SAGULION 20 - Tanou Moonsoi Timugon

Aturan intor ra pangayawan

¹ “Paat ra akau mingkual koson mangayou ra pantula' min, pai' kalaa' paat akau makakito ra kurita' kuda, kuda am saujor ru pantula' ondo' masuang poyo intor ramuyun. Namayag noyo ramuyun Tuhan i Aki Kapuuno' min intor ra Misir mabaya' ramuyun.

² Ra akau kalo poyo tumalimpuun mangayou, sangulun imam musiti' jumalai am mindagu ra pulalai ru saujor,

³ ‘Rongogo' noyo, ulun ru Israil kau ngai'! Orou raiti' mangayou kau. Pai' kalaa' ra pantula', pai' katatak ambiluo am pai' pagalabo.

⁴ Tuhan i Aki Kapuuno' min mabaya' ramuyun; manaak Io ramuyun ra kamanangan.’

⁵ Kopongo raginio pagawai-pagawai ru saujor mindagu ra pulalai no, ‘Mokoondo' osoi kia ragiti ondo' bagu nambaal ra baloi am kalo poyo napaugar ra upacara pampalasuan ra rapuan? Amon mokoondo', polosoon io muli'. Amon kalo maaru' lair matoi io ra pangayawan am ulun ra bokon mayan ra baloi nano.

⁶ Mokoondo' osoi kia ragiti ondo' bagu nanangumo ra anggur am kalo poyo igondo' pangupu' ra kawa' no? Amon mokoondo', polosoon io muli'. Amon kalo, maaru' matoi io ra pangayawan am ulun ra bokon makasia' ra ampos ru umo ru anggur no.

⁷ Mokoondo' osoi kia ragiti ondo' nantamung kapoam naguot noyo? Amon mokoondo', polosoon io muli. Amon kalo, maaru' ulun ra bokon maguot ra tamung nano.’

⁸ Polosoon pagawai-pagawai ru saujor mindagu niayuk risilo, ‘Mokoondo' osoi kia ragiti ondo' malaa' am natatak ambiluo? Amon mokoondo', polosoon io muli. Amon kalo, mangkinibit io ra ulun bokon matatak ambiluo.’

⁹ Mopongo pagawai-pagawai ru saujor mindagu, tingganai ru moonong pasimpungan musiti' pilion.

¹⁰ Paat ra akau mamulunsar ra rondo' bandar, pagulu anii' mamagun ru bandar no ra kaluagan koson mitaak ra inan.

¹¹ Amon mangukab ilo ra kulobon garabang am mitaak ra inan, masauk ilo ra ulipon min am mambaal ra kandoi pajajalon.

¹² Kaa' amon mamagun ru bandar no kalo masaga' mitaak ra inan, am masaga' poyo gumula' ramuyun, liputo' bandar no ra saujor min.

¹³ Kopongo raginio paat ra Tuhan i Aki Kapuuno' min mangiou ramuyun mampagaau ra bandar no, potoyo' noyo ngaangai' ungkuyon ra giu' no.

¹⁴ Iowon kau mangalap ra ruandu'-ruandu', lalaing-lalaing, bibiag tinambiag am ngaangai' ondo' soroi ra ralalom ru bandar no. Iowon kau mamakai ra ngaangai' rapu' ru pantula' min. Nanaak noyo Tuhan ra ngaangai' no ramuyun.

¹⁵ Koson raginio noyo pamakuan mino ra bandar-bandar ondo' maalur intor ra tana' ondo' ayanin min.

¹⁶ Kaa' paat ra akau mampagaau ra bandar-bandar giu' ra pagun ondo' pataakin ramuyun ru Tuhan i Aki Kapuuno' min, potoyo' noyo ngaangai' ulun ra giu' no.

¹⁷ Pusoo' noyo ngaangai' bansa' ra pagun no: ulun ru Git, Amori, Kanaan, Piris, Giwi am Jibusi, koson ra akau sinusub ru Tuhan i Aki Kapuuno' min.

¹⁸ Potoyo' noyo ilo, maa' raginio kalo mangkinibit ilo ramuyun makatula ra Tuhan i Aki Kapuuno' min, am mangila' ramuyun mambaal ra jajajou ondo' binaal nilo paat sumamba ra tuhan-tuhan nilo.

¹⁹ Paat ra akau kuminam mampagaau ra rondo' bandar, pai' tagaro' puun ru kikinawa' ra giu' no kabalu' pana liputin min bandar no ra mabuoi. Akano' noyo kinawa' no, kaa' pai' pusoo' puun-puun no. Puun-puun no sala' ka pantula' min.

²⁰ Kalo pantagaron kau ra puun-puun tataun ra bokon am mamakai raginio koson lumiput ra bandar no, saboi magaau bandar raginio.”