SAGULION 14 - Tanou Moonsoi Timugon

Ralan ru panguliran ondo' inggalarin

¹ “Akau noyo ulun ru Tuhan i Aki Kapuuno' min. Ginio ra paat akau mangulir ra ulun ondo' minatoi noyo, pai' pilato' inan kapoam sukuro' abuk ra tampilon ra saang ru ulu min, koson ondo' baalon ru bansa' ra bokon.

² Akau longgom ru Tuhan i Aki Kapuuno' min; nampili' Io noyo ramuyun sinauk ra ulun Nano galama', intor ra ngaangai' bansa' ondo' minayan ra tana' ti.”

Bibiag ondo' kalo majamol am ondo' majamol

³ “Pai' pangakan ra atan-atan ondo' pinabala' ru Tuhan ra majamol.

⁴ Maakan mino bibiag ragitio: sapi', domba, kambing,

⁵ tambang, domba ru kataunan, kambing ru kataunan am paus.

⁶ Moonong bibiag ondo' makajajampang am ondo' manapa' ra kainduo maakan.

⁷ Kalo maakan mino bibiag ondo' kolondo' jajampang am ondo' kalo manapa' ra kainduo. Pai' pangakan ra kual ru unta, arnab kapoam karuui batu. Majamol bibiag raginio sabap kabalu' pana manapa' ra kainduo, kaa' kolondo' jajampang.

⁸ Pai' pangakan ra bauwi. Majamol bibiag raginio, sabap kabalu' pana makajajampang kaa' bibiag raginio kalo manapa' ra kainduo. Pai' pangakan ra bibiag koson raginio, am pai' kambong ra baangkai no.

⁹ “Makaakan kau ra ngaangai' salinut ru papait ondo' makakiwos am sisi',

¹⁰ kaa' atan ayuk bibiag ondo' maayag ralalom timug am ondo' kolondo' kiwos am sisi', kalo maakan. Bibiag raginio majamol.

¹¹ “Makaakan kau ra ngaangai' salinut ru susuit ondo' kalo majamol.

^12-18 Kaa' kalo maakan mino salinut ru susuit ragitio: susuit rajawali, puok, ngaangai' salinut ru kanui, susuit nasar, bangkaak, susuit unta, susuit camar, susuit ranggung, susuit pucung am ngaangai' salinut ru susuit kanawai, susuit undan, susuit kosa am pungit.

¹⁹ “Majamol ngaangai' bibiag malumot ondo' makakawo; pai' pangakan ra bibiag mangalumot salinut raginio.

²⁰ Pangakan ra bibiag mangalumot salinut ra kalo majamol.

²¹ “Pai' pangakan ra bibiag ondo' minatoi ra kaindalaman. Kual ru bibiag no maakan ru ulun bansa' ru bokon ondo' minayan ramuyun, kapoam talanon ra ulun bansa' ru bokon. Kaa' akau longgom ru Tuhan i Aki Kapuuno' min; akau ulun Nano. Pai' tonoko' anak domba kapoam anak kambing ralalom ru gatas ru ina' nano.”

Kaulayan ra taak sampiopor

²² “Lilio' noyo taak sampiopor, iono sampiopor intor ra ngaangai' ampos ru umo min ra moonong bilor.

²³ Kopongo raginio ongoi noyo ra rondo' intok ondo' pinili' ru Tuhan i Aki Kapuuno' min koson ra intok sambayangan. Giu' ra saang ru Tuhan i Aki Kapuuno' min, giu' ra intok pinili' Nano, akano' noyo taak sampiopor raginio: unor-unaran, wain, umau jaitun, anak katuaan ru sapi' am anak katuaan ru domba min. Baalo' noyo koson raginio maa' raginio magail kau migila' mangurumat ra Tuhan i Aki Kapuuno' min.

²⁴ Amon mayan kau maalur kaga' intor ra rondo' intok sambayangan no, am mapagon kau magibit ra taak sampiopor intor ra ampos ru umo ondo' taakin ramuyun ru Tuhan, am baalo' baal ragitio:

²⁵ Talano' ampos ru umo raginio am ibito' noyo ruit ru logo no ra rondo' intok sambayangan no.

²⁶ Ra ruit raginio pambali ra atan ayuk ondo' kasagaan min – sapi', domba, wain am inumon makagauk. Kopongo raginio giu' ra intok raginio, giu' ra saang ru Tuhan i Aki Kapuuno' min, musiti' akau am sasambaloi min mangakan am maansukan.

²⁷ “Pai' liliani' ulun ru Liwi ondo' minayan giu' ra bandar-bandar mino; kolondo' rapu' nilo.

²⁸ Paat ra pompor ru moonong bilor katalu, ibito' noyo taak sampiopor intor ra ngaangai' ampos ru tinanom min am bulii' noyo ngaangai' no giu' ralalom ru bandar-bandar mino.

²⁹ Akanon raginio tayar ulun ru Liwi sabap ra kolondo' rapu' nilo. Akanon raginio niayuk tayar ru ulun bansa' ru bokon, anak nailusan ra matuo am napuor ondo' minayan giu' ra bandar-bandar mino. Iowon ilo matong am mangalap ra ngaangai' ondo' kaukapan nilo. Baalo' noyo koson raginio am Tuhan i Aki Kapuuno' min mambarakat ramuyun ralalom ru ngaangai' kandoi min.”