SAGULION 12 - Tanou Moonsoi Timugon

Rondo' ayuk intok sambayangan

¹ “Raino rongogo' noyo ngaangai' ukum ondo' musiti' gagayaan buoi akau mayan giu' ra tana' ondo' taakin ru Tuhan i Aki Kapuuno' ra kinamatuaan min.

² Giu' ra tana' ondo' ayanin min, pusoo' noyo ngaangai' intok sambaan ra dewa giu' ra rasawat ru gunung ondo' masawat, am giu' ragana' ru tataun masansam, intok ru bansa' ondo' minayan ra giu' no sumamba ra tuhan-tuhan nilo.

³ Puuto' altar nilo am popolo' lugu'-lugu' batu karamat. Solobo' tatandu' ru Dewi Asyira am popolo' sinungkalalaing nilo, maa' raginio ngaangai' no kalo boo sambaan giu' ra intok raginio.

⁴ Paat sumamba kau ra Tuhan i Aki Kapuuno' min, pai' tilu ra bansa' raginio sumamba ra tuhan-tuhan nilo.

⁵ Intor ra titikop wilayah ru ngaangai' bansa' min, mampili' Tuhan rondo' intok maa' raginio makaratong kau ra saang Nano am sumamba Riso ra giu' no.

⁶ Giu' ra intok no akau musiti' mampataak ra taak simbalui koson mapabansuk ra guang ru Tuhan, am taak simbalui ra bokon, sampiopor am taak ra bokon, taak ondo' binantu' min ra Tuhan, taak ondo' pataakon ayuk toojo, am niayuk anak katuaan ru sapi', am niayuk anak katuaan ru domba min.

⁷ Giu' no, giu' ra saang ru Tuhan i Aki Kapuuno' min, ondo' nambarakat noyo ramuyun, mabaya' kau ra sasambaloi min mangakan am sumia' ra ngaangai' ampos ru kandoi min.

⁸ Masaboi paat no, akau iowon mambaal ra baal ondo' baalon min raino. Saboi raino akau ngaangai' sumambayang maya' ra saga' ru guang min,

⁹ sabap kalo poyo nakasaboi kau ra tana' ondo' taakin ramuyun ru Tuhan i Aki Kapuuno' min, intok min mayan ra mamimio.

¹⁰ Mopongo akau lumaup ra Sungoi Jordan, iowon kau ru Tuhan mayan ra tana' raginio am lumayun ra giu'. Magalung Io ramuyun intor ra ngaangai' pantula' maa' raginio maayag kau ra mamimio.

¹¹ Mampili' Tuhan ra rondo' intok ondo' masauk ra intok sumambayang Riso. Giu' no akau musiti' magibit ra ngaangai' ondo' nanusuban kuno: taak simbalui koson mapabansuk ra guang ru Tuhan am taak simbalui ra bokon, sampiopor am taak ra bokon, am taak ra luntukon ondo' binantu' min ra Tuhan.

¹² Pakaansuk noyo ra saang ru Tuhan giu' ra intok raginio, mabaya' ra anak-anak mino, ulipon-ulipon mino, am ulun ru Liwi ondo' minayan ra bandar-bandar mino. Karaa' noyo ra ulun ru Liwi kolondo' tana' nilo galama'.

¹³ Pai' papataak ra taak simbalui min giu' ra intok pinili' min galama';

¹⁴ pataako' noyo taak simbalui raginio giu' ayuk ra rondo' intok ondo' pinili' ru Tuhan, rondo' ra wilayah ru bansa' mino. Giu' no ayuk iowon kau mapataak ra taak simbalui koson mapabansuk ra guang ru Tuhan, am mambaal ra ngaangai' ondo' nanusuban ku ramuyun.

¹⁵ Kaa' iowon kau manimbalui ra bibiag tinambiag min am mangakan ra kual nano ra ati ayuk ayanan min. Makaakan kau ra kula' suang ru bibiag tinambiag ondo' taakin ramuyun ru Tuhan. Iou pana mapasau kapoam majamol kau, akau ngaangai' makaakan ra kual ru bibiag raginio koson akau mangakan ra kual ru tambang kapoam paus.

