SAGULION 11 - Tanou Moonsoi Timugon

Kinaayo ru Tuhan

¹ “Tagami' noyo Tuhan i Aki Kapuuno' min am magail gumagaya' ra ngaangai' ukum Nano.

² Paat orou raiti' karaa' atan ondo' napandayan min intor ra Tuhan intor ra nailian min. Akau noyo am sala' ka anak-anak mino ondo' makanailian raginio. Nakito min noyo kinaayo ru Tuhan, kaikangan Nano, kuasa' Nano,

³ am kaimuagan Nano. Nakito min noyo atan ondo' binaal Nano ra raja' ru Misir am titikop pagun nano.

⁴ Nakito min noyo ati kulaan Tuhan namuso ra titikop saujor ru Misir nababaya' ra kurita' kuda nilo, am ra kinalom ngaangai' no giu' ralalom ru Raat Galaga paat ra ilo nangilou ramuyun.

⁵ Nakapandai kau ra atan ondo' binaal ru Tuhan ramuyun giu' ra tana' kaagisan ra kalo poyo nakasaboi kau ra intok ragitio.

⁶ Nakara' min ra atan ondo' binaal Nano ri Datan am i Abiram, anak ri Iliab intor ra bansa' ru Rubin. Giu' ra talupak ru mato ru ngaangai' ulun, nonolon tana' risilo nabaya' ra sasambaloi, pangkiman am ngaangai' ulipon am bibiag nilo.

⁷ Sotopot no, akau noyo ondo' nakakito ra ngaangai' baal maayo no ondo' binaal ru Tuhan.”

Barakat am ulas

⁸ “Gagayaa' noyo ngaangai' ukum ondo' posoboyon kuno ramuyun ra orou raiti'. Amon ru mambaal kau koson raginio, lumaup kau ra sungoi am mayan ra tana' ondo' angayan min.

⁹ Maayag kau ra mabuoi giu' ra tana' ondo' langkaya' am malabung, ondo' binantu' noyo ru Tuhan ra kinamatuaan min am papag min.

¹⁰ Tana' ondo' ayanin mino sala' ka koson pagun ru Misir, intok inayanan min ra galing. Paat akau mantanom ra sampug giu' ra Misir, musiti' kau mingkotog mangandoi koson manimug ra umo;

¹¹ kaa' tana' ondo' ayanin mino intok kagunungan am limayak, ondo' timugin ru rasam.

¹² Alungin ru Tuhan i Aki Kapuuno' min tana' raginio am magalung raginio buoi ru bilor.

¹³ “Ginio ra gagayaa' noyo ukum ondo' taakin kuno ramuyun ra orou raiti'. Tagami' noyo Tuhan i Aki Kapuuno' min am pangandoi noyo Riso ra sotopot ru salibuor.

¹⁴ Amon ru mambaal kau koson raginio, mamparatu' Io ra rasam ra tana' min ra bulintok nano, bulintok mopongo mangkumos am bulintok tumalimpuun mantanom. Koson raginio boo mokoondo' kau ra gandum, wain, umau jaitun,

¹⁵ am sakot tayar ru bibiag tinambiag min. Makaalap kau ra ngaangai' akanon ondo' kasagaan min.

¹⁶ Pai' polosoo' akau palayawon saboi tumalikur intor ra Tuhan, am sumamba am mangandoi ra tuhan-tuhan ra bokon.

¹⁷ Amon ru manggal kau ra ukum no, sumangit Tuhan ramuyun. Ompongon No rasam, am mapuaan kaga' tana' mino saboi tatanom kalo tumuu'. Mataki' kau boo matoi ra giu', kabalu' pana tana' ondo' tinaakan Nano ramuyun, tana' ra moonsoi.

¹⁸ Karaa' noyo am ilai' ukum-ukum raginio. Pobongkoso' ukum raginio ra kalindu' am rabas min koson ra pangkaraan.

¹⁹ Pailaa' noyo ukum raginio ra anak-anak mino. Raguo' noyo ukum raginio paat akau giu' ra baloi kapoam mugar, paat akau tumangus kapoam mangandoi.

²⁰ Tulisi' noyo ukum raginio ra lugu' ru kulobon ru baloi am ra kulobon ru garabang min.

²¹ Amon nambaal kau raginio, akau am anak-anak mino maayag ra mabuoi giu' ra tana' ondo' binantu' ru Tuhan i Aki Kapuuno' min ra kinamatuaan min. Mayan kau ra giu' buoi limbowon soroi ra rasawat ru tana' ti.

²² “Gagayaa' noyo toojo ngaangai' ukum ondo' tinaakan kuno ramuyun: Tagami' noyo Tuhan i Aki Kapuuno' min, baalo' noyo ngaangai' ondo' nanusuban Nano am gagaya' noyo Riso.

²³ Pagiruon No boo ngaangai' bansa' no paat akau jumalai, am mayan kau ra tana' ra linonggom ru bansa' ondo' mangaayo poyo am mangaikang poyo intor ramuyun.

²⁴ Ngaangai' tana' ondo' kinjangin min masauk ra longgom min. Wilayah min malangka', intor ra tana' kaagisan giu' rabugus saboi ra kagunungan Libanon giu' ra ralayo, am intor ra Sungoi Iprat giu' ra sirangon saboi ra Raat Tanga' giu' ra kalasaan.

²⁵ Ati ayuk angayan min giu' ra tana' no, Tuhan i Aki Kapuuno' min mangkinibit ra ulun malaa' ramuyun koson ra binantu' Nano; kolondo' sangulun pana makapanginga' ramuyun.

²⁶ “Paat ra orou raiti' pampilion takamin ra barakat am ulas –

²⁷ barakat, amon ru gumagaya' kau ra susuban ru Tuhan i Aki Kapuuno' min ondo' taakin kuno ramuyun ra orou raiti';

²⁸ kapoam ulas, amon ru kalo gumagaya' kau ra susuban no, am tumalikur koson sumamba ra tuhan-tuhan ra bokon ondo' kalo igondo' kau samba.

²⁹ Paat nagibit Tuhan ramuyun mongoi ra tana' ondo' ayanin mino, musiti' kau mampatanou ra barakat intor rasawat ru Gunung Girijim am ulas intor rasawat ru Gunung Ibal. (

³⁰ Soroi karuo-ruo gunung no ra tampilon kalasaan ru Sungoi Jordan giu' ra wilayah ru ulun ru Kanaan ondo' minayan giu' ra Limayak Jordan. Gunung raginio nakatingkuang ra kalasaan, kalo maalur intor ra puun tataun karamat giu' ra Mori, maar ra bandar Gilgal.)

³¹ Kalo boo mabuoi lumaup kau ra Sungoi Jordan am mayan ra tana' ondo' taakin ramuyun ru Tuhan i Aki Kapuuno' min. Paat ra akau mayan ra tana' raginio am lumayun ra giu' no,

³² tutuno' ra gumagaya' kau ra ngaangai' ukum ondo' taakin kuno ramuyun ra orou raiti'.”