RINALATAN 9 - Tanou Moonsoi Timugon

Mangintopot i Saulus ri Jisus

¹ Liliwa' ragili i Saulus nampagaai poyo ra kalaatan nano koson mamatoi ra ulun-ulun ondo' nangintopot ra Tuhan. Ginio ra ongoi io tuum ra Tingganai Maayo Imam Jaudi

² am nakitaak ra surat kuasa' koson patalangon ra tingganai ru baloi sambayangan ru ulun ru Jaudi giu' ra Damsyik. Koson ragino, amon ru makatuum io ra maamaya' ru Tuhan, ungkuyon kapoam ruandu', rokopon no am ibiton ilo ra Jirusalim.

³ Ralalom pangkiralanan no mongoi ra Damsyik, paat ra io maar makasuku' ra giu' i, pulusat silau intor ra limbowon liminiput riso.

⁴ Pakalaub io ra tana' am korongog no bolos minindagu riso, “Saulus, Saulus! Kua kia imboloo' mu Aku?”

⁵ Pangkuot i Saulus, “Osoi guat okou?” Taam bolos i, “I Jisus Aku, ondo' imboloon muno.

⁶ Kaa' raino sukal am ongoi ra Damsyik no. Giu' no balain tokou atan ondo' musiti' baalon muno.”

⁷ Ulun-ulun ondo' minaya' ri Saulus pana nakauog am nokopongkoror. Nakaining ilo toojo ra bolos i, kaa' kolondo' nakito nilo.

⁸ Sukal i Saulus am singkarato' no mato nali, kaa' kalo nakakito io boo. Ginio ra indangano' io ayuk boo kitango' mongoi ra Damsyik.

⁹ Nataluan buoi no io noolou, am buoi ragili kalo nangakan am nanginum io.

¹⁰ Giu' ra Damsyik i mokoondo' sangulun maamaya' ri Jisus makainggalan ri Ananias. Ralalom rondo' pagilangan nakakito io ra Tuhan nampiau riso, ragu Nano, “Ananias!” Taam i Ananias, “Iou Tuhan, giti aku.”

¹¹ Indagu Tuhan i riso, “Tampos no am baya' ra ralan ondo' inggalanin ra Ralan Mabanis, am ongoi ra baloi ri Judas koson mangkuot ra sangulun ungkuyon ondo' makainggalan ri Saulus intor ra bandar Tarsus. Paat ra raino niayuk makiasi' io,

¹² am ralalom rondo' pagilangan pakakito io sangulun ungkuyon makainggalan ri Ananias tumuum riso. Pabantaa' no kalindu' nano riso koson makakito io saguli'.”

¹³ Kaa' taam i Ananias, “Tuhan, nokorongog aku no intor ra ulun masuang ra kalaatan ondo' binaal ru ulun ti ra ulun Muno giu' ra Jirusalim.

¹⁴ Rinatangan no ra Damsyik ti pana am mokoondo' io ra surat pangiawan intor ra tingganai imam Jaudi koson mamparakop ra ngaangai' ulun ondo' sumamba Rirun.”

¹⁵ Kaa' indagu Tuhan no riso, “Ugar no, sabap ra io pinili' Ku mangandoi Raki', koson mampasaboi ra tanou intor Raki' ra ngaangai' bansa' ondo' sala' ka Jaudi am raja'-raja' am niayuk ulun ru Israil.

¹⁶ Aku galama' manulu' riso ra suang ru kapaganan ondo' mauma' no sabap ra Aku.”

¹⁷ Ginio ra ongoi i Ananias ra baloi i am pabantaa' no kalindu' no ri Saulus. Indagu io, “Saulus, pabukat kuno, i Tuhan Jisus ondo' nakito mu ra tanga' ru ralan paat ra okou minongoi ragiti, nanusub raki' muma' rirun koson makakito kou saguli' am mokoowot ra Ambiluo ri Aki Kapuuno'.”

¹⁸ Paat ragili niayuk mokoondo' koson ra sisi' ru papait naratu' intor ra mato ri Saulus am makakito io boo saguli'. Sukal io boo am riwo' io.

¹⁹ Pakaakan io ayuk ragili, maikang io boo saguli'. Minayan i Saulus ra ulun nangintopot ra kukula' ngoorou giu' ra Damsyik.

Nangila' i Saulus giu' ra Damsyik

²⁰ Minongoi io ra ngaangai' baloi sambayangan ra giu' i am timinalimpuun mampatanou ra i Jisus i noyo Anak ri Aki Kapuuno'.

²¹ Ngaangai' ulun ondo' nokorongog i nangimuag ri Saulus. Nagindagu ilo, “Sala' ka kia io no ondo' giu' ra Jirusalim i namatoi ra ulun ondo' sumamba ri Jisus? Am minatong io ragiti pana koson mamparakop am magibit risilo ra tingganai imam Jaudi?”

²² Kaa' mulu' poyo ikang ru bala' ri Saulus i. Atan ondo' pinabala' nali ra i Jisus noyo Mamamayag ondo' sinusub ri Aki Kapuuno' mintutun toojo, saboi ulun ru Jaudi ondo' minayan ra Damsyik kalo boo makataam riso.