¹⁶ Kaa' pai' pangakan ra raraa' ru bibiag no; sasari' raraa' no ra tana' koson ra timug.

¹⁷ Kolondo' sangulun pana ramuyun mapataak ra Tuhan iowon akanon giu' ra intok inayanan min: iou pana sampiopor gandum, wain, umau jaitun kapoam anak katuaan ru sapi' am anak katuaan ru domba, taak ondo' binantu' min ra Tuhan, taak toojo ayuk, kapoam taak ra bokon.

¹⁸ Akau am anak-anak mino, mabaya' ra ulipon-ulipon mino am ulun ru Liwi ondo' minayan giu' ra bandar-bandar mino, musiti' mangakan ra taak raginio giu' ayuk ra saang ru Tuhan i Aki Kapuuno' min, giu' ra rondo' intok ondo' pinili' ru Tuhan i Aki Kapuuno' min. Giu' ra intok raginio musiti' maansukan kau ra ngaangai' ondo' binaal min.

¹⁹ Pai' liliani' ulun ru Liwi, buoi akau mayan ra tana' min.

²⁰ Paat napalangka' Tuhan ra wilayah min koson ondo' binantu' Nano, makaakan kau ra kual ra sasanggilan ayuk akau masaga'.

²¹ Amon maalur kaga' intok sambayangan no, am sasanggilan ayuk, iowon kau manimbalui ra sapi' kapoam domba ondo' taakin ramuyun ru Tuhan. Iowon kau mangakan ra kual ru bibiag no giu' ra baloi, koson ondo' rinagu ku noyo ramuyun.

²² Osoi ayuk ondo' mapasau kapoam majamol, iowon mangakan ra kual raginio koson ra akau nangakan ra kual ru tambang kapoam paus.

²³ Kaa' pai' pangakan ra kual ondo' lakat poyo makararaa', sabap painawo ru bibiag no soroi ralalom ru raraa' nano. Kalo makaakan kau ra painawo mabaya' ra kual.

²⁴ Pai' pangakan ra raraa'; sasari' raraa' ra tana' koson ra timug.

²⁵ Amon gumagaya' kau ra ukum raginio, maansayan Tuhan ramuyun, am akau am niayuk papag min makakaansayan.

²⁶ Ibito' noyo taak simbalui am taak ondo' binantu' min noyo ra Tuhan mongoi ra rondo' intok sambayangan no.

²⁷ Giu' no pataako' noyo taak simbalui koson mapabansuk ra guang ru Tuhan, giu' rasawat ru altar ru Tuhan. Pataako' niayuk taak simbalui ondo' kual no akanon min, am pasasaro' raraa' nano ra rasawat ru altar.

²⁸ Ngaangai' baal ondo' nanusuban ku noyo ramuyun musiti' gagayaan ra matanda'. Ginio ra akau am papag min makakaansayan ra sabuoi-buoi no, sabap ra mambaal kau ra atan ondo' motopot am mapabansuk ra Tuhan i Aki Kapuuno' min.”

Papakaraan maa' raginio kalo sumamba ra sinungkalalaing

²⁹ “Mamuso Tuhan i Aki Kapuuno' min ra bansa'-bansa' paat ra bulunsaron min ilo, am mangindangan Io ramuyun mayan am niayuk mamagun ra tana' nilo.

³⁰ Mopongo Tuhan mamuso ra bansa'-bansa' raginio, pagilalain. Pai' baya' ra kaindalaman ru ugama nilo, sabap baal raginio maparatong ra karaat. Pai' pakibala' ra ralan nilo sumamba ra tuhan-tuhan nilo ra kuayan tumilu ra ralan nilono.

³¹ Pai' samba ra Tuhan i Aki Kapuuno' min ra ralan nilo sumamba ra tuhan-tuhan nilo, sabap ra paat ilo sumamba ra tuhan-tuhan no, nambaal ilo ra ngaangai' ra baal malaat ondo' kasisangin ru Tuhan. Mulu' poyo anak nilo galama' pana sinolob nilo ra rasawat ru altar koson taak simbalui ra tuhan-tuhan nilo.

³² Baalo' noyo ngaangai' ondo' nanusuban ku noyo ramuyun; pai' ruangi' kapoam irurui' atan-atan ra susuban raginio.