SAGULION 22 - Tanou Moonsoi Timugon

¹ “Amon ru mokoondo' nakalayau ra sapi' kapoam domba, ondo' tatangan no ulun sabansa' muno, am nakito mu bibiag no, pai' itambingai ra kalo nakapandai, kaa' ibito' noyo saguli' bibiag no ra tatangan no.

² Amon ru minayan tatangan no ra maalur, kapoam kalo nakapandai kau ra osoi tatangan no, ibito' bibiag no ra baloi min. Paat ra matong tatangan ra bibiag no maguyum, pataako' riso bibiag no.

³ Koson niayuk ondo' musiti' baalon amon ru makatuum kau ra kaladai, bayang kapoam atan ayuk tatangan no ulun sabansa' min.

⁴ “Amon ru kaladai kapoam sapi' naaba' ra ralan tatangan no ulun sabansa' min, pai' itambingai ra kalo nakapandai. Indangano' io mapabigor saguli' ra bibiag no.

⁵ “Ruandu' kalo iowon mambayang ra bayang ru ungkuyon, am ungkuyon kalo iowon mambayang ra bayang ru ruandu'; masisang Tuhan i Aki Kapuuno' min ra ulun ondo' mambaal koson raginio.

⁶ “Amon ru makito min bunsut ru susuit giu' rasawat ru puun kapoam rasawat ru tana', am puunan ru susuit tatanga' mamut kapoam mabaya' ra anak-anak nano, pai' rokopo' puunan ru susuit no.

⁷ Maalap min anak-anak ru susuit no, kaa' musiti' min palabuson puunan ru susuit, maa' raginio akau maawar painawo am makakaansayan.

⁸ “Paat ra akau mambaal ra baloi bagu, musiti' kau manginsor ra liput ru kiing ru taap ru baloi no. Koson raginio kalo pinalansan kau ra amon maratu' sasangulun intor ra rasawat ru taap am matoi.

⁹ “Pai' pantanom ra sampug ra bokon giu' ra umo ru anggur min ondo' ayuk am puun ru anggur. Amon ru mantanom kau ra sampug ra bokon, kalo iowon kau mangalap ra ampos ru anggur kapoam ampos ru tinanom ra bokon no.

¹⁰ “Pai' patuopo' sanginan sapi' am sanginan kaladai ra rondo' radu'.

¹¹ “Pai' pambayang ra ondo' binaal intor ra bulu domba am linon ra rondo' tenunan.

¹² “Pikito' noyo rumbai-rumbai ra kaapat-apat pompor ru bayang min.”

Aturan intor ra lampit ru ungkuyon am ruandu'

¹³ “Amon ru mokoondo' sangulun ungkuyon maguot ra sangulun ralaa, am malupus raginio kalo boo masaga' ungkuyon no ra ralaa no.

¹⁴ Ginio ra nambaal ungkuyon no ra panguwan magabau ra andu' nano sala' ka ralaa paat ra ilo naguot.

¹⁵ “Ralalom ru baal raginio musiti' matuo ru ruandu' no mangalap ra konoon ondo' makararaa' koson ra inono' ra ruandu' no ralaa toojo paat ra paguguatan nano. Musiti' mapakito ilo ra konoon no ra tingganai-tingganai ru bandar ra intok pangakiman.

¹⁶ Mindagu ama' ru ruandu' no, ‘Pinawatan ku anak kuno ra ungkuyon ragitio, kaa' raino kalo boo masaga' io riso.

¹⁷ Nambaal io ra panguwan magabau ra anak ruandu' kuno sala' ka ralaa toojo paat ilo naguot. Kaa' ilai' noyo raraa' ra konoon ti; gitio noyo inono' ra anak kuno topot ralaa toojo paat ragili.’

¹⁸ Tingganai-tingganai ru bandar pana musiti' mampiau ra ungkuyon no am mapalamba' riso.

¹⁹ Musiti' ilo niayuk mantagi' ra ungkuyon no suang maatus ngampila' ruit pirok. Musiti' pataakon ruit no ra iwan ungkuyon nano, sabap ra napakauyu' ungkuyon no ra sangulun ruandu' ru Israil. Ra am poyo, magulayun ruandu' no masauk ra andu' ru ungkuyon no am kalo maali buoi ru bayag nano.

²⁰ “Kaa' amon ru panguwan ru ulun no motopot, am kolondo' inono' ra ruandu' no lakat poyo ralaa toojo paat io inuot,

²¹ tingganai-tingganai ru bandar no pana musiti' magibit ra ruandu' no giu' ra kulobon ru baloi ru matuo nano. Ungkuyon ru bandar no pana musiti' momobol riso saboi matoi, sabap nambaal io ra baal mapakauyu' ra gino ngai' ru bansa' takau. Nakimarulug io noyo ra kalo poyo nawot, paat ra io lakat poyo soroi ra baloi ru ama' nano. Koson raginio noyo akau namuso ra kalaatan no.

²² “Amon ru sangulun ungkuyon narampatan paat narulug ra andu' ru ulun bokon, ilo karuruo musiti' ukumin ra matoi. Koson raginio noyo akau namuso ra kalaatan no.

²³ “Amon ru giu' ra rondo' bandar mokoondo' sangulun ungkuyon narampatan paat ra narulug ra sangulun ralaa ondo' nantamung noyo ra ulun bokon,

²⁴ musiti' min ibiton ilo ruo ra liwar ru bandar am bobolon ilo saboi matoi. Ralaa no musiti' ukumin ra matoi sabap ra kalo giminolok io makiindangan kabalu' pana soroi io ralalom ru bandar, am bolos nano maluoi rongogon ru ulun. Ungkuyon no musiti' niayuk ukumin ra matoi sabap narulug io ra sangulun ralaa ondo' nantamung noyo. Koson raginio noyo akau namuso ra kalaatan no.

²⁵ “Kaa' suai baal no amon ru giu' ra intok ru liwar bandar, nanawa' sangulun ungkuyon ra sangulun ralaa ondo' nantamung noyo ra ulun bokon. Ralalom ru baal raginio ungkuyon no ayuk ondo' musiti' ukumin ra matoi.

²⁶ Kalo maukum ralaa no, sabap ra kalo nambaal io ra rorondo' ondo' mangkinibit ra io ukumin ra matoi. Baal ragitio nogondo' ra baal ru sangulun ondo' namulunsar ra ulun bokon am namatoi riso.

²⁷ Sinawa' ralaa no giu' ra intok ru liwar bandar, am kabalu' pana giminolok io nakiindangan, kolondo' sangulun pana nakapangindangan riso.

²⁸ “Amon ru mokoondo' sangulun ungkuyon narampatan paat nanawa' ra sangulun ralaa ondo' kalo poyo nantamung,

²⁹ am ralalom ru baal raginio musiti' ungkuyon no mambayar ra mulo suang limo ngoopor ngampila' ruit pirok ra ama' ru ralaa no. Ralaa no musiti' masauk ra andu' ru ungkuyon no, sabap ra nampajajal noyo ungkuyon no riso ra nakimarulug riso. Buoi ru ungkuyon no maayag, kalo iowon io mangali ra andu' nano.

³⁰ “Kolondo' sangulun pana makapanuyu' ra ama' nano ra rumulug ra sangulun intor ra andu' ru ama' nano.”