ROMA 6 - Tanou Moonsoi TimugonMaayag takau sumimpung ri Kristus 1 Amon ru ginio poyo, atan boo paraguon takau? Rumayus takau kia pambaal ra tula, maa' raginio gumaai poyo togom ri Aki Kapuuno' no ritakau? 2 Maaru' kalo! Itakau ondo' kalo boo kuasaan ru tula, sotopot no kalo boo rumayus mambaal ra tula. 3 Nakapandai takano ra paat ra itakau riniu', pinasimpung takau noyo ri Jisus Kristus. Arati' no koson itakau pinasimpung ra pinatayan Nali. 4 Paat ra itakau riniu', ginio noyo koson ra itakau pana linobong mabaya' Riso am magapu ra pinatayan Nali. Maa' raginio, mogondo' ri Kristus binayag intor ra kapatayan ralalom ru kuasa' matulai ri Ama', koson niayuk itakau makaili' ra kaayagan bagu. 5 Sabap ra amon ru pinasimpung takau noyo ri Kristus am nagapu ra pinatayan Nali, maaru' pasimpungon takau Riso poyo ra itakau bayagon saguli' koson Riso. 6 Mapandayan takano ra kiralan ru kaayagan lair takau pinuso noyo paat ri Kristus pinatoi giu' ra salip, koson kuasa' ru paliso takau ondo' makatula no pusoon. Maa' raginio, kalo boo uliponon takau ru tula. 7 Sabap ra amon ru sasangulun matoi, ulun no malabus intor ra kuasa' ru tula. 8 Amon ru nagapu takau ra pinatayan ri Kristus, mangintopot takau ra maayag takau masimpung Riso. 9 Sabap ra napandayan takau ra binayag noyo i Kristus intor ra kapatayan am kalo boo matoi Io. Kapatayan no kalo boo manguasa' Riso. 10 Pinatayan ri Kristus no namuso ra kuasa' ru tula, ginio nasauk ra igondo' ayuk am sama' ra sabuoi-buoi no, kaa' raino kaayagan Nano masimpung noyo ri Aki Kapuuno'. 11 Koson ayuk ragitio pangkaraan min; intor ra kuasa' ru tula akau koson ra ulun minatoi, kaa' maayag kau masimpung noyo ri Aki Kapuuno' ralalom inggalan ri Jisus Kristus. 12 Intor raginio, pai' noyo polosoo' tula manguasa' ra kaayagan mino ondo' mapuso, maa' raginio kalo boo mampagagaya' kau ra kinibit ru guang malaat. 13 Pai' min polosoo' atan ayuk tayar ru inan mino kuasaan ru tula, koson pambabaal ra malaat. Kaa' polosoo' noyo i Aki Kapuuno' manguasa' ra kaayagan mino, koson ra ulun ondo' binayag noyo saguli' intor ra kapatayan am raino maayag. Taaki' noyo ngaangai' kaayagan mino ri Aki Kapuuno' koson pambabaal ra moonsoi. 14 Tula kalo boo makapanguasa' ramuyun, sabap ra kaayagan mino kalo boo inimpuun ra Ukum ri Musa, kaa' inimpuun ra asi' ri Aki Kapuuno'. Ulipon ru kasagaan ri Aki Kapuuno' 15 Ati kulaan raino? Makapambaal takau kia ra tula, sabap ra kaayagan takau inimpuun ra asi' ri Aki Kapuuno' am kalo boo inimpuun ra Ukum ri Musa? Maaru' kalo! 16 Maaru' mapandayan min amon ru polosoon noyo kaayagan min kuasaan ru sasangulun koson mampagagaya' ra susuban nano, akau noyo ulipon ru ulun no – iou pana ulipon ru tula ondo' magibit ra kapatayan, kapoam ulipon ondo' gumagaya' ra kasagaan ri Aki Kapuuno' ondo' mopobonsoi ramuyun Riso. 17 Kaa' paringkuanangan ri Aki Kapuuno', sabap ra galing i inulipon kau ru tula, kaa' raino gumagaya' kau toojo ra pangilaan motopot ondo' inapu min. 18 Pinalabus kano intor ra kuasa' ru tula am siminauk ra ulipon ru kasagaan ri Aki Kapuuno'. 19 Alapon ku tiluan ru ulipon ti sabap ra mangailo kau mangarati'. Ra galing i pinoloso noyo kaayagan mino galama' sumauk ra ulipon ru baal majamol koson mambaal ra malaat. Koson niayuk raino, polosoo' noyo kaayagan mino galama' sumauk ra ulipon ru kasagaan ri Aki Kapuuno' koson akau galama' patimpokon Riso. 20 Paat ra inulipon kau ru tula, kalo kinuasa' kau ru kasagaan ri Aki Kapuuno'. 21 Ragili kolondo' onong no ra akau nampaugar ra baal-baal ondo' raino mampakauyu' ramuyun. Baal-baal raginio mangkinibit ra kapatayan. 22 Kaa' raino, pinalabus kano intor ra tula am masauk ra ulipon ri Aki Kapuuno'. Onong ru ginio kaayagan mino patimpokon noyo ri Aki Kapuuno' am ginio manangampos ra kaayagan motopot am mantilayun. 23 Sabap ra tula no mangkinibit ra kapatayan, kaa' taak ri Aki Kapuuno' no kaayagan motopot am mantilayun mababaya' ri Kristus Jisus, Tuhan takau. |
Hakcipta © Bible Society of Malaysia, 2013.
Bible Society of Malaysia