RINALATAN 7 - Tanou Moonsoi Timugon

Ragu ri Stipanus

¹ Pangkuot Tingganai Maayo Imam Jaudi i ri Stipanus, “Motopot kia ginio?”

² Taam i Stipanus, “Pabukat ku ngaangai'! Rongogo' min gitio! I Aki Kapuuno' nampakito ra katulayan Nano ra kinamatuaan takau i Abragam paat ra io lakat ayuk poyo minayan giu' ra pagun Misopotamia, ra kalo poyo minanding ra pagun ru Aran.

³ Indagu i Aki Kapuuno' riso, ‘Iruani' pagun ragitio am ngaangai' pongkotob am pabukat muno, am ongoi ra rondo' pagun ondo' patuluon Kuno rirun.’

⁴ Ginio boo ra iruani' ri Abragam pagun ru Kasdim am ayan ra Aran. Patoi ama' nali, am panusub boo i Aki Kapuuno' riso manding intor ra giu' i mongoi ra pagun ondo' ayanan min ra raino ti.

⁵ Paat ragili kalo nangani' i Aki Kapuuno' riso ra sampila' tana' pana intor ra pagun ti koson ra longgom nano. Kaa' nambantu' i Aki Kapuuno' ra taakin no ginio ri Abragam am ngaangai' papag nano. Kaa' paat ragili i Abragam ti kolondo' anak.

⁶ Kaa' indagu i Aki Kapuuno' riso, ‘Papag muno mayan ra pagun ru ulun bokon, uliponon am imboloon ilo saboi apat ngaatus ngambilor buoi no.

⁷ Kaa' ukumin Ku bansa' ondo' mangulipon risilo am makaingkual ilo intor ra pagun no am makasamba ilo raki' ra intok ragitio.’

⁸ Nangani' niayuk i Aki Kapuuno' ri Abragam ra kaulayan ru sunat koson rondo' tatandu' ru bantu' i. Ginio ra sunati' ri Abragam anak nali i Isak ra io makaumur saminggu' ayuk poyo; am sunati' boo ri Isak anak nali i Jakub am poyo sunati' boo ri Jakub anak no ra ungkuyon ondo' mopor am ruo ngaulun; ilo i am kinamatuaan ru bansa' takau.

⁹ “Kaa' nangusolon boo kinamatuaan ru bansa' takali ri Jusup i. Ginio ra talano' nilo io ra pagun ru Misir koson saukon ra ulipon. Kaa' inindangan io ri Aki Kapuuno',

¹⁰ am pinalabus intor ra ngaangai' kapaganan. Paat ra io minongoi uma' ra raja' Misir i, ondo' sabiton ra Piraun, inanian io ri Aki Kapuuno' ra paliso moonsoi am kapintaran saboi raja' i nampasauk riso ra gabenor pagun raginio am magagalung ra istana.

¹¹ Mokoondo' boo bitilan giu' ra ngaangai' pagun ru Misir am Kanaan ondo' nangkinibit ra ngaangai' ulun makakapaganan. Kinamatuaan takali pana kalo nakauyum ra akanon.

¹² Paat ri Jakub naala' ra mokoondo' akanon giu' ra Misir, poongoyo' no anak no, kinamatuaan takau ra giu' i. Ginio am kainsaa' nilo ayuk poyo pakajanjang ra pagun i.

¹³ Ongoi ilo ra kainduo i, pambala' boo i Jusup ra pongkotob nano ra io no i Jusup. Paat ragili bagu nakatutun raja' ru Misir ra pinongkotob ri Jusup am bansa' nali.

¹⁴ Ginio ra pambilin i Jusup ra ama' nali i Jakub, mabaya' ra ngaangai' pabukat nano koson manding ra pagun ru Misir. Ilo ti makasuang tulu' ngoopor am limo ngaulun ringai'.

¹⁵ Banding boo i Jakub ra pagun ru Misir am giu' i ayuk boo pinatayan nali am niayuk kinamatuaan takali ra bokon i poyo.

¹⁶ Kaa' baangkai nilai inibit muli' ra Kanaan ra libung Sikim am linobong ra kalabangan ondo' binali ri Abragam ra ruit pirok intor ra bansa' ru Gamor giu' ra Sikim.

¹⁷ “Paat ra maar noyo masuku' kaukapan ru bantu' ri Aki Kapuuno' ri Abragam, bansa' takau giu' ra Misir i siminuang poyo.

¹⁸ Gili boo mokoondo' sangulun raja' bagu namarinta ra pagun ru Misir ondo' kalo nakatutun ri Jusup.

¹⁹ Namparuung raja' no ra bansa' takau am niayuk mapuka' ra kinamatuaan takali. Jinajalan ilo poyo mampalisar ra lalagang nilo saboi matoi.

