ROMA 13 - Tanou Moonsoi Timugon

Mampagagaya' ra parinta

¹ Moonong ulun musiti' gumagaya' ra parinta, sabap ra ngaangai' kuasa' nilono intor ri Aki Kapuuno' am parinta ra raino ti pana inaru' noyo ri Aki Kapuuno'.

² Ginio nai ra osoi ayuk manggal ra parinta no, manggal io niayuk ra ondo' inaru' ri Aki Kapuuno'. Osoi mambaal raginio maukuman ri Aki Kapuuno'.

³ Ulun ondo' mambaal ra moonsoi kalo pana malaa' ra parinta, kaa' ilo ondo' mambaal ra malaat no. Amon ru kalo masaga' kau malaa' ra parinta, pambaal kano ra moonsoi, am intor raginio omporon kau boo.

⁴ Sabap ra parinta no ulipon ri Aki Kapuuno' koson mangindangan ramuyun. Kaa' amon ru mambaal kau ra malaat, kalaa' kano, sabap ra parinta no makakuasa' mangukum. Inaru' io no ri Aki Kapuuno' koson mangukum ra osoi ayuk ondo' mambaal ra kalaatan.

⁵ Ginio ra akau musiti' gumagaya' ra parinta – sala' ka sabap ra malaa' ra ukum ri Aki Kapuuno' ayuk, kaa' sabap ra bolos ru guang min mampaintutun ramuyun raginio.

⁶ Ginio nai ra akau ti mambayar ra cukai, sabap ra parinta no mampaugar ra kandoi ri Aki Kapuuno' ondo' inaru' No noyo.

⁷ Intor raginio bayari' noyo ngaangai' ondo' pakibayarin nilo; ioginio cukai ru ampos ru kandoi min am cukai ru rapu' min. Urumato' noyo toojo ngaangai' parinta no.

Pontotogom kano ra rondo' am bokon

⁸ Ginio ra pai' kano pagutang atan ayuk ra osoi ayuk pana, kaa' pontotogom kano ra rondo' am bokon. Sabap ra osoi ayuk motogom ra ulun bokon giminagaya' io noyo ra ngaangai' susuban ru Ukum ri Musa.

⁹ Sabap ra kon ru Ukum no, “Pai' lapau, pai' pampatoi, pai' pantakou am pai' pagingkaut” – ngaangai' raginio am ukum ra bokon niayuk pinogondo' ayuk ra rondo' susuban ti, ioginio, “Tagami' noyo ulun ra bokon koson ra okou galama' mitogom.”

¹⁰ Osoi ayuk monogom ra ulun bokon kalo mambaal ra malaat riso, sabap ra ulun ondo' monogom no giminagaya' io no ra ngaangai' susuban ru Ukum ri Musa.

¹¹ Baalo' min ginio ngaangai' am pai' poyo pombolong sabap ra mapandayan min noyo ra raino ti musiti' pagilalain min sabap ra orou pamayagan ritakau mamaar poyo intor itakau talimpuun pangintopot.

¹² Baal nano koson ra rondom ondo' maar noyo tumawang. Intor raginio iruani' takau noyo baal ra mangalaat ondo' baalon paat ra molondom, am baalo' takau noyo baal ra mongoonsoi, ioginio koson kinandoi mangayou takau ra matawang.

¹³ Kaayag takano ra matanda' koson ra kaindalaman ru ulun paat ra matawang. Pai' kano rumamai ra jajajou kapoam mangagauk. Pai' kano pansawa' kapoam mambaal ra makauyuyu'. Pai' kano pansangor am pai' pangusolon.

¹⁴ Kaa' polosoo' noyo Tuhan Jisus Kristus maningganai ramuyun, am pai' min gagayaa' paliso min galama', ioginio mamasug ra kasagaan ru guang makatula.