²³ Kukula' ngoorou ragili, ulun ru Jaudi nangatang mamatoi ri Saulus.

²⁴ Kaa' napandayan ri Saulus nangatangan nilo raginio. Orou-rondom nagawang ilo subalan ru bandar i koson mamatoi riso.

²⁵ Kaa' sarandaman ragili, pinasuang i Saulus ra bakul maayo am pinatuun io ru maamaya' nano intor ra rondo' gigimpalan ru timbok i.

I Saulus giu' ra Jirusalim

²⁶ Ongoi i Saulus ra Jirusalim am kuminam io sumimpung ra maamaya' ri Jisus. Kaa' nalaa' ilo riso, sabap ra kalo nangintopot ilo ra i Saulus totopot nasauk ra maamaya' ri Jisus.

²⁷ Kaa' inindangan io ri Barnabas ondo' nagibit riso paumaa' ra rasul-rasul. Tunungo' ri Barnabas risilo ati kulaan i Saulus nakakito ra Tuhan ra tanga' ru ralan am ati kulaan Tuhan minindagu riso. Nambala' io niayuk ra ati kulaan i Saulus makakau' toojo nampasaboi ra Tanou Moonsoi intor ri Jisus giu' ra Damsyik.

²⁸ Ginio boo ra minayan i Saulus risilo, am makakau' io mangila' ra ati ayuk giu' ra Jirusalim ralalom inggalan ru Tuhan.

²⁹ Nakimantaam io niayuk ra ulun ru Jaudi ondo' mindagu ra ragu ru Junani, am nangkinam ilo poyo mamatoi riso.

³⁰ Kapandayi' ru ulun-ulun nangintopot ra baal raginio, ibito' nilo i Saulus giu' ra Kaisaria am atari' nilo io poyo ra Tarsus.

³¹ Intor raginio ngaangai' pasimpungan ulun Kristian ra Judia, Galilia am Samaria kolondo' boo kapaganan. Nangurumat ilo ri Aki Kapuuno' am nabaya' ra indangan ru Ambiluo ri Aki Kapuuno' siminuang am maikang pangintapatan nilo.

I Pitrus giu' ra Lida am Jopi

³² Minongoi i Pitrus ra ati ayuk intok nanambului ra ulun-ulun mangintopot. Ralalom pangkiralanan nali minongoi io pagilong ra ulun ri Aki Kapuuno' ra bandar Lida.

³³ Giu' i nakatuum io ra sangulun ungkuyon makainggalan ri Inias, ondo' kalo makalulu' am lumuya' ayuk ra kaalangan nali buoi balu' ngambilor noyo.

³⁴ Indagu i Pitrus riso, “Inias, i Jisus Kristus mamabas rirun. Sukal no am ruluno' kaalangan muno.” Paat ragili niayuk siminukal i Inias.

³⁵ Ginio ra ngaangai' ulun ondo' minayan ra Lida am Saron nakakito ra atan nasauk ri Inias, am ilo ti pana nangintopot boo ra Tuhan.

³⁶ Giu' ra Jopi mokoondo' poyo sangulun ruandu' makainggalan ri Tabita. Nangintopot io ri Jisus. (Inggalan nano ralalom ragu ru Junani am i Dorkas ondo' makaarati' “Tambang”.) Masalok moonsoi baalon nano am mangindangan io niayuk ra ulun musikin.

³⁷ Paat ragili narualan io am pupus i minatoi io boo. Kopongo ayuk baangkai nali riniu', palangano' nilo ra rondo' lamin rasawat ru baloi i.

³⁸ Jopi ti kalo maalur intor ra Lida. Paat ra ulun nangintopot ri Jisus intor ra Jopi nokorongog ra i Pitrus soroi ra Lida, pambilin ilo ra ruo ngaulun intor risilo mongoi ri Pitrus. Pambala' ilo riso, konilai, “Ribaki' noyo am ratong ra Jopi.”

³⁹ Tampos i Pitrus am baya' risilo. Pakasuku' ra giu' i, ibito' io ra lamin ru rasawat i. Ngaangai' napuor liminimpu ri Pitrus liliwa' nantangi' am patalango' nilo bayang am sukub ondo' pinikit ri Dorkas i risilo ra io lakat ayuk poyo soroi.

⁴⁰ Susubo' ilo ri Pitrus mingkual, igulatur io boo am pakiasi'. Kopongo ragili inggaari' no baangkai ri Dorkas ti am indagu, “Tabita, sukal no!” Singkarato' no mato nali, am paat ra io nakakito ri Pitrus, panturung io boo.

⁴¹ Guuto' ri Pitrus longon nali am indangano' no bigor. Piawo' no boo ulun ondo' nangintopot am niayuk napuor-napuor, koson nampakito risilo ra naayag io poyo saguli'.

⁴² Tanou raginio nakatabual ra ngaangai' intok giu' ra Jopi, saboi masuang ulun nangintopot ra Tuhan.

⁴³ Minayan i Pitrus ra kukula' ngoorou poyo ra Jopi, giu' ra baloi ri Simon, io ti sangulun mambaal ra kuliamos intor ra kungkung ru bibiag.