ROMA 15 - Tanou Moonsoi Timugon

Kaatango' ulun bokon am sala' ka inan min galama'

¹ Itakau ondo' maikang pangintopot, pirot takano pangindangan risilo ondo' malawo pangintapatan, am pai' takau pangkara' ra kaatangan galama' ayuk.

² Ginio ra pirot takano pangindangan ra pabukat Kristian koson kaatangan nilo maa' raginio mikang boo pangintapatan nilo.

³ Sabap ra sala' ka nangkara' i Kristus ra kaatangan Nano galama', kaa' koson tinulisan ra Buuk Kitab, “Ngaangai' pagasaban ru ulun no Rirun, O Aki Kapuuno', nakatiu' niayuk raki'.”

⁴ Ngaangai' ondo' tinulisan ra Buuk Kitab makapangila' ritakau, am pangilaan raginio mampaikang ra guang takau am mangani' ra guang mataan saboi makakalansanan takau ri Aki Kapuuno'.

⁵ Gama' ru i Aki Kapuuno' ondo' mampaikang ra guang min am mangani' ramuyun ra guang mataan, mangindangan ramuyun maayag ra rondo' guang sumugut ra tiluan i Kristus Jisus.

⁶ Maa' ra akau rondo' guang no, mokopongompor kano ri Aki Kapuuno', Ama' ru Tuhan takau i Jisus Kristus.

Tanou Moonsoi pabalaan ra ulun sala' ka Jaudi niayuk

⁷ Intor raginio, apuo' noyo rondo' am bokon koson i Kristus noyo nangapu ramuyun, maa' raginio omporon boo i Aki Kapuuno'.

⁸ Ginio ra balain takamin, i Kristus siminauk ra mangingindangan ra ulun ru Jaudi koson manulu' risilo ra suguton ri Aki Kapuuno' atan ondo' binantu' Nali ra kinamatuaan nilai.

⁹ Io nopo niayuk magibit ra ulun sala' ka Jaudi mongompor ri Aki Kapuuno' sabap ra asi' Nano risilo. Koson tinulisan ra Buuk Kitab, “Mongompor aku Rirun ra tatanga' ru ulun sala' ka Jaudi, am marimbai aku mongompor Rirun.”

¹⁰ Tinulisan poyo ra Buuk Kitab, “Akau ulun sala' ka Jaudi, pakaansuk kano mababaya' ra ulun ri Aki Kapuuno'!”

¹¹ Tinulisan niayuk poyo ra Buuk Kitab, “Akau ngai' ulun sala' ka Jaudi, omporo' noyo Tuhan! Akau ngaangai' bansa', omporo' Io no.”

¹² Kon poyo ru Nabi Jisaya, “Matong sangulun intor ra papag ru Isai; mamarinta Io ra bansa'-bansa', am lumansan ilo Riso.”

¹³ Gama' ru i Aki Kapuuno', puun ru kalansanan takau, mangani' ramuyun ra kaansukan am katasuan ru guang ralalom ru pangintapatan min Riso. Maa' raginio, ralalom ru kuasa' ru Ambiluo ri Aki Kapuuno', mikang poyo kalansanan mino Riso.

Kua guat pakakau' i Paulus manulis koson raginio

¹⁴ Pabukat kau ngaangai', mangintopot aku ra moonsoi kau toojo am makapandai kano ra ngaangai' saboi makapangila' ra rondo' am bokon.

¹⁵ Kaa' ralalom surat kutu ragitio makakau' aku mampakara' ramuyun ra kukula' baal, sabap ri Aki Kapuuno' noyo nangani' raki' ra kandoi raginio.

¹⁶ Pinili' No aku masauk ra ulipon ri Kristus Jisus koson mangindangan ra ulun sala' ka Jaudi. Mampaugar aku ra kandoi koson sangulun imam ondo' mampabala' ra Tanou Moonsoi intor ri Aki Kapuuno'. Maa' raginio, ulun sala' ka Jaudi patimpokon ri Aki Kapuuno' ru Ambiluo Nano koson rondo' taak ondo' mapabansuk Riso.

