SAGULION 17 - Tanou Moonsoi Timugon

¹ “Pai' papataak ra sapi' kapoam domba ondo' najamaran ra Tuhan i Aki Kapuuno' min; masisang Tuhan ra baal raginio.

² “Amon ru norongog min ra giu' ra rondo' ra bandar min, mokoondo' kukula' ngaulun ungkuyon kapoam ruandu' ondo' makatula noyo ra Tuhan, am minanggal ra nabantuan Nano

³ am niayuk susuban ru Tuhan sabap ra ilo siminamba am nangandoi ra tuhan-tuhan ra bokon, kapoam ra mato ru orou, kapoam ra sila', kapoam ra bibiag-bibiag.

⁴ Amon ru norongog min tanou koson raginio, musiti' imumuyin toojo baal raginio. Amon ru motopot ra baal malaat raginio nasauk noyo giu' ra Israil,

⁵ ibito' noyo ulun raginio giu' ra liwar ru bandar am bobolon ra batu saboi io matoi.

⁶ Iowon ayuk sangulun bobolon saboi matoi amon ru mokoondo' ruo kapoam talu ngaulun sasi' ondo' mononsol riso, kaa' kalo iowon io bobolon amon mokoondo' sangulun ayuk sasi'.

⁷ Ulun ondo' nasauk ra sasi' raginio noyo ondo' musiti' magulu momobol ra batu, bagu no ngaangai' ulun ra bokon momobol ra ulun no ra batu. Gitio ralan min mamuso ra kalaatan raginio.

⁸ Maaru' mokoondo' kukula' baal ra mompolonggom, kapilatan, kapoam intor ra baal pamatayan ra siningon, kapoam kalo siningon ondo' mapagon kaga' akimin ru akim rondo' intok. Paat ra mokoondo' baal koson raginio, kataki' noyo mongoi ra rondo' intok sambayangan ondo' pinili' ru Tuhan i Aki Kapuuno' min.

⁹ Giu' no, pabalaa' baal raginio ra imam ru bansa' ru Liwi, am ra akim ondo' mangandoi paat raginio. Polosoo' noyo ilo mangakim ra baal raginio.

¹⁰ Mamatas ilo ra baal raginio, am musiti' baalon min ra matanda' atan ondo' raguon nilo ramuyun.

¹¹ Apuo' noyo kapatasan nilo am baalo' noyo atan ondo' inaru' nilo saboi ra baal ra toboborok.

¹² Osoi baani mansang ra akim kapoam imam ondo' mangandoi musiti' ukumin ra matoi; gitio ralan min mamuso ra kalaatan ra Israil.

¹³ Ngaangai' ulun pana mokorongog boo ra baal raginio am malaa', saboi kolondo' sangulun pana baani mambaal koson raginio.”

Aturan intor ra raja'

¹⁴ Maalap min tana' ondo' pataakon ramuyun ru Tuhan i Aki Kapuuno' min, am magulayun kau noyo ra giu' no, maaru' gumogot kau ra sangulun raja' koson ra bansa'-bansa' ra liput min.

¹⁵ Aruo' noyo ra ulun pilion min masauk ra raja' iono ulun ondo' pinili' ru Tuhan. Raja' no musiti' ulun ru bansa' min galama'. Pai' pilio' ulun bansa' ru bokon masauk ra raja' min.

¹⁶ Kalo iowon raja' no mokoondo' ra pulalai mangkuda ondo' masuang kaga' no. Kalo iowon raja' no mangator ra ulun mongoi ra Misir mambali ra kuda, sabap ra minindagu noyo Tuhan ra kalo iowon ulun Nano sumaguli' ra Misir.

¹⁷ Kalo iowon raja' no makaandu' ra masuang, sabap baal raginio mangkinibit riso tumalikur intor ra Tuhan; kalo iowon raja' no milangkaya' ra mas kapoam pirok.

¹⁸ Paat io potonowon masauk ra raja', musiti' io aniin rondo' kitab ru ukum ri Aki Kapuuno' ondo' pinaralin intor ra kitab kopoyo ondo' binulian ru imam-imam bansa' ru Liwi.

¹⁹ Kitab no musiti' masalok paumbiron ra raja', am musiti' io mambasa' ra kitab no buoi io maayag, maa' raginio migila' io mangurumat ra Tuhan am totopot gumagaya' ra ngaangai' susuban ralalom ru kitab no.

²⁰ Amon mambaal raja' koson raginio, kalo mangkara' io ra io no moonsoi poyo intor ra ulun sabansa' riso, am kalo manggal io ra susuban ru Tuhan. Raja' no pana mamarinta ra Israil ra mabuoi, am papag nano mamarinta ra Israil saboi ra papag ka papag.”