuan Kuno.

²¹ Masuang karaat makalalaa' makalumpa' risilo, kaa' rimbai ragitio magulayun rimbayon am masauk ra sasi' risilo. Mulu' ra raino pana, ra Aku kalo poyo magibit risilo ra tana' ondo' binantu' Kuno, nakapandai Aku noyo ra pangkaraan nilo.”

²² Paat orou raginio niayuk nanulis i Musa ra rimbai raginio am nangila' ra ulun ru Israil.

²³ Tuhan pana mindagu ri Josua anak ri Nun, “Okou musiti' mangintopot am baani. Okou maningganai ra ulun ru Israil mongoi ra tana' ondo' binantu' Ku noyo risilo, am mabaya' Aku rirun.”

²⁴ Nanulis i Musa ra Ukum ri Aki Kapuuno' ralalom ru rondo' Kitab. Nanulis io raginio ra nasusui intor ra talimpuun polos ra pupus.

²⁵ Kakai' io nanulis raginio, indagu io ra imam-imam ru Liwi ondo' nanalingapu ra Kaban Nabantuan ru Tuhan,

²⁶ “Alapo' noyo kitab ru Ukum ri Aki Kapuuno' ti am pabantaa' ginio ra sapapa' ru Kaban Nabantuan ru Tuhan i Aki Kapuuno' min, maa' raginio magulayun soroi ra giu' no koson masauk ra sasi' ra ulun ru Tuhan.

²⁷ Nakapandai aku ra mapara' bambalingatan ulun ragitilo. Magail ilo gumuor. Giminuor ilo noyo ra Tuhan paat ra bayag kuno, am maaru' gumaai ilo gumuor malupus ra aku matoi.

²⁸ Raino susubo' noyo ngaangai' tingganai ru bansa' am pagawai tumimung ra saang kuno, maa' raginio mabalaan ku ilo ra baal-baal ragitio. Mampiau aku ra limbowon am tana' masauk ra sasi' kuno risilo.

²⁹ Makapandai aku ra malupus aku matoi, lumaat ilo am mangimpai ra atan ondo' nangilaan kuno. Paat ra tauli no malumpa' ilo ra karaat, sabap nangkinibit ilo ra Tuhan sumangit ra mambaal ra atan ondo' inggalarin Nano.”

Rimbai ri Musa

³⁰ I Musa pana mindagu ra ngaangai' rimbai ti liliwa' ulun ru Israil mangkirongog raginio.