SAGULION 28 - Tanou Moonsoi Timugon

Barakat tayar ru ulun ondo' gumagaya'

¹ “Amon ru gumagaya' kau ra Tuhan i Aki Kapuuno' min, am totopot mambaal ra ngaangai' panusuban Nano ondo' taakin kuno ramuyun ra orou raiti', am Io pana mapasauk ramuyun ra bansa' ondo' mauligan kaga' ra tana'.

² Gagayaa' noyo Tuhan i Aki Kapuuno' min, am ngaangai' barakat ti pataakon ramuyun:

³ “Barakatin noyo bandar am umo min.

⁴ “Barakatin noyo akau saboi masuang anak min, ampos ru tatanom min maulian am masuang sapi' am niayuk domba min.

⁵ “Barakatin noyo kumoson ra gandum min, am akanon min ondo' binaal intor raginio.

⁶ “Barakatin noyo ngaangai' pirot min.

⁷ “Kalaan ru Tuhan pantula' paat ra ilo mamulunsar ramuyun. Mamulunsar ilo ra inatang, kaa' tauli mantuliar ra magiru'.

⁸ “Mambarakat Tuhan i Aki Kapuuno' min ra pirot min am mamanu' ra gudang min ra gandum. Mambarakat Io ramuyun giu' ra tana' ondo' taakin Nano ramuyun.

⁹ Amon ru gumagaya' kau ra Tuhan i Aki Kapuuno' min am mambaal ra ngaangai' panusuban Nano, mapasauk Io ramuyun ra ulun Nano galama' koson ondo' binantu' Nano.

¹⁰ Kopongo raginio ngaangai' bansa' ra tana' ti makapandai ra nampili' noyo Tuhan ramuyun masauk ra ulun Nano galama', am malaa' ilo ramuyun.

¹¹ Tuhan manaak ramuyun ra masuang anak. Bibiag tinambiag min sumuang, am ampos ru tatanom min maulian giu' ra tana' ondo' binantu' ru Tuhan ra kinamatuaan min koson pataakon ramuyun.

¹² Tuhan mamparatu' ra rasam ra bulintok nano intor ra intok pambulian ra rasam giu' ra limbowon; mambarakat Io ra ngaangai' kandoi min maa' raginio makapapaira' kau ra masuang bansa', kaa' akau galama' kalo boo magira' ra atan pana intor ra osoi pana.

¹³ Tuhan i Aki Kapuuno' min mapasauk ramuyun ra tingganai ra gino ngai' ru bansa'-bansa' am sala' ka maamaya'. Magail kau makasugut am kalo igondo' kasulang, amon ru gumagaya' kau toojo ra ngaangai' susuban ru Tuhan ondo' taakin kuno ramuyun ra orou raiti'.

¹⁴ Kaa' pai' noyo lingon anggal ra panusuban no ra atan pana ralan, am pai' samba ra tuhan-tuhan ra bokon.”

Kinibit ru kalo gumagaya'

¹⁵ “Kaa' amon kalo gumagaya' kau ra Tuhan i Aki Kapuuno' min am kalo mambaal toojo ra ngaangai' panusuban am ukum Nano ondo' taakin kuno ramuyun ra orou raiti', am ngaangai' ulas ti makasulung ramuyun:

¹⁶ “Kaulas noyo bandar am umo min.

¹⁷ “Kaulas noyo kumoson ru gandum min, am akanon ondo' baalon min intor ra gandum no.

¹⁸ “Kaulas noyo akau saboi sanganu ayuk anak min, ampos ru tatanom min sanganu am sapi' am niayuk domba min kalo masuang.

¹⁹ “Kaulas noyo ngaangai' kandoi min.

²⁰ “Amon nambaal kau ra malaat am mangimpai ra Tuhan, maparatong Io ra karaat, kajajawan am kapaganan ralalom ru ngaangai' kandoi min, saboi ralalom sangkinolor ayuk, mapuso kau kalingon.

²¹ Maparatong Io ra maruol-maruol ramuyun, saboi kolondo' sangulun pana ra popolos mino matatang ra tana' ondo' ayanin mino.

²² Mangukum Tuhan ramuyun ra maruol-maruol ondo' tumapik, lanit-lanit am salom. Maparatong Tuhan ra tampio am angin malasu' saboi kumoson min mapuso. Karaat-karaat marayus lumumpa' ramuyun saboi kau matoi.

²³ Kalo rumasam am tana' min masauk ra mokotog koson ra basi'.

²⁴ Kalo parasamon ru Tuhan, kaa' rasam ru kaau am rasam ru agis saboi makai' kau kaluus.

²⁵ “Tuhan mopoloso ramuyun kalaan ru pantula'. Mangatang kau ra bulunsar ra pantula', kaa' pantuliar boo ra magiru'. Ngaangai' bansa' ra tana' ti malaa' magilong ra sauk ondo' makalumpa' ramuyun.