²⁰ Paat ragili i Musa inanak. Io am maindon toojo. Inalungan io buoi ru talu ngambulan ru matuo nali.

²¹ Paat ra io pinalisar i, mokoondo' anak ruandu' raja' ru Misir nakatuum riso, alungi' no io koson ra anak nano galama'.

²² Ilaa' io ra ngaangai' kapandayan ru ulun ru Misir am kasauk io ra sangulun mapintar, koson matanda' toojo ragu am baalon nano.

²³ “Pakaumur i Musa apat ngoopor ngambilor, makaguang io mongoi bujak ra bansa' nali, ulun ru Israil.

²⁴ Pakakito io ra sangulun intor ra bansa' nano inimbolo' ru sangulun Misir. Ongoyo' no boo indangano' am potoyo' no ulun ru Misir i. (

²⁵ Pangkaraan nali, maaru' bansa' nati makatutun ra io inalap ri Aki Kapuuno' koson mangindangan mampalabus risilo. Kaa' kalo nakatutun ilo.)

²⁶ Iosuabon, pakakito io ra ruo ngaulun ru Israil nansangor am kinami' no ilo sawayo'. Kono risilo, ‘Akau ti mabukat. Kua malaat kau ra rondo' am bokon?’

²⁷ Kaa' indagu ulun ondo' nampalamba' ra rangan nali, ‘Osoi guat nanusub rirun masauk ra tingganai am akim mai?

²⁸ Mamatoi kou po kia raki' koson ra okou namatoi ra ulun ru Misir ra mai' i?’

²⁹ Pakaining i Musa ra ragu ru ulun i, pagiru' io intor ra Misir am ayan ra pagun ru Midian. Buoi ra giu' i, nokoowot io ra ruo ngaulun anak ungkuyon.

³⁰ “Pakasail apat ngoopor ngambilor, pulusat ru rondo' malaikat ra saang ri Musa ralalom bulungkut ondo' bibilak giu' ra tana' kaagisan, mamaar ra Gunung Sinai.

³¹ Nangimuag i Musa nakakito raginio, am inggaari' no bulungkut i koson magilong toojo. Pakasuku' ra giu' i, kaining no boo bolos ru Tuhan minindagu,

³² ‘Aku ti i Aki Kapuuno' ondo' sambaan ru kinamatuaan muli, i Abragam, Isak am i Jakub.’ Ginio ra nonontol i Musa am kalo boo makakau' magilong.

³³ Indagu poyo i Aki Kapuuno', ‘Paguso' kasut muno, sabap ra binigaran muno matulai toojo.

³⁴ Nakatutun Aku noyo toojo ra kaimbalaan am kapaganan ru bansa' Kuno giu' ra Misir. Niayuk nakaining Aku ra ilo naguros. Ginio ra raino masaga' Aku mongoi pampalabus risilo. Ibok no! Poongoyon tokou ra pagun ru Misir.’

³⁵ “I Musa kalo iniou ru ulun ru Israil. Ginio ra minindagu ilo, ‘Osoi guat nanusub rirun masauk ra tingganai am akim mai?’ Kaa' io no sinusub ri Aki Kapuuno' nasauk ra tingganai am mamamayag, mabaya' ra indangan ru malaikat ondo' nakito no ra bulungkut bibilak i.

³⁶ Io ti noyo ondo' nagibit ra bansa' ru Israil miningkual intor ra Misir nabaya' ra kukula' kaimuagan sinauk no giu' ra Raat Malia' am poyo giu' ra tana' kaagisan saboi apat ngoopor ngambilor buoi.

³⁷ I Musa ti noyo minindagu ra bansa' ru Israil ra, ‘Manusub poyo i Aki Kapuuno' ra sangulun nabi intor ra bansa' min galama', koson niayuk ra Io nanusub raki'.’

³⁸ I Musa ti noyo ondo' nangkinibit ra bansa' ru Israil timinimung giu' ra tana' kaagisan. Ginio ra soroi io ra giu' i nabaya' ra kinamatuaan takali am malaikat ondo' makimansunur ri Musa giu' ra Gunung Sinai. Io no ondo' inanian ri Aki Kapuuno' ra tanou ondo' manaak ra kaayagan koson posoboyon ritakau.

³⁹ “Kaa' kinamatuaan takali kalo nangiou ilo riso. Atan nai ra inimpayan nilo io am masaga' ilo sumaguli' ra Misir.

⁴⁰ Indagu ilo ri Arun, ‘Baali' akai ra kukula' sinungkalalaing ondo' pasiguluon takau mugar. Sabap ra i Musa ondo' nagibit ritakau mingkual intor ra Misir, tawa atan boo nasauk riso no!’

⁴¹ Pambaal ilo ra rondo' sinungkalalaing koson ra sapi' ungkuyon am pangani' ra taak ra binaal nilo raginio. Pambaal ilo poyo ra bunsag maayo koson mangurumat ra ondo' binaal nilo galama' ti.

