RINALATAN 6 - Tanou Moonsoi Timugon

Tulu' ngaulun mangingindangan ra rasul

¹ Paat ragili niayuk siminuang ulun ondo' mangintopot ri Jisus i, am nansasangor boo ulun ru Jaudi ondo' mindagu ra ragu Junani am ondo' mindagu ra ragu Ibrani. Ilo ondo' mindagu ra ragu Junani ti nanguu' ra bokon ra napuor nilo ti linilianan ra kalo aniin ra ruit moonong orou.

² Ginio boo ra timungo' boo ru mopor am ruo ngaulun rasul ngaangai' ulun ondo' minaya' risilo i am indagu, “Kalo moonsoi amon ru langgain mai mampasaboi ra Tanou Moonsoi ri Aki Kapuuno' koson mampaugar ra kandoi pantayaran ra ruit ti.

³ Ginio ra aruo' min tulu' ngaulun ondo' mangatanda', kinuasa' ru Ambiluo ri Aki Kapuuno' am mapintar, ginio ra makapalit ilo boo ramon mambaal ra kandoi ti.

⁴ Ginio nai ra akai matasu' boo makiasi' am mampasaboi ak ra tanou intor ri Aki Kapuuno'.”

⁵ Ngaangai' ru ulun no pana nangiou ra rinagu ru rasul, am aruo' nilo i Stipanus, sangulun ondo' mapiot pangintapatan nano am niayuk kinuasa' ru Ambiluo ri Aki Kapuuno', am poyo i Pilipus, Porokus, Nikanor, Timon, Parminas, Nikolaus intor ra Antiokia, ondo' ragili minaya' ra ugama Jaudi, kabalu' pana io sala' ka bansa' ru Jaudi.

⁶ Tulu' ngaulun ti pinauma' boo ra rasul-rasul, am pabantaa' nilo kalindu' nilai risilo koson makitaak ra barakat intor ri Aki Kapuuno'.

⁷ Kon raginio noyo Tanou Moonsoi ri Aki Kapuuno' nakatabual poyo am giu' ra Jirusalim i pana, riminuang poyo boo ondo' mangintopot ri Jisus. Masuang poyo imam Jaudi ondo' nangintopot.

I Stipanus rinakop

⁸ I Stipanus binarakat toojo ri Aki Kapuuno' am makakuasa', saboi makapambaal ra kaimuagan am tatandu' ra ulun masuang.

⁹ Kaa' mokoondo' niayuk kukula' ngaulun manggal riso. Ilo no intor ra baloi sambayangan ondo' sabiton ra ‘Pasisimpungan ru Ulun Pinalabus’. Ilo ti am ulun ru Jaudi intor ra Kirini am Aliksandria, am poyo intor ra Kilikia am niayuk Asia. Ilo ngaangai' ti nakimansangor ri Stipanus.

¹⁰ Kaa' Ambiluo ri Aki Kapuuno' nangani' ri Stipanus ra kapintaran manaam, ginio ra kalo boo makaanggal ilo riso.

¹¹ Anii' nilo kukula' ngaulun ra ruit koson ilo ti mongoi boo pambala' ra ulun masuang no ra, “Nokorongog akai ra ulun no nagasab ra nabi Musa am niayuk i Aki Kapuuno'!”

¹² Nanusuk ilo niayuk ra ulun masuang, tingganai ru ulun ru Jaudi am poyo mangingila' ra Ukum ri Musa, saboi ongoyon nilo rokopo' i Stipanus koson bisaraan giu' ra Majlis Ugama.

¹³ Susubo' nilo sasi' ondo' maabau-abau no mindagu koson raginio, “Ulun ti masalok magasab ra Baloi Tuhan am susuban ri Aki Kapuuno' ondo' tinulisan ralalom Ukum ri Musa.

¹⁴ Nokorongog akai ra io minindagu ra i Jisus intor ra Nasarit i mampalunsai ra Baloi Tuhan ti am ngaangai' kaulayan ondo' nangilaan ri Musa ritakau i kulawon no!”

¹⁵ Ponontong boo ngaangai' ulun ondo' minongoi ra Majlis Ugama i ri Stipanus. Am kakito nilo ra bulos nali koson ra malaikat.