²⁶ Paat ra akau matoi, susuit am bibiag masigo matong am mangakan ra baangkai min. Kolondo' sangulun pana mangunjau ra susuit am bibiag raginio.

²⁷ Maparatong Tuhan ra talipos ra inan min koson ondo' binaal Nano ra ulun ru Misir ragili. Nalimpot kungkung min ra kagal am kogom ondo' maatol, kaa' kolondo' tatapis no.

²⁸ Tuhan mangkinibit ramuyun ra mantuyang am mapasauk ramuyun ra bolou am niayuk maubong.

²⁹ Paat ra matawang, matukangkam kau koson ra ulun bolou, am kalo makauyum kau ra ralan. Atan pana baalon min, kalo makasugut kau. Magail kau imboloon am takawin, am kolondo' mangindangan ramuyun.

³⁰ “Makatamung kou sangulun ralaa, kaa' ulun ra bokon maguot riso. Manambaloi kou, kaa' kalo maayanan mu. Mantanom kou ra puun ru anggur, kaa' kalo makaakan kou ra kawa' no.

³¹ Simbaluyon sapi' muno ra talupak ru mato muno, kaa' kalo makaakan kou ra sanganu pana kual no. Ralaaton kaladai muno liliwa' tantangin mu, kaa' kalo pasagulion kaladai no rirun. Pataakon domba muno ra pantula', am kolondo' sangulun pana makaindangan rirun.

³² Ra talupak ru mato min, anak-anak min, iou ra ungkuyon am ruandu', pataakon koson ra ulipon ra ulun bansa' ru bokon. Moonong orou, mapari' mato min maguyum ra anak-anak min, kaa' pirot mino banangan ak, sabap kalo sumaguli' ilo.

³³ Talingaawon ru bansa' ru bokon ngaangai' ampos ru tatanom ondo' piniratan min toojo. Akau galama' kalo mangapu ra rondo' pana, kaa' pangimbalaan ondo' mararayus am baal kalaatan.

³⁴ Kaimbalaan mangkinibit ramuyun mantuyang.

³⁵ Nalimpot kalayam min ra kagal ondo' maruol, am kalo mababas. Mantalipos kau intor ra pompor ru kalayam saboi ra pompor ru abuk.

³⁶ “Tuhan mamatir ramuyun am raja' min giu' ra pagun ru bansa' ru bokon, intok ondo' kalo igondo' kasauk ra ayanan min kapoam kinamatuaan min. Giu' no mangandoi kau ra tuhan-tuhan ondo' binaal intor ra tataun am batu.

³⁷ Giu' ra pagun-pagun intok napatuliaran ru Tuhan ramuyun, makatigog ulun magilong ra baal ondo' nasauk ramuyun. Magagasab am manauyu' ilo ramuyun.

³⁸ “Mantanom kau ra masuang sampug, kaa' sanganu ayuk kumoson sabap ra akanon ru gapu' ampos ru tatanom min.

³⁹ Mantanom kau ra anggur am magalung ra anggur no, kaa' kalo mangupu' kau ra kawa' ru anggur kapoam manginum ra wain, sabap akanon ru ulor puun ru anggur no.

⁴⁰ Puun-puun ru jaitun tumuu' ra titikop ru pagun min kaa' kalo makaalap kau ra umau no sabap matutu' kawa' no.

⁴¹ Mokoondo' kau ra anak ungkuyon am ruandu', kaa' mailusan kau risilo sabap ibiton ilo mugar koson ra ulun rinakop ra pangayawan.

⁴² Ngaangai' puun am tatanom min akanon ru bibiag malumot.

⁴³ “Ulun bansa' ru bokon ondo' minayan ra pagun mino lumanja' makakuasa', kaa' akau lumanja' lumiot kuasa'.

⁴⁴ Makaruit ilo koson pairain ramuyun, kaa' akau kolondo' atan pana koson pairain risilo. Pupus no, mamarinta ilo ramuyun.

⁴⁵ “Ngaangai' ulas no sumulung ramuyun saboi ra akau mapuso, sabap ra kalo gumagaya' kau ra Tuhan i Aki Kapuuno' min am kalo maya' ra ngaangai' ukum ondo' taakin Nano ramuyun.

⁴⁶ Karaat-karaat masauk ra inono' ru ukuman ru Tuhan ramuyun am papag min ra sabubuoi no.

⁴⁷ Tuhan i Aki Kapuuno' min nambarakat noyo ramuyun ralalom ru ngaangai' baal, kaa' kalo mangandoi kau Riso ra guang masaga' am maansukan.

⁴⁸ Ginio ra mangandoi kau ra pantula' ondo' porotongon ru Tuhan koson gumula' ramuyun. Maitilan kau, paason am magibaang; matutusan kau ra ngaangai' no. Mangimbolo' Tuhan ramuyun ra malaat saboi ra maluus kau.