⁴² Ginio ra iruani' ilo ri Aki Kapuuno' am polosoo' No ilo sumamba ra butitin. Koson noyo ondo' tinulisan ra Kitab ru Nabi, ‘Alii boo ramuyun, ulun ru Israil! Pai' ru sinimbalui min ginio am pataakon Raki', kabalu' pana apat ngoopor ngambilor buoi min giu' ra tana' kaagisan.

⁴³ Kim ru sinungkalalaing ininggalanan ra Molok ondo' ibibiton min ayuk, mabaya' poyo ra tuhan min ra butitin, inggalanin ra Ripan; ginio ngaangai' ondo' binaal min galama' am sambaa'. Ginio boo ra Aku namatir ramuyun giu' ra pagun Babil.’

⁴⁴ “Kinamatuaan takali mokoondo' ra Kim Sambayangan ondo' nababaya' risilo giu' ra intok masiluk. Kim no binaal maya' ra nanusuban ri Aki Kapuuno' ri Musa, sumugut ra ondo' nanuluan Nano riso i.

⁴⁵ Kopongo ragili kinamatuaan takali nangapu ra Kim ti am inibit nilo paat ra ilo minaya' ri Josua minongoi pampagaau ra pagun takau ti. Ioginio paat ri Aki Kapuuno' nampagiru' ra bansa' ru bokon ondo' nongompong risilo. Kim i siminoroi ra giu' i saboi ra paat ru raja' Daut.

⁴⁶ I Daut napabansuk ra guang ri Aki Kapuuno'. Ginio ra kitaako' no koson mambaal ra rondo' baloi ri Aki Kapuuno' ondo' sambaan ri Jakub.

⁴⁷ Kaa' i Salomo boo tupo ondo' nakapambaal raginio.

⁴⁸ “Kaa' i Aki Kapuuno' Ondo' Masawat Kaga' kalo mayan ralalom baloi ondo' baalon ru ulun, sabap ra kon noyo ru Kitab ru Nabi,

⁴⁹ ‘Limbowon no takhta Kuno, am tana' ti kinjangan Kuno. Atan kia ra baloi maalap min kabaal koson Raki'? Ati guat inayanan Kuno?

⁵⁰ Sala' ka kia Aku nambaal ra ngaangai' ti?’ Ginio noyo ragu ri Aki Kapuuno'.

⁵¹ Mapara' boo kotog ru guang min! Mapara' pagon mino mangkirongog ra bala' ri Aki Kapuuno'! Nogondo' kau ra kinamatuaan mini, masalok manggal kau ra Ambiluo ri Aki Kapuuno'!

⁵² Mokoondo' kia sangulun nabi pana ondo' kalo inimbolo' ru kinamatuaan min? Am pinatoi nilo poyo ulun sinusub ri Aki Kapuuno' ondo' ragili nambala' ra ratangan ru Ulipon Nano ra motopot i. Io no ondo' pinataak min ra pantula' Nano am pinatoi min.

⁵³ Akau no niayuk nakaapu ra susuban ri Aki Kapuuno' ondo' pinataak ru malaikat-malaikat ramuyun, kaa' kalo nai sinugut min!”

I Stipanus binobol ra batu saboi minatoi

⁵⁴ Pakaining ayuk ulun-ulun ru Majlis Ugama ondo' rinagu ri Stipanus, malasu' boo toojo guang nilo mabaya' ra kinuritot ru ripon.

⁵⁵ Kaa' i Stipanus ondo' inikang ru Ambiluo ri Aki Kapuuno' nantingaa' ra limbowon. Kakito no boo katulayan ri Aki Kapuuno' am i Jisus minigor ra intok makakuasa' ra tampilon pamiris ri Aki Kapuuno'.

⁵⁶ Indagu io, “Ilai', nakito ku suruga' no naukab am Anak ru Ulun minigor ra tampilon pamiris ri Aki Kapuuno'!”

⁵⁷ Kaa' silongo' nilo talingo nilai ra kalindu' liliwa' gogolok, am gabuo' nilo i Stipanus.

⁵⁸ Ralaato' nilo io miningkual ra bandar i am bobolon io ra batu saboi matoi. Sasi' napabanta' ra sukub nilo ra tuma' ru kalayam ru sangulun tuu'-bagu makainggalan ri Saulus.

⁵⁹ Paat ilo nomomobol i, pakiasi' i Stipanus, kono, “Tuhan Jisus, apuo' noyo ambiluo kutu!”

⁶⁰ Igulatur io am pompogolok poyo ra mosongou, “Tuhan, pai' polosoo' tula ti sumaboi risilo!” Paat ragili niayuk i Stipanus minatoi.