SAGULION 24 - Tanou Moonsoi Timugon

Pangalian am paguatan saguli'

¹ Amon naguot sangulun ungkuyon ra sangulun ruandu', am kapandayi' no ra rorondo' ondo' kalo kasagain no ra andu' nano. Ginio ra nanaak ungkuyon no riso ra surat pangalian am pinagiru' io intor ra baloi nano.

² Kopongo raginio inandu' poyo ruandu' no ru sangulun ungkuyon ra bokon.

³ Kaa' kalupus kukula' buoi, ungkuyon raginio niayuk kalo boo masaga' riso. Ungkuyon no pana nanaak riso ra surat pangalian am pinagiru' io intor ra baloi nano. Kapoam maaru' lair niayuk ra ungkuyon ra karuo no minatoi.

⁴ Ralalom ru karuruo baal raginio, ralaki kasaa' ru ruandu' no kalo iowon maguot poyo riso. Ralaki no musiti' mangkara' riso koson ra ruandu' ondo' jinamol noyo. Amon ru maguot poyo ungkuyon no ra ruandu' no, baal raginio masauk ra rondo' pagasaban ra Tuhan. Kalo iowon kau mambaal ra tula ra makalalaa' raginio giu' ra tana' ondo' pataakon ramuyun ru Tuhan i Aki Kapuuno' min.”

Mansalinut aturan

⁵ “Sangulun ungkuyon ondo' bagu ayuk naguot kalo susubon masauk ra saujor kapoam kandoi ra inaru' ra bokon. Musiti' io aniin ra kalabusan buoi sambilor maa' raginio makapanalingapu io ra baloi nano am mapabansuk ra guang ru andu' nano.

⁶ Paat ra mapaira' kau ra rorondo' ra sasangulun, kalo iowon kau mangalap ra batu kinsaran nano ondo' pakayon manginsar ra gandum, koson ra jaminan. Ra mangalap raginio gumaau kau ra kuliamos ondo' pakayon ru sasambaloi nano koson manampos ra akanon tayar panunggul ra bayag.

⁷ Osoi ondo' mantakou ra ulun ra gino ngai' ulun ru Israil, am napasauk ra ulun no ra ulipon nano, kapoam nantalan riso koson ra ulipon, ulun mantakou ra ulun no musiti' ukumin ra matoi. Koson raginio noyo ra akau namuso ra kalaatan raginio.

⁸ Paat ra akau marualan ra maruol ru kungkung ondo' makalalaa', baalo' ra matanda' atan ondo' panusuban ramuyun ru imam bansa' ru Liwi. Bayaa' noyo panuluan-panuluan ondo' pinataakan ku noyo risilo.

⁹ Karaa' noyo atan ondo' binaal ru Tuhan i Aki Kapuuno' min ri Miriam ralalom pangkiralanan min intor ra Misir.

¹⁰ Paat ra akau mapaira' rorondo' ra sasangulun, pai' umpos ra baloi nano koson mangalap ra bayang ondo' pataakon nano ramuyun koson ra jaminan.

¹¹ Paginaa ra liwar; polosoon noyo ulun no galama' magibit raginio ramuyun.

¹² Amon ulun no musikin, pai' bulii' bayang no saboi ra suabon no.

¹³ Pasagulio' noyo bayang no riso moonong rondom maa' raginio mabayang no ra mombolong. Ra koson raginio, maringkuanang ulun no ramuyun am maansayan ramuyun Tuhan i Aki Kapuuno' min.

¹⁴ Pai' ruungo' ulun gajiin ondo' musikin am natutusan, iou ra io gino ngai' ulun ru Israil kabalu' pana ulun bansa' ru bokon ondo' minayan ra rondo' ra bandar min.

¹⁵ Moonong orou ra kalo poyo tumolop mato ru orou, gajiin io noyo tayar ru kandoi ra orou raginio. Makapakuan io ra gaji' no am malansan ra maapu' no. Amon kalo aniin min io ra gaji', mambala' io ra Tuhan intor akau, am raguon kau ra makatula.

¹⁶ Matuo kalo maukum ra matoi sabap ra kalaatan ondo' binaal ru anak nilo, am anak niayuk kalo maukum ra matoi sabap ra kalaatan ondo' binaal ru matuo nilo. Moonong ulun maukum ayuk ra matoi sabap ra kalaatan ondo' binaal nano galama'.

¹⁷ Pai' talingaawo' kaapuan ru ulun bansa' ru bokon am anak nailusan ra matuo. Pai' alapo' bayang ru sangulun napuor koson ra jaminan ru utang nano.

¹⁸ Karaa' noyo, nakaili' kau nasauk ra ulipon giu' ra Misir am pinalabus kau noyo ru Tuhan i Aki Kapuuno' min. Ginio sabap ra nanaak aku ramuyun ra aturan ragitio.

¹⁹ Paat ra akau mangumung ra ampos ru kumoson min, am nakalilian nagibit ra sabangkos gandum, pai' rulio' koson mangalap raginio. Polosoon noyo gandum no tatangon ra ulun bansa' ru bokon, anak nailusan ra matuo am napuor, maa' raginio mambarakat Tuhan i Aki Kapuuno' min ra ngaangai' baalon min.

²⁰ Mopongo ra akau igondo' mangupu' ra kawa' jaitun min, pai' rulio' koson mangupu' ra kawa' ondo' natatang. Kawa'-kawa' raginio tayar ru ulun bansa' ru bokon, anak nailusan ra matuo am napuor.

²¹ Mopongo ra akau igondo' mangupu' ra kawa' ru anggur min, pai' rulio' koson mangupu' ra kawa' ondo' natatang. Kawa'-kawa' raginio tayar ru ulun bansa' ru bokon, anak nailusan ra matuo am napuor.

²² Pai' toojo makalilian ra nakaili' kau nasauk ra ulipon giu' ra Misir. Ginio noyo sabap ra nanaak aku ramuyun ra aturan ragitio.