⁴⁹ Maparatong Tuhan ra rondo' bansa' intor ra pompor ru tana' koson gumula' ramuyun, bansa' ondo' ragu nano kalo maratian min. Koson ra kanui, manumbit ilo ramuyun.

⁵⁰ Malaat ilo am kalo makaasi' ra osoi pana, iou ra ulun matutuo am ra lalaing-lalaing.

⁵¹ Mangalap ilo ra bibiag tinambiag am ampos ru tatanom min, kaa' matoi kau ra maitilan. Kalo manatang ilo ramuyun ra gandum, wain, umau jaitun, sapi' kapoam domba am matoi kau.

⁵² Mamulunsar ilo ra moonong bandar giu' ra tana' ondo' taakin ramuyun ru Tuhan i Aki Kapuuno' min, am timbok-timbok masawat am niayuk mapiot ondo' lalansanin min mangalunsai.

⁵³ “Paat ra pantula' magawang ra bandar min, malawo guang min sabap ra maitilan saboi mangakan kau ra anak ondo' pinataak ramuyun ru Tuhan i Aki Kapuuno' min.

^54-55 Mulu' piboo ra sangulun ungkuyon moonsoi ondo' matanda' kaga' paliso nano, majajalan kaga' paat awangin bandar no, saboi mangakan io ra anak-anak nano galama' sabap ra kolondo' boo akanon ra bokon. Kalo masaga' io mantayar ra pabukat nano sanganu pana, kapoam andu' ondo' tagamin nano, kapoam anak-anak nano ondo' lakat poyo maayag.

^56-57 Mulu' piboo ra sangulun ruandu' moonsoi ondo' matanda' kaga' paliso nano, am langkaya' kaga' saboi kalo poyo igondo' mantana' mongoi ra ati intok, masauk koson raginio niayuk. Paat ra pantula' magawang ra bandar nano, majajalan io kaga' sabap maitilan, saboi ra suminok io mangakan ra lalagang ondo' bagu inanak nano, am niayuk supu ru lalagang no. Kalo masaga' io mantayar ra ralaki ondo' tagamin nano, kapoam ra anak-anak nano ondo' lakat poyo maayag.

⁵⁸ “Amon ru kalo totopot kau gumagaya' ra ngaangai' susuban ri Aki Kapuuno' ondo' natulisan ralalom ru kitab ti, am kalo mangurumat ra Tuhan i Aki Kapuuno' min ondo' maayo am makaimuag no,

⁵⁹ maparatong Io ramuyun am papag min ra maruol ondo' kalo maalap kababas am maruol tumapik ondo' kalo maalap ra longgo'.

⁶⁰ Io mampalumpa' ramuyun ra ngaangai' maruol ondo' makalalaa' ondo' kalaanin min giu' ra Misir ragili. Kalo mababas kau intor ra maruol raginio.

⁶¹ Maparatong Tuhan ra mansalinut maruol am maruol tumapik ondo' kalo sinabit ralalom ru kitab ti, ondo' makasuang ra ukum am pangilaan ri Aki Kapuuno'. Akau pana pusoon boo.

⁶² Kabalu' pana akau sinauk koson ra kinasuang ru butitin giu' ra limbowon, kaa' sanganu ayuk ulun ra gino ngai' min mabayag, sabap ra akau kalo gumagaya' ra Tuhan i Aki Kapuuno' min.

⁶³ Koson ra Tuhan masaga' mapasauk ramuyun ra langkaya' am nampakasuang ramuyun, koson raginio niayuk Io masaga' mamuso am mapaluus ramuyun. Kalo bubulon kau intor ra tana' ondo' kalo boo mabuoi maayanan min.

⁶⁴ Pantutuliaron kau ru Tuhan ra gino ngai' ru bansa'-bansa' ra titikop ru tana' ti. Giu' no mangandoi kau ra tuhan-tuhan ondo' binaal intor ra tataun am batu, tuhan-tuhan ondo' kalo igondo' kau samba kapoam sinamba ru kinamatuaan min.

⁶⁵ Ra gino ngai' ru bansa'-bansa', kalo makaalap kau ra kamiaan am kolondo' intok ondo' maalap min kasabit ra akau tatangan; Tuhan mangkinibit ramuyun magalabo, malawo guang am malaa'.

⁶⁶ Bayag mino masalok makalalaa'. Matawang am molondom kalaanan ngai' min ak, magail kau malaa' ra kapatayan.

⁶⁷ Atan ayuk ilain min mangkinibit ra guang min monontol sabap ra malaa'. Moonong susuab ti malansan kau ra molondom, am moonong rondom malansan kau ra susuab ti.

⁶⁸ Atarin kau saguli' ru Tuhan ra Misir paayaan ra kapal, kabalu' pana minindagu Io ra kalo boo mongoi ra giu'. Giu' no kuminam kau mantalan ra inan koson ra ulipon ra pantula', kaa' kolondo' sangulun pana ondo' masaga' mambali ramuyun.”