¹⁷ Sabap ra nasimpungan kuno ri Kristus Jisus, maayo boo guang ku sabap ra kandoi kuno ri Aki Kapuuno'.

¹⁸ Makakau' aku ayuk mambala' ra atan ondo' binaal ri Kristus ralalom kaayagan kuno ra maningganai ra ulun sala' ka Jaudi gumagaya' ri Aki Kapuuno'. Ginio nasauk ralalom ru atan ondo' rinagu am binaal kuno,

¹⁹ ralalom ru tatandu' am kaimuagan am ralalom niayuk ru kuasa' ru Ambiluo ri Aki Kapuuno'. Pinabala' ku noyo Tanou Moonsoi intor ri Kristus ra ati-ati ayuk, inintaran ku ra bandar Jirusalim suku' ra libung ru Ilirikum.

²⁰ Moogot aku mampabala' ra Tanou Moonsoi ra intok ru ulun ondo' kalo igondo' nakaining ra tanou ri Kristus. Maa' raginio, sala' ka manunggul aku ra kandoi ondo' tinalimpuunan ru ulun ra bokon.

²¹ Tinulisan noyo ra Buuk Kitab, “Ilo ondo' kalo igondo' tunungi' ra tanou intor Riso, makakito ilo, am ilo ondo' kalo igondo' pakaining, makarati' ilo.”

Mangatang i Paulus mongoi ra bandar Roma

²² Ginio sabap ra kandoi kuno raginio masalok aku maampangan mongoi tuum ramuyun.

²³ Kaa' raino kandoi kuno tampilon ragiti nopongo noyo am kula' noyo ngambilor aku mangatang mongoi tuum ramuyun.

²⁴ Paat ra aku mangkiralan mongoi ra pagun Sipanyol, masaga' aku niayuk mapit tumuum ramuyun. Makapanambalui aku ramuyun ra kukula' buoi, malansan aku mangani' kau raki' ra lutuon mongoi ra giu' no.

²⁵ Kaa' raino mongoi aku ra Jirusalim pangator ra ruit pangindangan ra ulun ri Aki Kapuuno' ra giu' no.

²⁶ Sabap ra ulun Kristian giu' ra libung ru Makidonia am Akaya mangasaga' mangani' ra ruit paindanganon ra ulun ri Aki Kapuuno' ondo' musikin giu' ra Jirusalim.

²⁷ Sala' ka jinajalan ilo raginio, sotopot no ginio musiti' baalon nilo. Sabap ra intor ra ulun ru Jaudi, ulun sala' ka Jaudi nakaapu noyo ra barakat ri Aki Kapuuno'. Ginio kon ra musiti' tupo ulun sala' ka Jaudi mangindangan ra ulun ru Jaudi ra mantayar ra rapu' nilono risilo.

²⁸ Mopongo ku kandoi ragitio, io no makataak ku ruit no risilo ra Jirusalim, mapit aku tumuum ramuyun ra pangkiralanan kuno mongoi ra Sipanyol.

²⁹ Paat ra aku makaratong ra giu', maaru' mauli' barakat ri Kristus ramuyun.

³⁰ Pabukat kau ngaangai', kitaakon takamin toojo ralalom inggalan ru Tuhan takau i Jisus Kristus am ralalom ru togom tinaakan ru Ambiluo ri Aki Kapuuno', koson mababaya' takau mirot makiasi' ri Aki Kapuuno' ra bala kuno.

³¹ Pakiasi' kano raki' ri Aki Kapuuno' ra ampinin No aku intor ra ulun ondo' kalo mangintopot ra Tuhan giu' ra Judia am ra pangindanganan kuno apuon ru ulun ri Aki Kapuuno' giu' ra Jirusalim.

³² Mopongo raginio, amon ru iowon ri Aki Kapuuno', matong aku ramuyun ra guang maansukan am makakaansayan aku ra akau no.

³³ Gama' ru i Aki Kapuuno', intaran ru ngaangai' pabansayan, mabaya' ramuyun ngaangai'. Amin.