RUT 2 - Tanou Moonsoi Timugon

I Rut nangandoi ra umo ri Boas

¹ I Naomi mokoondo' ra pantukir ru ralaki nali, i Ilimilik. Sangulun intor risilo no ininggalanan ri Boas, am io paawang am niayuk urumaton.

² Paat ra sangarawan, indagu i Rut ri Naomi, “Susubo' aku no mongoi ra umo koson mampalulur ra barli ondo' napulayat intor ra kalindu' ru nangkumos. Maaru' makatuum aku ra ulun ondo' nakapulayat raginio.” Taam i Naomi, “Ugar no anak kuno.”

³ Ongoi boo i Rut ra umo. Minaya' io ra ulun-ulun mangkumos ra giu' liliwa' nanganam ra barli ondo' napulayat. Naintuma' ra io soroi ra umo ri Boas, sangulun intor ra pantukir ri Ilimilik.

⁴ Kalo nabuoi raginio, i Boas galama' minatong intor ra Bitligim. Nangani' io ra ompor ra ngaangai' mangandoi nano. “Gama' ru Tuhan mabaya' ramuyun,” kono. “Gama' ru Tuhan mambarakat rirun,” konilo timinaam.

⁵ Nangkuot boo i Boas ra tingganai ru mangandoi nano, “Osoi kia ralaa raginio?”

⁶ Tingganai ru mangandoi no nambala', “Io ruandu' bansa' ru bokon ondo' bagu minatong intor ra Moab minaya' ri Noami.

⁷ Nakiasi' io maya' ra ngaangai' mangandoi takau koson mampalulur ra barli napulayat. Nokorondom io ra susuab i nangandoi, am bagu io ayuk tangus sangkinolor ra kim.”

⁸ Indagu boo i Boas ri Rut, “Rongogo' noyo ragu kutu. Pai' no ongoi pampalulur ra barli umo ra bokon, ondo' ayuk am umo ragitio. Pangandoi no mabaya' ra ngaangai' mangandoi ruandu' ragiti.

⁹ Ilai' ati pangandayan nilo am baya' no risilo. Sumangit aku toojo ra ngaangai' ungkuyon mangandoi koson mangulipon rirun. Amon ru paason kou, inum no ra timug ondo' sinuangan nilo ra rarapu'-rarapu' no.”

¹⁰ Igulatur i Rut am indagu ri Boas, “Kua guango' mu aku koon raginio am bonsoi ru guang muno raki'? Aku ti ulun ru bansa' ra bokon ayuk!”

¹¹ Taam i Boas, “Norongog ku noyo nansalinut ondo' binaal muno ra iwan muno intor ra ralaki muli minatoi. Nakapandai aku ra okou nanatang ra matuo muno ra pagun min koson maya' simpung ra bansa' ondo' kalo nauligan min.

¹² Gama' ru balasin ru Tuhan nansalinut kaansayan muno. Gama' ru apuon mu atan ayuk pana ondo' taakin rirun ru Tuhan, i Aki Kapuuno' ru Israil sabap ra minatong kou koson siminindung Riso!”

¹³ Kon ri Rut, “Moonsoi toojo guang muno. Napabansuk kou ra guang kutu. Molomoi kou mindagu raki', kabalu' pana aku kalo nokogondo' ra mangngandoi muno.”

¹⁴ Paat mangakan tanga' ru orou, indagu i Boas ri Rut, “Ibok akan takano. Pososopo' ruti' muno ra ruu' no.” Panturung i Rut pababaya' ra mangandoi ra bokon no am pasulungo' ri Boas riso barli sininggala'. Pangakan i Rut saboi naasug. Kopongo nangakan, kumoso' no suwo nano.

^15-16 Paat io mongoi poyo pampalulur ra barli, indagu i Boas ra ngaangai' mangngandoi nano, “Polosoo' io noyo mampalulur ra barli napulayat am niayuk binangkos no. Pai' io sawayo'. Butuso' kukula' ngantaun barli intor ra binangkos no am patatango' noyo ra giu' maa' raginio makapampalulur io.”

¹⁷ Mampalulur i Rut ra barli ra umo no suku' mamai'. Kopongo io nangagik ra barli no, ilai' no barli ondo' linulur nano maar mopor ngakilogram.

¹⁸ Ibito' no barli no ra bandar, am patalango' no ra iwan ruandu' nano kula' suang ru barli ondo' linulur nano. Taaki' no niayuk ra iwan nano ondo' kalo nakai' nilo kaakan.

¹⁹ Indagu i Naomi riso, “Ati naalapan mu ra ginii? Osoi ra umo nangandayan muno? Gama' ru barakaton ri Aki Kapuuno' ulun ondo' moonsoi rirun!” Tunungo' ri Rut ri Naomi ra io nangandoi ra umo ru sangulun ondo' ininggalanan ri Boas.

²⁰ “Gama' ru barakaton ru Tuhan i Boas!” Kon ri Naomi ri Rut. “Tuhan masalok mampagagaya' ra bantu' Nano, ra ulun lakat maayag kapoam ulun ondo' namagatoi.” Kono poyo, “Ulun no pabukat molongkot takau. Io no niayuk magalung ritakau.”

²¹ Kon ri Rut, “Niayuk io nopoloso raki' nampalulur ra barli nababaya' ra ngaangai' mangngandoi nano suku' makai' nilo mangkumos ra umo no.”

²² Indagu i Naomi ri Rut, “Moonsoi noyo ginio, moonsoi poyo okou mangandoi mababaya' ra ngaangai' mangngandoi ruandu' ra umo ri Boas. Amon mangandoi kou ra umo ru ulun ra bokon, ati ru uliponon kou ru ulun ra giu' no.”

²³ I Rut pana masaga' maya' ra ngaangai' ruandu' mangngandoi ra umo ri Boas. I Rut mampalulur ra barli am gandum ra giu' no suku' nakai'. Buoi raginio i Rut minayan ra iwan ruandu' nano.