SAGULION 13 - Tanou Moonsoi Timugon

¹ Maaru' lair sangulun nabi kapoam mambala' ra inupi nambantu' mambaal ra baal makatatandu' kapoam kaimuagan

² koson mangkimait ramuyun sumamba am mangandoi ra tuhan-tuhan ondo' kalo igondo' kau samba. Kabalu' pana baal ondo' binantu' ru nabi no totopot masauk,

³ pai' lioo' ragu nano. Namakai Tuhan i Aki Kapuuno' min riso koson mangkinam ramuyun, maa' raginio mapandayan ru Tuhan ra motogom kau Riso ra sotopot ru guang kapoam kalo.

⁴ Baya' noyo ra Tuhan am urumato' noyo Io. Gagayaa' noyo Io am suguto' noyo susuban Riso; samba noyo Riso am mintopot Riso.

⁵ Kaa' potoyo' noyo nabi kapoam mambala' ra inupi ondo' nanusub ramuyun gumuor ra Tuhan ondo' namayag ramuyun intor ra Misir, intok min inulipon ragili. Ulun koson raginio malaat am kuminam mapalayau ramuyun intor ra kaayagan ondo' mapabansuk ra guang ru Tuhan. Musiti' potoyon ulun no, maa' raginio mairu' kalaatan intor ra gino ngai' min.

⁶ Mulu' poyo pabukat min, kapoam anak ungkuyon min, kapoam anak ruandu' min, kapoam andu' ondo' tagamin min, kapoam rangan toojo min pana, maaru' lair ra suminok mangambi' ramuyun koson sumamba ra tuhan-tuhan ra bokon, ondo' kalo igondo' kau samba, am ondo' kalo igondo' sinamba ru kinamatuaan mini.

⁷ Sangulun intor ra gino ngai' min maaru' lair mangambi' ramuyun koson sumamba ra tuhan ru bansa' ondo' minayan mamaar ramuyun, kapoam tuhan ru bansa' ondo' minayan ra maalur.

⁸ Kaa' pai' polosoo' ulun no mangambi' ramuyun, am pai' rongog ra ragu nano. Pai' pakaasi' ra ulun raginio am pai' pangampin riso.

⁹ Potoyo' io! Polosoon noyo akau masauk ra ulun kasaa' momobol riso, am polosoon noyo ngaangai' ulun momobol riso.

¹⁰ Bobolo' noyo io saboi matoi! Kuminam io mapainggalur rirun intor ra Tuhan i Aki Kapuuno' min, ondo' namayag noyo ramuyun intor ra Misir, intok min inulipon ragili.

¹¹ Kopongo raginio ngaangai' ulun ru Israil mokorongog ra baal ondo' masauk, am mangalaa' ilo. Sangulun pana kalo boo mambaal ra koson kinalaat raginio.

¹² Paat akau mayan giu' ra bandar-bandar ondo' tinaakan ramuyun ru Tuhan i Aki Kapuuno' min, maaru' lair morongog min

¹³ ra kukula' ngaulun mangalaat intor ra bansa' min napalayau noyo ra mamagun ru bandar nilo saboi mamagun ra giu' no sumamba ra tuhan-tuhan ondo' kalo igondo' kau samba.

¹⁴ Amon ru morongog min tanou lumabui koson raginio, imumuyi' toojo baal raginio. Amon ru motopot ra baal malaat no totopot nasauk,

¹⁵ potoyo' noyo ngaangai' mamagun ru bandar raginio am niayuk ngaangai' bibiag tinambiag nilo. Lunsayo' noyo ngaangai' bandar raginio.

¹⁶ Timungo' noyo ngaangai' rapu' ru mamagun ru bandar raginio am pabantaa' ngaangai' no giu' ra padang ru bandar. Solobo' boo bandar raginio am ngaangai' soroi ra ralalom no koson ra taak ra Tuhan i Aki Kapuuno' min. Bandar raginio musiti' polosoon masauk ra nangatuyas ra sabuoi-buoi no, am lingon kalo baalon saguli'.

¹⁷ Pai' alap ra atan pana ondo' inulas noyo ra pusoon, am tumalikur Tuhan intor ra sangit Nano am makaasi' ramuyun. Makaasi' Io ramuyun am masauk kau ra bansa' ondo' maayo suang nano, koson ra ondo' binantu' Nano ra kinamatuaan mini.

¹⁸ Mambaal Io baal raginio amon gumagaya' kau ra susuban Nano ondo' tinaakan ku noyo ramuyun ra orou raiti', am mambaal kau ra atan ondo' kasagaan Nano.”